هذا شيء فيني أنا كمان و بقوه ،،، حساسية و شفافيه عاليه يعني تحس بالناس بدون ما يتكلموا و مو شرط يكونو قريبين منك أو حتى تعرفهم
يامه صارت معي هاذي الحالة كثير و معروفه جداً في عائلتي و بعض الناس اللي يعرفوني بهاذي الصفه
حدث صغير ... قبل ما بابتي يتعب و يمرض قبل 9 سنوات في نفس الشهر اللي طاح فيه كنت بذاكر و فجأة كذا شفت مثل أحلام اليقظه و شفت بابتي بهيئة غريبه ( تعبان و مريض و جسمه نحيل مرررة و قاعد عند باب البيت و كأنه عاجز عن الحركة أنه يروح و يجي براحته ) طبعاً كانت هيئته بالنسبه ليه وقتها مفجعه و قمت و رحت له غرفته و بكيت مرررة لأنه وقتها كانت صحته كويسه و منتظم في دوامه و الشي اللي شفته كان يوم الأحد العصر و بنفس الأسبوع يوم الثلاثاء الظهر دقو علينا ( الشركة اللي كان يشتغل فيها أبوي ) و قالو لنا أبوكم تعبان و طاح و هو ألحين في المستشفى الفلانية و كانت هاذي بداية تعب أبوي و مرضه و على طول خلال شهرين عملو له تقاعد إجباري مبكر ...
بالأضافه أنه ما شاء الله حسي قوي جداً قلبي يحس بالأشياء و عندي مهارة عالية في تفسير الأحلام و ما أحب أتكلم و أقول لأنه التفسير بيكون نابع من إحساس جواية و أنا بسمع الشخص اللي بيحكي لي الحلم و كثير تحقق منها بنسبه تقديريه تتجاوز الـ 80%
و أحياناً : أحس بالجن و أشوفهم ..... لا تستغربوا ولا تنفجعوا ... بس بجد يعني مثلاً لو كنا قاعدين بمجلس و دخل لاسمح الله جني ممكن كثير إني أحس فيه و الكل يلاحظ علي إني أنتبهت لشي بس ماحد عارف أنا أنتبهت لإيش أو أش هوه الشيء اللي لفت نظري ... وهذا الموقف بتعرض فيه كثير للإحراج
أنا أول مرة أقول هاذا الشيء و كنت أخاف أقول و أتكلم باللي أشوفه لأني أخاف إني أدخل في التكهن و علم الغيب و لا أحب أدعي بأشياء خرافيه بس أنا بخاف إني أفقد ثقة الناس بيه إذا تكلمت بهاذي الأشياء أو أحد يحسب إني أبغى ألفت الأنتباهـ ليه و أثير جدل ماله داعي
ألله يسلم إيدينك ع الموضوع الجريئ الرائع