مدخل ..
تقول فيروز 
:
اسامينا شو تعبو اهالينا تلائوها وشو افتكرو فينا
الاسامي كلام شو خص الكلام عينينا هني اسامينا ..
يقال : الأسماء قوالب للمعاني ..
نعبر عن أسامينا ولا تعبر عنا ؟! .. ندل عليها ولا تدل علينا ؟!
الأكيد انه كلن له نصيب من اسمه ..
في نظريه عامه ان كل مولود يجي واسمه معه .. وهذي يمكن حجه لسوء التسميه احيانا .
في الإسلام تعتبر التسميه من اول حقوق المولود على والديه , ومن ابسط حقوقه يكون الاسم حسن النطق والمعنى .
وتغييرالنبي صلى الله عليه وسلم اسم اكثر من صحابي بعد الإسلام فيه حث على اختيار الحسن من الاسماء .
يقول الرّسول صلّى الله عليه وسلّم :
{ إنّكم تدعون يوم القيامة بأسمائكم وأسماء آبائكم , ألا فأحسنوا أسمائكم }
..
تاثير الأسماء في حياة اصحابها ومن حولهم يتعدى المفهوم العادي لمجرد التسميه ..
,, يبدا باالدلاله عليهم ويمر بنفسياتهم وينتهي عند طبع معناه عليهم وعلى حياتهم ,,
بعض الأسماء تكون سبب مباشر في فشل أصحابها , كونها تولد الإكتئاب والنفسيه السيئه والانطواء وبالتالي الفشل ..
طالبه كانت معنا ايام الدراسه كانت ماترفع يدها تشارك ابد ويتلون وجهها مية لون لاحد سالها وش اسمك[IMG]http://msa6el.com/vb/images/smilies/i****.gif[/IMG] .. هالنوع نقدر نقول ان الاهل ظلموهم لو من دون قصد _ مع ان الغرابه مو شرط لسوء الاسم لكنه يشاركه العقده _ كان اسمها (نوظه) ومعناه من التلألؤ , يعني عقدتها كانت من غرابته مو سوءه
.
,, وتعطي الأسماء اول انطباع للي حولهم عند التعرف عليهم ,,
تكون جالس مع اخوياك لالك ولا عليك يجيك خويك معه ولد عمه تقومون تسلمون عليه حظك يخليك الاول يقولك هذا ولد عمي خنيفر !!
ممكن : تقول حياك الله وتسلم عادي ولاتعداك تلتفت وتاشر دليل غرابة الاسم . [IMG]http://msa6el.com/vb/images/smilies/i****.gif[/IMG]
وممكن : ماتمسك نفسك وتفقعها ضحك وتحرجه وتحرج نفسك وتحرج خويك .
وممكن :تقول هاه وتخليه يعيده كم مره ولاجلس تصير بثر وتقول وش هالاسم وليه سموك كذا ووش معناه !! 
بعد سماع الاسم اول مره بتقول في نفسك هالخنيفر اكيد طعس مع انه ممكن جدن يكون كول ومتحضر وكل شي بس راح غلطه شايب ..
جالس مع الشيّاب ولا يجي ولدك يقول ابشرك يايبه جاني ولد مايمدي الشايب يستانس بالحفيد الا ناط شايبن غثيث يقول طلبتك اسمه يابو فلان .. يقول الشايب جاك .. يقول الغثيث تراه جعيثن
هذا يدل ان الاسماء مثل ماتدل بس على الانسان تدل على اهله من ناحية البيئه والثقافه والحاله النفسيه وقت ولادته ..
كم واحد بعصر سميره توفيق زمان سمى بنته سميره وينطقونها بالكسره بعد 
,,و تختلف مفاهيم الناس عند اختيار الاسم حسب عقلياتهم ,,
* نوعيه تهتم بالاسماء الي لها تاريخ , الانبياء والصحابه والصالحين , أو الي اشتهر اكثر اصحابها بالشجاعه او الكرم والقوه .. الخ
مثل الاكثر شيوعا طبعا محمد اسم خير البشر عليه الصلاة والسلام .
واسم عبدالعزيز : الملك عبد العزيز , عبدالعزيز بن باز , عبدالعزيز بن صالح , عبدالعزيز بن فهد 
.
و اسم متعب : المنتشر بشكل مو صاحي عند ربع الحرس خصوصا 
عشان متعب بن عبدالله .
ولو مرينا القبايل .. بنقول العتبان واسم تركي عشان تركي بن حميد .
