عهـدي بها قدام تلبس عباية
وانا بعد قبل ألبس شماغ وعقالــــــــــــــــ
طفلين نتهجى حروف الكتابة
الله يامجمل سواليف الأطفــالــــــــــــــــــ
كانت لنا في كل شارع حكاية
وكنا نقول علوم ماهيب تنقـالــــــــــــــــــ
وكـنــت أتقاسم مامعاها معاية
من (عسكريم) التوت ل(العلك) أبو ريال
وكانت بعكسي شاطرة بالقراية
تقرا جزء عم وطه والانفالــــــــــــــــــ
وانـا لـــك الله من مواري غبايه
مدري أبو نقطة هو الذال أو الدالـــــــــ
وكانـت لابــويه تشتكي من شقايه
وتعلمه كيف أربط الباب بحبالـــــــــــــ
ياماعلى ظهري كسر من عصايه
يقول لي خلك وانا أبوك رجالـــــــــــــــ
وامــي تقول: ادع لولــدك الهدايـة
خوفي يصيبه كثرة الضرب بهبالــــــــــ
لاشفــــــتـها مع أول الدرب جايه
مادري أنا اللي ملت والا الوطا مالــــــــ
أحـــس قلــبي يرتجف في حشايه
ماكنه إلا الضيف لاهز فنجالــــــــــــــــ
يامــا عن (السعلي) تخبت ورايه
لا خوفوها فيه ثم شافت ظلالـــــــــــــــ
تــقـول خـلــك يا(.........) معايه
واستانس ألعب عندها دور الأبطالــــــــ
واغااااار حتى من عيون اصدقايه
لا طالعوها قلت: (تكفووووون ياعيال)!
اش رايكم ماتذكركم القصيدة باللذي مضى.؟