معلومآت عن كل مآيخص التقديم على وظآئف {معيد,معيده} مقآبلاتـ +نقآشآتـ+إستفسآرآتـ

[إعلامية سابقة]

[align=center]
صباح /مساء الخير

جاتني فكرة أتمنى تكون جديدة ومفيدة للكل ، وهو أنو نتكلم عن وظائف المعيدية . في أثناء جولاتي في النت لاحظت أنو دايما فيه أسئلة من قبيل : كيف ممكن اقدم ؟ اش المطلوب ؟ اتفاجئت في الطلبات ..الخ .

فهنا في الموضوع راح احاول اجمع كل المعلومات والخبرات بما أني مقدمة على أربعة وظائف معيدية في اربعة جامعات مختلفة

1- ليش ناس كتير يهتموا بوظيفة المعيد ؟
وظيفة المعيد فيها فرص كتيرة :
1- الراتب الأساسي اللي عبارة عن 5800 (بحسب وزارة الخدمة المدنية ) ويختلف مع البدلات اللي بتختلف من جامعة لتانية ، مثلا فيه جامعات فيها بدل جامعة ناشئة وجامعات لا .
2- فرصة الأبتعاث واكمال الدراسة في البلد اللي انت تختارو .
3- فرصة السمعة والمكانة الإجتماعية .
4- والأهم أنها وظيفة حكومية محد راح يفنشك منها بدون أسباب .

2- أش ممكن تحتاج اذا اتخرجت وفكرت تقدم على المعيدية ؟
اول ماتستلم أو تستلمي وثيقتك ، لازم تبدأي تفكري بأشياء كتيرة .. مثلا انك تبدأ تسوي التوصيات العلمية بعدد تلاتة نسخ عربي وانجلييزي . بعد ماتسوي التوصيات جيب الوثيقة + كشف الدرجات + التوصيات+ شهادة السيرة والسلوك وصورها بنسخ كتيرة ماتقل عن خمسة نسخ لكل ورقة واتجه لجامعتك وسويها صورة مصدقة .
(أش يعني صورة مصدقة ؟) يعني أنك راح تمسك النسخة وتختمها من الجامعة من عمادة القبول والتسجيل والتوصيات من قسمك .

وامسك كل اللاشياء دي واعملها نسخ بالاسكنر داخل الجهاز عشان تتحول لصور لكترونية لأنو دحين الجامعات اغلبها تقديم الكتروني .

3- اش الشروط المطلوبة في المعيدية ؟
شروط ماتنتهي ، حقيقة كل جامعة بتخترع شي . مثلا في جامعة ام القرى يهمتوا بالخبرات ، بمعنى أنك تكون لك أعمال تطوعية أو شغل حقيقي والشغل دا لازم يكون مثبت بخطاب من المؤسسة وعشان كدا كل ماشتغلت شغل خد خطاب او ورقة انك سويت دا الشي .
فيه جامعات معقدينها مرة زي جامعة الملك عبد العزيز طالبين شرط اللغة الانجليزية ، ودا الشي لازم ينتبه ليه كل مين على ابواب التخرج .. روح شيك على جداول مركز القياس للغة الانجليزية راح تلاقي أختبار اسمو "STEP" زاكر شويتين وادخل الاختبار واحتفظ بالنتيجة .
للأسف أنا دا الشي مالحقت اعملو ولكن ارفقت نتيجيتي في دورة اللغة الانجليزية .
ولامانع أنك تختبر أو تختبري توفل أو اختبار ايلتس بس للأسف دي الاختبارات جدا مكلفة فوق 1000 ريال او 800 ريال . بعكس الاستيب اللي جدا رخيص ب100 ريال وبيتعمل كل فترة في جامعة الملك عبد العزيز بجدة .

فيه جامعات يطلبوا التوصيات العلمية أو شرط الثقافة العامة ..
المعايير تختلف من جامعة لأخرى.


