حلول البطالة Unemployment Solutions

حلول البطالة Unemployment Solutions (https://www.btalah.com/index.php)
-   مشاكلك في العمل (https://www.btalah.com/f5.html)
-   -   اي شي!! اعطوني رايكم (https://www.btalah.com/t680672.html)

مطفره 11-01-2017 03:46 PM

اي شي!! اعطوني رايكم
 
السلام عليكم ورحمة الله وبركاته

كيفكم؟ يارب الكل بخير

بتكلم عن نفسي
انا عمري 24 سنة غير متزوجة متخرجة من الجامعة من سنتين تخصص لغة عربية
قدمت ع كل وظيفة اعرف عنها اذا مافيها اختلاط
لكن للأسف ماتوظفت
وأنا بما اني بنت وبهالعمر ماتزوجت وسنتين متخرجة قمت احس اني عاله على اهلي
خاصة ان كان عندي مشاكل مرضية تأثر على مظهري
واهلي ماقصروا معي حاولوا يعالجوني بدون مايحسسوني اني عقدتهم معي
حنا عائلة ميسورة الحال على قدنا
لكن كل شي غالي ومكلف وللان انا ماانتهيت مرحلة العلاج وحاسه بالألم النفسي اكثر من ألم العلاج نفسه
لما اشوفهم يدخلون جمعيات ويحاولون يدبرون مبلغ العلاج عشان نفسيتي حول 50 الف طبعاً مو كلها مره وحده
مراحل العلاج على فترات مختلفة وكل مره يدفعون لي الي جمعوا لي فيه لكن انا حسبت السعر بشكل تقريبي

الى درجة اني صرت احاول قد ماقدر مااطلب من اهلي شي وعشان نيتي هذي سبحان الله صار كل شي يجبرني اطلب
بداية من دفع لاختبار كفايات الى اني ادور وظايف وكلهم يقولون مامعك دورات مامعك خبره؟
عرفت اني لازم ادرس لكن
كل دراسة مكلفة كل دراسة تجبرني اطلب من اهلي يدفعون للتدريس ويدفعون بعد للسواق
شعور يذبحني لكن وش اسوي مافيه طريقة اتوظف غير كذا
درست دورة مرشد تربوي
وقدمت ع الغرفة التجارية الصناعية ادرس دبلوم انجليزي وقريب تبدا دراستي فيه
لكن انا مو قادره اواصل بهالحياه على اني اعتمد بكل شي على اهلي
ابي اكون نفسي واتوظف

جربت اسوي لي مشروع طبخ وقلت اتخصص بشي واحد مبدعة فيه عشان ابرزه وفعلاً لكن للأسف على ان كل الي حولي يمدحون فيه لكن ماشفت اقبال ومايخارجني
جربت اشترك بركن بالمحلات الاسر المنتجة
وفشلت فشل قوي لاني زودت السعر عشان المحل ياخذ نسبة بالتالي محد اشترى مع اني قدمته بفكرة مميزة

انا رسامة وسويت لي حساب اعرض رسوماتي جاتني طلبات اني ارسمهم لكن رفضت من باب ان رسم الارواح مايجوز وانه بيوم القيامة يطلب مني اني أحييها يعني شي الواحد مايتمناه
لكن الشيطان بدا حالياً يلعب براسي
اقول ارسم احسن واسترزق الناس ترسم الرسمة الوحدة بااحترافية على 300 وارجع استغفر وأهون

طلبت اكسسورات للجوال بالجملة واخترت كل قطعة بعناية لكن للأسف مامشت الفكرة ..


انا كقناعه مابي وظيفة فيها اختلاط منعاً للمشاكل وكلام الناس.. لكن ماعندي حل شفت وظايف المولات على 5000 مع تأمين عرض مغري بالنسبة لي
لكن اهلي؟ وش الي يقنعهم خاصة اني بكون عرضة لكلام الناس حتى لو اني محترمة وبحالي
لكن تعرفون لو بنت وحده من الي متوظفات مو محترمه نفسها مابيتكلمون الناس عليها وحده بيتكلمون ع كل المتوظفات
فكرت اني اقدم عليه واشرط عليهم مايطلعون اسمي
يعني اسمي يكون اسم وهمي
واقول لأمي واخواتي اني بقدم ع المول وابوي واخواني مو لازم يدرون عشان مايرفضون اقولهم مثلاًً اني رايحة ادرس!؟ تتوقعون تمشي الفكرة!


انا اعتبرتكم اهلي بعد مااطلعت على المنتدى
وشفت كل شخص يحاول يفيد الثاني
اتمنى ترشدوني تعلموني
اي شي ممكن يساعدني
كيف اتوظف ووش ادرس ولو فيه فكرة مشروع
اي شي ممكن ادبر فيه نفسي
باانتظاركم ودعواتي لكم

