استأذنك .. بسافـر ايـام .. وآجيـك
وان طالت ايّـام السفـر .. لاتحاتـي
حتى ولو طوّلـت .. مانـي بناسيـك
ياللي بدونك .. ويش تسـوا حياتـي؟
تامر على حاجه؟؟ .. بودّعـك واليـك
عسى عوّض الايام .. في المقبلاتـي
حتى يدي .. ماودّهـا تفـارق يديـك
ساكت .. وانا اشوف البلا في سكاتـي
ماشفتني لارحت منك .. التفـت فيـك
بـلاي والله (( روحتـي والتفاتـي))
لكن قبـل مـاروح .. ودي اوصيـك
وانت الوحيـد اللـي يقـدّر وصاتـي
لاحدٍ سالك .. وقالك ((وين مغليك؟؟))
قلـه: "لـوازم لاقضـاهـا بيـاتـي"
وان طروا النسيان .. مانـي بناسيـك
ياراس مالي فـي الحيـاه .. وغناتـي
وان طروا السلوان .. مانـي بساليـك
طيفك معي حتى وانـا فـي صلاتـي
قلبي .. وهو قلبـي اذا مـرّ طاريـك
لولا ضلوعي .. كان عـزوا مماتـي
لو جض صدري .. كان يمديه ياتيـك
ويبـات عنـدك .. ويهنـى بالمباتـي
انا .. وقلبي .. والغلا .. ساكنٍ فيـك
وانته .. وقلبك .. والغلا .. وسط ذاتي
غلاك .. مثل الحكـم عنـد المماليـك
اكبر طموحي .. لا .. كـل امنياتـي
شف في غيابـي ايّ حاجـه تسليـك
لاني بعدك .. اسلى مع (( ذكرياتي))
احـاول اذكـر .. اي شـيٍ يطريـك
"واقول هو سوا .. وانا ذي سواتـي "
كني مـوادع .. كـل شـيٍ حواليـك
وكني حسبت حساب ((حزة وفاتـي))
احب .. لاني مقدر انساك .. وآبيـك
ولا اقـدر اخليـك .. ياللـي تحاتـي
معنى احب .. وماقدر انسى واخليـك
((يعني بدونك ويـش تسـوا حياتـي؟


الـشـاعــر : حـمـدان الــمـــري