4- كيف راح اعرف بتقديم المعيدية ؟
المعيدية من أكتر الوظايف اللي تدخل فيها الواسطات والمحسوبية وكلنا نعرف دا الشي ، لكن دا مايمنع انو الانسان يحاول مرة واتنين وتلاتة وكتير ناس اتعينوا من غير واسطات وسارو دكاترة قد الدنيا على قولة اخواننا المصريين .
عادة الوظايف تنزل في فترة او فترتين في السنة ، على حسب الأحتياج وراح تلاقي الإعلانات في المواقع الإلكترونية عشان كدا كل فترة شيك على مواقع الوظايف .
طبعا فيه وظايف تجي بطريقة تانية بدون إعلان ولا شي ، فأنت بعد ماتتخرج دور دكتور يعزك في نفس القسم وخليه يحطلك الملف عند رئيس القسم -ونفس الشي للبنات - وانا سمعت كتير ناس سووا كدا في الجامعات .
مع الأسف انا رئيسة قسمي كان عندي تتش ومشاكل معاها زمان فماقدرت اسوي كدا واكتفيت بالتقديم العادي .

5- بعد التقديم أش اسوي ؟
راح تنتظر فترة من شهرين لتلاتة عشان تطلع النتايج ، في دي الفترة احرص انك تقبل شغل تاني ولاتنتظر زي ماسوت اختكم في الله لأنو المواضيع دي جدا تطوول .
وكل فترة نط في الجامعة واتصل عليهم واسأل عشان تشوف متى راح يطلعوها وتابع الموقع الإلكتروني أول بأول .


6- أسمي طلع مع المرشحين أو المرشحات ، اش اسوي ؟

نجي للمهم .. راح اتكلم عن شي اسمو الاختبار التحريري ، و المقابلة الشخصية .



-الاختبار التحريري :
طبعا دي حركة جديدة من الجامعات عشان تفاضل بين المتقدمين ، الإختبار التحريري عادة مايجي من صلب التخصص يعتمد على المزاكرة ، لمن تزاكرو زاكرو المواد المهممممممممممة .
اش المواد المهمة ؟ المواد اللي عادة تتكرر في الماستر والبكالوريوس زي النظريات ومناهج البحث ..ألخ
ازا كنت مقدم في جامعة غير الجامعة اللي درست فيها ، مثلا انت متخرج من ام القرى ومقدم في جامعة طيبة .. روح شيك على الخطة الدراسية عندهم واش المواد اللي دارسينها ودور في النت اوراق من المواد دي .لأنو غالبا راح تجيك اسئلة منها
كنوع من التعجيز ، بس أنت راح تقدر تعديها بالإستعداد الجيد والجيد .
-المقابلة الشخصية :
دي المرحلة التانية وعادة الأسئلة فيها تتنوع من التخصص للعام .
وأتمنى كل شخص يكتب عن تجربتو في المقابلة الشخصية للفائدة .
والحقيقة انا عن نفسي حسيت أنو مافي مقياس ولا أسئلة محددة ممكن تجمع بين اتنين مرشحين في نفس التخصص في نفس الجامعة .

مثلا في مقابلتي في جامعة ام القرى ، سألوني أسئلة اعتيادية :
-عرفي عن نفسك ؟
-ليش قدمتي لوظائف الإعادة ؟
-اش هيا الوظائف اللي قدمتي فيها او الجامعات التانية ؟
- اش راح تضيفي للجامعة ؟
وسؤال واحد من تخصصي . عكس زميلة ليا سألوها كلو من التخصص الدقيق جدا واسئلة معقدة وطويلة .

بس عموما الجامعات اللي في مكة والمدينة لها طابع إسلامي وديني ، لمن تدخل يحبو أنو يسئلو اشياء لها علاقة بالامور الدينية والاجابات في نفس الاطار.
عكس جامعة الملك عبد العزيز اللي اغلب دكاترتها فري ولهم طابع ليبرالي يحبو انو تتفلسف وتقول .


* أخيرا أذا جاك القبول النهائي ، ماراح يكون فيه تعيين على طول لأنو الأوراق بتاخد وقت . إنت المفروض في دا الوقت تروح تشيك على برامج الماستر في الدول التانية أو في الجامعات عندنا وتقدم عشان لو اشتغلت خلال سنة لازم يكون معاك قبول لإكمال الماجستير .


* ما أنقبلت اش راح اسوي ؟
استمر في التقديم والتقديم والتقديم ، يعني كل مانزلت وظايف قدم ولا تيأسوا .. فيه وحدة تحكي أنو اتعينت بعد تالت محاولة .
وفيه فكرة قالتها لينا زميلة أنو تدخل على رئيس القسم وتقترح أنك تشتغل معاهم بالساعة .
وهيا فكرة جميلة بس احيانا ماتزبط .

