القصيده معبره عن حياتنا الشقيه بمعنى الكلمه واتمنى ان تعجبكم واليكم ابياتها
(عسكريم التوت)
خبري بها قدام تلبس عبايــــــــــــــــــــــة
وأنا بعد .. قبل البس شماغ وعقال
طفلين نـتهجا حروف البدايــــــــــــــــة
الله يــ مجمل سواليف الأطفـــــــال
كانت لنا في كل شارع حكايه
وكنا نقول أعلوم ماهيب تنقـــــــــــــال
وكنت أتقاسم ما معاها معايــــــــــــــه
من عسكريم التوت لــــ ألعلك أبو ريال
وكانت بعكسي شاطره في القرايه
تقراء جزء عـــــــــــم وطه والأنفــــــــــــال
وأنا لك الله من مواري غبايــــــــــــــــــــــــــه
مدري أبو نقطـــــــــــة هو الذال أو دال
ياما لبويه تشتكي من شقايــــــــــــــه
وتعلمه كيف أربط الباب بحبــــــــال
ياما على ظهري كسر من عصايه
ويقول لي خلك وأنا أبوك رجــــــــــــــــــال
وأمي تقول ادع لولدك الهدايـــــــــــــــــه
خوفي تصيبه كثرة الضرب بهبال
ياما عن السعلي تخبت ورايـــــــــــــــه
وأنا امثل عنــــــدها دور الأبطـــــــــــــــــال
وآآآغار حتى من عيون أصدقايه
لا طالعوها قلت (تكفون يا عيــــــال)