السلام عليكم و رحمة الله و بركاته

دا الموضوع من جد على الجرررح

و اللي يشوف مصايب الناس تهون عليه مصيبته


انا بنت سعودية و كنت قبل 3 شهور موظفة في جامعة خاصة عريقة لها أكثر من 6 فروع في انحاء المملكة غير فروعها في الدول العربية و معترف بشهادتها و مناهجهها بريطانية و صاحبها او داعمها الاكبر امير ابو امير اخباره لا تنقطع في مجال المال و الأعمال ( ما اتوقع احد ما عرفها )

المهم

اتوظفت و انا مالي سنة متخرجة و بخبرة بسيطة قبل افتتاح الفرع بالمنطقة التي اسكن فيها

طبعا ً ما صدقت و فرحت مع اني اتفاجأت بسهولة توظيفي ( زميلة لي قالتلي في جامعة حتفتح روحي قدمي ملفك تاني يوم وديت ملفي بعدها باربعه ايام استلمت وظيفة براتب 5 الاف و بمنصب جيد دون اي اسئلة او اختبارات او مقابلات )

وقعت عقدي مع الجامعة و مع مدير الفرع المصري الذي كان مدير فرع اخر لنفس الجامعة والذي استبدل بمديرة بسبب اتهامه بتحرشات جنسية بالطالبات و الموظفات ( معلومة عرفتها بعد تعييني )

في البداية لم اواجه اي مشاكل بسبب قلة العمل و عدم الحاجة لموظفات لمساعدتي و قدرتي على تحمل العمل بمفردي

و تم تعيين موظفة بشهادة ثانوية للاشراف على القسم النسائي من فرع الجامعة بالفترة المسائية براتب لا يزيد عن 1500 ريال ( مع العلم لا يوجد لدينا عاملات نظافة او كافتيريا او حتى حارس )

كانت مشكلتي الوحيدة في البداية كثرة المكالمات من القسم الرجالي ( ساعة المدير ساعه مشرف اللغه العربية ساعه بقية الموظفين يدورو اتفه سبب عشان يتصلو )

و مع زيادة عدد الطالبات و احتياجنا لموظفات اكتر بدأ المدير يتذمر و اني كفاية و ما نحتاج موظفات اضافيات و طبعن مهامي بدأت تزيد

كنت موظفة دعم فني شوية صرت ادارية شوية قبول و تسجيل شوية مالية و شوية مدرسة

يعني بتاعت كلووو على قولة اخواننا المصريين

قلنا ماشي كلو يهووون الكل حاسدني يقولولي محد يلقى وظيفة زي كدة و اسمها جامعه

طبعاً كاي شركة كان المفروض يكون لي تأمين صحي يجدد سنويا ً ما استلمته غير قبل انتهاء سنتي الاولى ب 3 اشهر

و تكاليف علاجي كلها عليا
كان من بنود العقد ان في زيادة سنوية عدت السنة و ماجات قلنا فينها قالو عقدكم مدري اشبو بعد سنة كمان يمكن تجيكم الزيادة

و شوية شوية صار المدير يقول تطلعيلي عشان افهمك المادة الفلانية اللي تشرحيها و اوريكي الاوراق و مدري ايش هو
قلت جامعة و مكتبه مو مقفل يعني مافي خلوة و لزيادة الاحتياط ماكنت اطلع لحالي و كنت اخد طالبة في الجامعة معايا هيا بنفس الوقت زميلتي
في البداية ورا مكتبه ما يتحرك شوية شوية صار يقوم و يجي جنبي شوية يبغى يمسك يدي و يبغى يبوسني على خدي ( كبرت الهرجه )
قدرت اوقفه عند حده و ما خليته يتمادى

المشكلة صحبتي سبقتها للمصعد عشان انزل و ناداها عشان يعطيها ملفات تنزلي هيا قام خلاها تاخد الملفات من الارض عشان يلمسها من .....

اتخيلو موقفها

طبعن حاولنا نتصل بمدير الفرع الرئيسي و هنا جاني انذار اني ما يحق لي اني اتصل فيه الا بعد ابلاغ الامر لمديري المباشر و طبعا ً ما كان حيسمحلي ( انذار لاني ابغى اشتكي )

قمنا كلمنا مشرف اللغه العربية قلنا طيب و حيساعدنا و يقدر يتصل هو بالادارة و يتصرفو معاه

تتخيلو ايش صار ؟؟؟؟؟؟؟

الاخ السوداني وصل لمديرنا المصري اننا نبغى نشتكيه
طبعا ً صرنا من القوم المغضوب عليهم و هو من المرضي عليهم و صار الاخ السوداني الامر الناهي بالجامعة مع ان الجامعة كل امورها باللغة الانجليزية و الكمبيوتر و الاخ تخصص عربي و ما يعرف يفتح حتى ملف اكسل