في النهاية اي استفسار انا حاضرة


ودعواتي لكم بالتوفيق
[/align]

[إعلامية سابقة]

ودا نموذج تقييم المعيد في المقابلة الشخصية

http://www.taibahu.edu.sa/app_conten...9%8A%D9%84.doc

[انفاس الورد]

بارك الله فيك

[الله مرادي]

جزاك الله خير يا فاضلة ..

[ملامح الحزن]

،

انا مررره طموحي معيده بس تعبت من كثر ماانقز الجامعه

والله ماجبت الامتياز وكرفت الاعشان الاعاده

طفشتهم من خشتي في جامعة الملك عبدالعزيز

وكل مره تقولي مافي شواغر

ولي سنه اشحذهم ابي بالساعه وكل مره تقولي عذر

هالترم رحت من اول يوم ورجيتها الين وافقت ودخلتني مع المجموعه

وقلت خلاص الحلم حيتحقق

وقالت لي روحي مع المجموعه جيبوا العقد عشان اوقعه لكم

و جبت العقد قالت بوزع الجدول لكل وحده عشان نشوف نوقع ولا لا


ويوم جات توزع الجداول طلع مالي جدول

قالت لي خلاص نشوف لك مع دكتوره ثانيه وسحبت علي

عالعموم تسلمين عالموضوع بس تذكرت اللي سار لي

وحبيت افضفض

[الامل الموجود]

موضوع حلو
الى الامام...

[خريجة بلا وظيفة]

موضوعك جدا مهم ومفيد بنفس الوقت..

انا قدمت على كذا جااامعه..بعضها لاحس ولاخبر الا الان وبعضها مازالت قيد الانتظار..

قدمت ع جامعة نوره..واختبروا جميع المتقدمات..كانت الاسئله جدا سهله للمذاكرات..بس تعرفين المعلومات كثثيره والكتب متعدده فعشان كذا جاوبت ع اللي اقدر عليه..وراحت مالله كتبلي فيها نصيب..

استفدت كثثثثثثير من موضوعك..وياليت اللي سوو مقابله يقولون لنا وش كانت الاسئله..

يعطييييك الف عافيه يارب..والله يرزقنا ويااااااااااااك بالوظيفه الحكوميه

[اقرب من انفاسي]

بسم الله الرحمن الرحيم

ببدأ حكايتي ... واللي مصدع يتعامل مع اقرب صيدليه

اولا توي خريجة 1430/1431 الترم الثاني

وقدمت على الجامعات التاليه (نجران - القصيم - الباحه - تبوك - شقراء - طيبه - الخرج)

تبوك قدمت وبعدين طلبونا نطابق الاوراق وللحين لاجددددددددديد

شقراء دقوا علي قبل اسبوع واخذوا اسمي رباعي ومن فين انا وبسسس

نجي لطيبه رحت الاسبوع اللي راح المقابله

وكانت مش ولابد ...
اسئلة اشكال الوان بس فيه تخصصات ثانيه اسئلتهم روعه كلها عن سياستك مع طالباتك

واش راح تضيفي للجامعة ... واسئلة تكشف عن شخصيتك اكثر من كونها تتطلب اجابات

انا تخصص رياضيات قابلوني 2 دكاتره واحد تخصصه احياء << مدري ليه

وكانت اسئلته عن اخبار العالم <<< لازم تكوني مطلعه عالاخبار

و2 دكتورات وحده تخصص كانت اسئلتها دقيييييييقه مره

ووحده اسئلة دينيه وعامه سألتني عن

اول صحابيه قتلت مشركا في الاسلام

اذكري حديث عن فضل مكه << لاني من مكه

ماهو الاحتباس الحراري

كم ادارة تعليم في المملكه

وهذا اللي اتذكرررررررررره

دعواااتكم انقبل

[الفراغ شين]

معدلي جيد
هل اقدر اكون معيده في الجامعه ؟ حتى لو بواسطه طيب ؟

[يآرب أجبر بخآطري]

[align=center]موضوع استفدت كثير منه ..
الله لايحرمك الأجر ويسهل جميع أمورك..
[/align]