باااااااااااااااااك كيفكم؟؟ هذا الله يسلمكم امس رحت لدايركت انجلش وللمركز السعودي البريطاني قلت ابشوفهم بالمره دامي رايحة استكشف رحت اول شي لدايركت انجلش اللي بنيوهورايزن اللي مقابل مركز الأمير سلمان لقيت الدعوة شووربة لقيتهم حاطين بازار وأصلا المدخل حقهم مو كبير فتعالوا شوفوا المنظر اللي صاير انواع الحوسة واكياس وكراتين مرمية بكل مكان والموظفات اصلا ملخبطين وحووووووووسة الله لا يوريكم المهم قلت يابنت لاتدققين واجد اهم شي المضمون المهم رحت للاستقبال وقلت ابسأل عن الدورات قامت دخلتني بغرفة زجاجية فيها طاولة وكراسي >> ابوك ياالدقة بالوصف المهم قالت بتجيك المسؤولة وتفهمك على كل شي وجتني بعدها بشوي وسألتها عن الدورات اللي فيه وقالت الحين حنا مسوين عرض على الدورات اول شي احب اقولك ان المستوى الواحد مدته شهرين وسعره 2400 ان ماكنت غلطانة أو 2200 لكن لوأخذتي مستويين مره وحدة يعني لمدة أربعة أشهر راح يطلع لك بـ 4000 يعني المستوى الواحد بيطلع لك بـ 2000 وهذا العرض هالاسبوع لين الاسبوع الجاي ودوامهم يومي لمدة ساعتين قلت لها وش مدرساتكم قالت عربيات ومدرسات العمحادثة اجنبيات او انهم عربيات لكن الاكسنت قوي عندها قلت ايييييييييه عز الله كدينا خير قالت طيب انتي بالأول سوي اختبار تحديد المستوى وشوفي عن نفسك وتراه مجاني قلت لها كم مدة الاختبار قالت عشر دقايق او ربع ساعة المهم قلت لها طيب ابختبر قلت بنفسي خلني اشوف عن نفسي لا أكون بالتأسيسي بعد وربي فشيلة المهم طلعت فوق عندهم معمل الاختبار ودخلت وقلت ابسوي اختبار تحديد مستوى وجلستني عند الكمبيوتر وقالت لي كل ماتخلصين من سؤال اضغطي نكست وترى مدة الاختبار بس 15 دقيقة ويعتمد على سرعتك قلت طيب المهم بديت اختبر كان اختبارهم مو صعب كانت الاسئلة عامة ولا فيه استماع ولا شي لكن انا مااداني أخلص لأنه كان فيه داخل وطالع وازعاج مو طبيعي بالمعمل وماركزت المهم فما امداني احل خلص الوقت وانا بس حليت 20 سؤال فقلت للموظفة انه ماامداني بسبب الازعاج وجت واعتذرت وقالت طيب بعيد لك الاختبار ولا يهمك وعادت لي الاختبار وحليت بس برضو ماكفى الوقت لانه مره قصير بس حليت 50 سؤال في خلال ربع ساعة يعني معقول شوي المهم طلع لي (المستوى الثاني) طبعت لي الورقة عشان التسجيل >> مساكين يحسبون صدق بسجل المهم خذيت الورقة وطلعت لسيارتي على طووووووووووول ورحت على طووول للمركز السعودي البريطاني SBC ودخلت عندهم لقيتهم يهشون ذبان فاضين مافيه الا ثنتين من الموظفات ووحدة بس جاية تسجل المهم جيت واستفسرت بصراحة كانوا ذوووق مررره واسلوبهم راقي بالتعامل وقالت على عروضهم وقالت على المستويات اللي عندهم دوامهم يومي لمدة ساعتين وفيه دورات متنوعة وفيه دبلوم وفيه دورات محادثة المهم قلت لها انا ماابي بصراحة يومي لأني موظفة وصعب علي دوام يومي قالت هذا ممكن نناقشه مع الادارة بحكم انه فيه موظفات مايناسبهم قالت بالأول سوي تحديد مستوى وهو مجاني برضو ومدته ساعة ويشمل ( ليسننق - ريدنق - جنرال ) قلت اوكي ورحت اختبر بصراحة اختبارهم كان صعب مررررررررررررررررره بس محاكيتكم على صعوبته جبت الثالث >>> تكفين ياللي ماخذه التوفل براااا المهم قالت تفضلي عشان المجيرة تسوي معك مقابلة بالانجلش عشان تحدد مستواك طبعا انا عندي مشكلة الجرأة مااقدر اجاري شخص قوي باللغة ينعقد لساني مره بس هي تفهمت وقالت انتي من النوع اللي تفهمين وش انا اقول بس ماتقدرين تردين او تخجلين تردين خوفا من الخطأ قلت ايووووووووه عداك العيب وش دراك؟؟ ضحكت وقالت هذي منتشرة كثييييييييييير المهم قالت طيب ليش ماتبدين من المستوى الأول اللي هو تأسيسي قلت: ليش؟؟ قالت: عشان تتعلمين الاساسيات ومن هالحكي قلت لها: لا طبعا انا عندي هالأساسيات قالت طيب انتي بس شوفي الكتاب حق المستوى الأول وبعدين قرري وعطتني اشوفه لقيته كالتالي : A _ B _ C _ D _E _F و 1 -2-3-4-5-6 و nice to met you ومن هالحكي ، قلت لها : لا طبعا مايناسبني كذا أنا عندي هالأساسيات قلت لها ياعزيزتي انا طالع لي المستوى الثالث ليش تبيني ابدأ من التأسيسي؟؟ قالت: مو قصدي شي بس عشان تتقوين باللغة بس طبعاأنا لما خلصت مختبرة وقبل أقابلها كنت شايفتها تقنع اللي كانت تسجل قبلي بالمستوى التأسيسي بنفس الطريقة لكنه ماجاء ببالي فما دققت بس لما قعدت تقنعني استغربت وتذكرتها لما كانت تقنع اللي قبلي بنفس الطريقة وقلت لها ماابي كذا أنتم ماعندكم كلاسات لمستواي؟؟ قالت: هاه ..الا عندنا والتفتت على اللي موظفة الاستقبال وقالت لها: كلاسات المستوى الثالث امتلت ولا توها؟؟ ردت عليها : قالت لا مافيه الا وحدة وهذي الثانية أما المستوى الاول فيه 10 طالبة عاد تلخبطت المديرة وتفشلت عندي قلت بنفسي : اييييييييه هذي هي السالفة اجل اثرها كانت تقنعنا عشان يكتمل عدد الكلاس عشان يفتحونه موب عشان الأفضل (أجل مليان كلاس المستوى الثالث ) هههههه المهم قلت لها :طيب وش مدرساتكم؟؟ قالت :بريطانيات وكنديات وان احتدينا مررره جبنا سعوديات الاكسنت حقها قوي قلت لها: ليش هو مافيه للحين مدرسات؟؟ قالت: للحين عشانا تونا فاتحين ومن هالحكي عاد انا اول مادخلت المعهد كانت المديرة قاعدة مع وحدة كنها باكستانية وترطن معها انجليزي فقلت لها : اجل اللي كنتي تتكلمين معها وش هي مو مدرسة عندكم؟؟ قالت: لا هذي معلمة جاية عشان اسوي معها مقابلة قلت بنفسي: ( اييييه اجل بريطانيات ) قلت: طيب متى تسجيلكم انا داقة عليكم من اسبوعين وكنتم تقولون انه فيه تسجيل فقالت: انتي عطينا اسمك ورقمك واول مانبدا بالتسجيل بندق عليك قلت انا بحتري واجد؟؟ قالت لا ان شاء الله الاسبوع القادم نبدا حنا بس نحصر اسماء اللي يبون يسجلون عشان نتأكد من العدد قلت لها طيب وعطيتها وطلعت من المعهد ******************** صقيقاتي وأصققاي الأعزاء كان هذا تقريري عن رحلاتي الثلاث الاستكشافية للمعاهد ولا أدري وش رايكم ؟؟ برتش كاونسل السبت تسجيلهم الى الاربعاء ابي ردكم قبل السبت عشان اعرف وين اروح تكفون قولوا لي أروح لأي واحد منهم؟؟ ودقيت على معهد بيرلتز وقالوا ماعندهم قسم نسائي قالوا بيفتح بعد اسبوعين او ثلاثة ولا أنا والله ميتة أبيهم لأنه أفضل من برتش كاونسل بمراااحل على حسب كلام الي جربوه بالفروع الثانية بس للأسف مافيه نساء وسألت عن ELS وبرضو قالوا مافيه فرع نسائي للحين >> منبوذين حنا وربي كل شي للرجال بس المهم هذا تقريري عن رحلاتي الاستكشافية وش رايكم وين اروح بس الله يعافيكم ابي أراء من ناس مجربة وعندها علم بهم يعني مو على السمعة وبس بلييييييييييز لأني ما أبي أضيع وقتي بمكان مااستفيد منه لأني ابي لغة بأسرع مدة ممكنة بانتظار ردودكم ياحلوين *********