البنت سحبت نفسها و قفلنا على الموضوع و السوداني صار يبتلشني انا

و يعطيني اوامر ولما احاول افهم هو باي صفة يتأمر عليا او يشكك في عملي المدير يقولي مشي مشي مشي

مشينا و المهام تزيد و انا ساكته يتدخل في كل امور الشغل مع العلم اني المشرفة و ماسكة كل الشغل من اكتر من سنة و فاهمتو كلو وماني محتاجه اشراف

ساعه يطلب ملفات و يطلعني غلطانة في كل الشغل و لازم افهمو ملف ملف عشان يقتنع اني صح اذا اتصل و لقي الخط مشغول قام يتفلسف مع العلم خطي ما يطلب خارجي يعني كلها داخلي في الجامعة و يشكك في كل قراراتي و اسلوب حلي لمشاكل الطالبات

و خرجني كم مرة من الجامعة و انا ابكي

ولما اشتكي للمدير يقولي سيبيكي منه هو مش فاهم حاجه بس انا ما اقدرش ازعلو ( طبعا ً انا عارفة ليه )

و تقدرو تتخيلو انواع التطفيش و القرف اللي مرو عليا لمدة سنة و 3 شهور في الجامعة

سافر المدير في اجازته المعتاده و احتجت ورق طباعه قام قالي الاخ اطلعي خديه من المكتب بنفسك و خلصي شغلك على مكينة البطاقات و اقفلي الباب و انزلي

طلعت و خلصت شغلي على الماكينة و نزلت لمكتبي

وكان عندي محاضرة في نفس اليوم
اول مانزلت كلمته قلتله انا خلصت شغلي و قفلت المكتب
شوية جاتني الموظفة المسائية و كانت وقتها بتساعدني صباحي لان الترم صيفي و مافي دوام مسا المهم كان معاها التلفون بيدها و تقولي انه بيسألني اذا اخدت ورق من المكتب
جاوبت لا انتي شوفتيني لما نزلت ماكان معايا حاجه و مايحتاج دا الموضوضع انك تخرجيني من المحاضرة راحت و شوية رجعت تاني و قالت يبغاكي ضروري خير ايش في سالني نفس السؤال و رجعت جاوبت انه لا ما اخدت شي غير اللي قلتله عليه قام حلفني و احلفي بذمتك و احلفي بالقران و دي امانه خير ايش في حسسني ان مصيبة صايرة
قال ايه في 3 رزم ورق A4 مختفيه من المكتب قلتله انا ما اخدت شي و قلتلك و ما جات على ورق انا دايمن باجيب على حسابي ورق و اغراض للجامعه
المهم و كبر الموضوع المدير مارضي يحلو و لا الادارة رضيت تحلووو

اتخيلو انا اطلع حرامية ورق A4
من جد هزلت و مصري و سوداني بيلعبو في حسبة الجامعة و محد داري عنهم
و طبعا ً انا لما مالقيت حل قلت كلو الا كرامتي و قدمت استقالتي
اللي ما قبلوها الا بطلوع الروح لان مافي وحدة حترضى تمسك كل الشغل اللي انا كنت ماسكته و للان عندنا موظفتين بشهادة الثانوي و موظفين رجال لهم اكتر من سنة و نص بالجامعة بدون عقود و بدون تامينات صحية و ما يحق لهم باي اجازة سنوية و بنفس اسلوب التعامل
اتخيلووو قسم نسائي لجامعة بدون حارس و مافي غير موظفة وحدة و بدون عقد مصعد مفتوح بين القسم النسائي و الرجالي و كل شوية شباب داخلين على البنات و مافي احد يمنعهم

وكل دا ليش
لان اميرنا الموقر ما عنده وقت يشرف على فروع الجامعة اهم شي توصله الفلوس اول باول و في وقتها بدون اي تأخير و الاجانب يلعبو فيها ( مديرنا بسبب توفيره الزايد في الفرع لا عمال لا حراس لا موظفين بياخد الفرق من الميزانية السنوية في جيبه و عنده اسهم في بورصة مصر و سيارة كل سنة و كل شهرين لازم يكون في مصر عشان يتطمن على مصالحه هناك ) شي من جد يبكي مو بس يقهر بس ما اقول غير حسبي الله و نعم الوكيل على اميرنا و على وزارة العمل اللي تاركة اهل البلد يتذلو من اغراب و تتاكل حقوقهم عيني عينك

انا ليا رب و حالقى وظيفة تانية بس في غيري حيطيح في يدهم و حيعملو فيه اكتر من اللي انعمل فيا انا قدرت ادافع عن نفسي بس غيري ما راح يقدر

حسبي الله و نعم الوكيل