علامك ليش متضايق حبيبي يا عسا ماشر

عسا ما جاك شي ن من حبيبك كدر الخاطر ..



دخيلك شو اللذى خلا دموع العين تتحدر

أموت آموت بس أعرف دخيلك قول م الآخر ..



تراني وان قسا طبعي أبد ماتحمل المنظر

أنا ماني على شوفة مدامع طفلتي قادر ..



أحس بحزن هالدنيا وأحس القلب يتكسر

وأحس الروح من بين الضلوع بقسوه تغادر ..



اذا كان الخطا مني فداك الروح وتأمّر

أبيع العمر لأجل رضاك يا كل الغلا آمر ..



أنا ماقدر على حزنك حبيبي لا أبد ماقدر

اذا كان الثمن هالروح بس ترضى أنا حاضر ..



تقول البعد أتعبني يا ليت الحال يتغيّر

وزد الشوق يا حبي هو الي أتعب الخاطر ..



فديتك يا بعد روحي ولا تزعل ترى مقدّر

ولازم نصبر ونرضى مدام الله مع الصابر ..



أنا مثلك ترى مشتاق ويمكن شوقي لك أكثر

ولكن قلبي يعاند رحى الايام ويكابر ..



أعشم نفسي ببكرة متى شمس اللقا تسفر

ولو ماشفتها أصبر عسى تلفي عقب باكر ..



على هالحال يا خلي تراني مثلك مسيّر

واطلب رحمة المولى ترى وحده هو القادر ..