والعجمان واسم راكان عشان راكان بن حثلين .. ولو طلعنا من السعوديه بنقول ثلاث ارباع الاماراتين زايد .
* ونوعيه ثانيه تحرص على المعنى لدرجه تغير نظرتك لكثير من الأسماء الدارجه لو سمعت كلامها .
مثل نفورهم اسم تركي لانه يعني انه من الاتراك ويعتبرونها كانك تسمي ولدك الماني .
واسم بندر لان معناه مدينه ساحليه .. واكيد محد سمى ولده وهو قاصد هالمعنى .
* اما النوعيه الي تدور الغريب او الجديد من الأسماء فهذا دلاله عجيبه على عقول بعض البشر ..
قال تعالى : ( لم نجعل له من قبل سميا ) - مريم 7 - ، قال القرطبي رحمه الله تعالى :
( وفي هذه الآية دليل وشاهد على أن الأسامي الجميلة - جديرة بالأثرة) .
الجديره مو الغريبه والسلام
بعض الناس عنده نظريه اني بسمي اسم محد سماه .. بغض النظر عن المعنى او النطق ويطلع الاسم مدري وش يبي من الحياه !! 
تجي تبارك : مبروك ماجاكم يام فلان سمويتوها ولا للحين؟ <- يقالها ماتدري انهم سموها بس عشان بتقول رايها بالاسم .
تقول ام فلان 
: سميناها جنّار
ترد عليها : وه وش ذا الاسم (تعفج وجهها) كانه جن ونار !!
تقول ام فلان والعيون تلمع كنها جايبه راس كليب
: معناه حجر كريم بالفارسي .
انطلاقا من دلاخة بعض الناس نقول انه حبذا يكون الاسم عربي لانه يعتبر من اداب التسميه في الاسلام .
وبشطفه سريعه لعالم النت .. لان التعارف فيه بالعاده يكون بالاسم قبل الشكل ..
تكلمه بالجوال يرحب ويهلي يعني باين انه رجال عليه العلم , تقول وش اسمك ياليوزر الفلاني يقول شادي .. لاشعوريا بتقول افا ليه .. يقولك الضعيّف ان اهله كانوا يسمعون بالتحضّر ..
يعني بعض الأسماء نكبه لراعيها يجيك رجال مشورب ولد حمايل يقولك اسمي هاني !! _ ويرقعها بابوسالم _
ولابنوته كيوت وش زينها تقولها وش اسمك تقول جفره _ وترقعها بجوجو _
هذا والأسامي ببلاش , ولاحظوا اننا نتكلم عن الشباب والعلاقات بالمجتمع بشكل عام لاننا لو ناقشنا المعاناه من البدايه أو دخلنا بمسيرة الدراسه ماتوقع موضوع بيكفي .
* مع ذلك في ناس تكون السبب بشهرة اسمها .. مثل حاتم الطائي .. بسببه صار اسم حاتم دلاله على الكرم رغم ان معناه اسم من اسماء الغراب ..
* وناس ثانيه تكون السبب في قبول اسمها الغير مقبول .. مثل ضيدان بن قضعان .. الاسم مقبول جدا عشان راعيه شاعر شعبيته واسعه .. ومثله فالح بن قشعم .
* وناس تشتهر بسبة اسمها ولا مافي سبب زود يشهرها .. مثل مخرج الاوبريت فالتلفزيون السعودي فطيس بقنه مامر علي اسمه الا مره وللحين عالق براسي .
.........
مخرج ..
مجموعة بنات يسولفون .. انطرح سؤال : وش احلى اسم عندك ؟
كل وحده طلعت باسم .. قالت وحده فيصل
.. سألتها صديقتها بخبث : فيه احد معين ولا بس بشكل عام
قالت لا بشكل عام .. قالت : اكييد ؟! .. ردت : إيه ..
قالت : اجل عساك لحادث يافيصل !! .. انفجعت المسكينه وردت بسرعه استغفري لاتدعين علييييه
ضحكوا البنات وصارت هي
[IMG]http://msa6el.com/vb/images/smilies/i****.gif[/IMG] .. ان كيدهن عظيم
.
.
اسماءكم .. معاناتكم معها .. تاثيرها .. اغرب مامر منها .. ذكرياتكم مع الاسماء .. لكم المايك .
.
.
.
.
من اجمل ما قرات وحبيت انقله لكم دمتم بود^_^اشواقي 