mol88 11-01-2017 08:42 PM

رد: اي شي!! اعطوني رايكم
 
انت الان ادرسي دورات عن طريق موقع دروب دورات مجانية خذي الدورة واختبري وخذي اكبر قدر من الشهادات.
صندوق تنمية الموارد البشرية قدمي عليها للوظائف عن طريق الموقع وعندما تقدمي ويتصلوا عليك قوليلهم اختلاط أو لا في اي وظيفة قبل ماتروحي وتخسري - موقع طاقات للتوظيف ادخلي علية وقدمي على الوظائف اللي تعجبك - الرسم استغليه ارسمي كم رسمة واعرضيها على جمعيات للاسر المنتجة مثل جمعية الايادي الحرفية بجدة أو الغرفة التجارية بالرياض لهم موقع يسوق للاسر المنتجة - الشرقية نفس الشيء في الغرفة التجارية وجدة نفس الشيء - انت بيعي قريب من السوق أو رخيص شويه عن طريق انستقرام -التويتر ولا تيأسي جيبي افكار جديدة لرسمات واعرضي كم واحده واكتبي لا ارسم الارواح وضعي الحديث وافتحي لنفسك حساب في البنك وحاولي تخلى المبلغ عليه ابدائي بمن حولك قولي لهم جيبوا التيشرت وارسمي عليه
درسي في البيت طالبات كل كتاب بمبلغ لا باس به - اعرضي على محل معجنات أن يعرض معجناتك أو تعاقدي مع فندق أو قصر افراح تضعي معجنات لهم كثير من النساء يقوموا بذلك
إذا عندك احتراف في التغليف قومي بعمل تغليفات الخاص بالافراح وتعلمي من الفيديوهات في النت إلى أن تتقني ولا تقولي ما احد اخذ تواصلي مع الاماكن واعرفي الاسعار كأنك متسوقة وانت نقصي السعر ريال أو 2 حسب التكلفة ولا تشتري لتبيعي علشان ما تخسري في كل حاجة فكري قبل القرار استغلي دراستك للتسويق لعملك ولا تضيعي الدورة بالانشغال بجمع المال لان اتقانك سيفتح لك امور كثيرة جداً جداً قدمي ادارية في معهد تدريب -في جامعه اهلية - في بنك - جمعية انسي التخصص وفدمي كثير توظفوا من دون التخصص حتى لو بالثانوية قدمي .
والله يوفق ولا تنسي الدعاء لنفسك والاستغفار لطلب الرزق واليقين أن الله سيرزقك كما يرزق الطير على ضعفة يخرج جائع ويعود شبعان وكوني ايجابية مهما حصل كل امور الانسان خير والله ما ابتلك إلا لانه يحبك .
وكفايات تقدمي لمركز قياس لاعفائك من الرسوم هناك طريقة لا اذكرها ولكن بعض الناس اسألي في المركز نفسة بالهاتف

ااااحساس حلم 11-01-2017 10:06 PM

رد: اي شي!! اعطوني رايكم
 
اقرئي سورة الواقعة بتدبر واسئلي الله جل جلاله ان يرزقي عملا تنتفعي به ويدر لكي دخلا لك وللاسرتك

أحمد36369 14-01-2017 09:15 PM

رد: اي شي!! اعطوني رايكم
 
الله يعينك ويشفيكي

أحمد36369 14-01-2017 09:16 PM

اقرئي سورة البقرة كل يوم

عبدالقادر1 20-01-2017 02:17 PM

رد: اي شي!! اعطوني رايكم
 
انا اقول تزوجي افضل

كايلا 21-01-2017 03:57 AM

رد: اي شي!! اعطوني رايكم
 
الله يكتب لك الشفاء ويفتح لك ابواب الرزق
اللي اعرفه ان المشاريع تاخذ وقت على ماتكسبين زباين وتجيك ارباح يعني يبغى لها وقت وصبر
انا ابيع في الانستقرام خلطات للشعر لي 3 شهور ومابعت غير باربعين ريال يعني تخيلي مبلغ زهيد جدا وهذا انا صابره على أمل يتحسن الوضع
أما مسألة العمل في المولات مانصحك تشتغلين فيها بدون علم ابوك واخوانك لان مافيه شيء يتخبى واكيد بيجي وقت وبيدرون
فحاولي تقنعينهم انتي وامك وخواتك واصلا في محلات نسائيه مافيها اختلاط ابدا والله يوفقك ويرزقك

mmarowili 01-02-2017 10:47 PM

رد: اي شي!! اعطوني رايكم
 
الله يعين

BOLD 02-02-2017 07:16 AM

رد: اي شي!! اعطوني رايكم
 
اكثري من الإستغفار ..

ام فهيدان 02-02-2017 10:18 PM

رد: اي شي!! اعطوني رايكم
 
وعليكم السلام وحمة الله وبركاته
حبيبتي الله يرزقنا ويرزقك من اوسع ابوابه رزق حلال طيب مبارك فيه بالنسبه للطبخ حاولي انك تسوقينه بالسناب والانستا ونفس الشي للرسم واذا ماتبي ترسمي ارواح اكتبي في البايو عندك انك ماترسمين ارواح وحاولي بالطبخ انك ماتكثرين طبخات يعني اعتمدي 3او اربع طبخات وشوي شوي توسعي وحاولي تثقفين نفسك وتابعي اللي عندهم حسابات في الانستا وتعلمي منهم
وبالنسبة للوظيفه ادعي لنفسك يارب ترزقنا وترزقك صار لي متخرجة 8سنوات وجات لي وظايف في مولات بعيده كثير عن تخصصي بس اردها لنفس سببك انه مابي اختلاط
واذا كنت مريضة الله يشفيك يارب ويشفي مرضانا ومرضى المسلمين قدمي ع التأهيل في الضمان ادخلي لقسم الضمان واستفسري


الساعة الآن 04:10 PM

Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة

استضافة، تصميم مواقع، برمجة تطبيقات، من توب لاين