بسم الله والصلاة والسلام على رسول الله

السـلام عليـكم

اليوم جآيب لكم وجبه دسمه من حي أمن السفارات بالرياض .....
السآلفه ومافيها ياأخوان إني مريت على حي السفارات ولقيت
عسكر يحبهم قلبـك ماشاء الله عليهم سآلتهم تقريبا عن كل شيء
والشباب عسل مآقصرو معي ردو على كل أستفساراتي الله يجزاهم خير

المهم بعلمكم من طق طق لـ السلام عليكم
اول مادخلت حي السفارات لقيت هالشباب , السلام عليكم وعليكم السلام كيف حالكم بخير الحمدلله , قلت لهم ياشباب قدمنا على دوره إسمها امن السفارات عريف ووكيل رقيب وأنا جايكم اليوم ابي اعرف عنها كل شيء قالو ابشر. طبعاً هم أمن سفارات واحد منهم جندي والثاني عريف ولبسهم مثل لبس الشرطي يعني مآفيه فرق البدله نفسها قلت لهم علموني عن كل شيء قلت اول شيء كم الدورهـ قال لي الدورهـ إذا هي أمن سفارات 6 شهور راح تكون في مدينه التدريب بالرياض ثمن تكلم عن الدورهـ قال امن السفارات طالبه عدد يوصل الى 900 راح يتوزعون داخل حي السفارات . ثمن سألته وش طبيعة العمل ؟ قال لي تستلم 6 ساعات وتسلم 24 ساعه ( يعني استلامات ) قلت له الدورهـ طالبين عريف ووكيل رقيب عشآن يحطونهم إستلامات ؟ وين المكآتب؟ قال لي عمل مكآتب موجود في حي السفارات لكن يقول أمن السفارات محتاجه أفراد إستلامات عشآن يكون الاستلام 6 ساعات وتسلم يومين أو اكثر وفي هذي الحاله تزيد الورديه ويصير الدوام راحه << بديت أرتاح يوم قال كذ1
وسآلته عن سؤال يدور في المنتدى هنا اللي هو هل أمن السفارات قطاع مستحدث يعني جديد؟؟ قال لا القطاع له 15 سنه . قلت له طيب هل المبنى بيتغير يعني نآوين يعملون مبنى جديد كبير؟ قال حتى لو عملو مبنى جديد إحنا هنا محتاجين ورديآت يعني كآنه يلمح ويقول ترى الدوام سلم وإستلم
واللي بيصير على مكتب محظوظ ولا واسطه < مآقالها لكن فهمتها كذا
بخصوص الـ 6 ساعات العمل هذي راح تكون في كل دوريه شخصين شخص في السياره وشخص واقف على البوابات << اشوى إن فيه مضله فوقه خخخ . ساعه توقف وساعه تريح في السياره والوعد إذا خلص الدوام
يعني ثلاث ساعات واقف ثلاث ساعات تريح

وبعدين طمرنا لموضوع ثاني اللي هو سؤال شفته هنا في المنتدى وصار عليه نقاش كثير جبت لكم العلم الأكيد والله وحده أعلى وأعلم
السؤال هو هل يقدر العسكري في أمن السفارات يطلع برى السعوديه يعني يصير تبع سفارة خآرج المملكه ؟؟ قال لي كلام لأزم نحطه في عين الاعتبار اللي هو طبعاً أنا مآفهمت شيء لكن سويت نفسي فآهم عشآن أخلي الرجال يكمل كلامه قآلي الأن الوضع تبع أمن السفارات هو أن أمن السفارات تابِعه للشرطه ومن ثم للوزاره الداخليه والحين يقول إن فيه مساعي أن تكون أمن السفارات تأبعه للطورائ والوزاره الداخليه يقول الموضوع هذا راح يكون في 1/7 أو 1/8 بالكثير يعني إن شاء الله إذا دخلنا دورتنا وخلصناهآ (اللهم أجعلنا من المقبولين وآخواني المتقدمين) نصير تآبعين للطورائ على طول مآلنا دخل في الشرطه وفي هذي الحاله نقدر نتعين خآرج المملكه << يتخيل نفسه خآرج المملكه < يسمعون بالدوام الدوام لله خخخ
أتمنى إن الصوره وضحت بخصوص التعيين خآرج المملكه فيه شيء مهم بعد قبل لاأنساه اللي هو مآيطلع خآرج المملكه إلا المتزوجين هذا شرط من الشروط الباقي مآذكرها لي شيء ثآني الراتب هنآك يعني في خآرج المملكه راح يكون كالتالي : الراتب الاساسي والبدلات ويعطونك زيآده اللي هي راتبك الاساسي أتمنى تكون واضحه الصوره

نطمر لموضوع ثآني اللي هو أهم موضوع << خخخ
حب الوطن < أقول هها بس
أقصد حب الفلوس
الراتب يآ أخوان راح يكون على كالتالي :
أساسي العريف 3100 مع البدلات للفني 6200 ولغير الفني 5800
أساسي وكيل رقيب 3270 مع البدلات للفني 6370 لغير الفني 5970
نطمر لموضوع ثآلث اللي هو الترقيآت :
قالي بالحرف الواحد لاتخاف على الترقيات الأمور زينه

خلصنا من الامور الايجابيه


بآقي الاستفسارت السلبيه وإن شاء الله مآراح تكون عآيق لا لي ولا لكم

أول شيء قآل لي وضيق صدري قآل بشكل عآم ترى أمن السفارات إنحش عنها !! قلت له ليش قآل مشكلتها إذا بغيت تنقل يقول على لسآن العسكري اللي اسولف معه يقول أنا من أهل الخفجي وتعينت هنا في الرياض يقول لي خمس سنوات مآلقيت نقل << تهيء تهيء ضيق صدري الصدق
يقول كلما لقيت واحد يبي الرياض يقول إذا درى إني أمن السفارات مآيبي ينقل عليها << ملخص اللي قآله الاخ إن النقل من منطقه لمنطقه ترى الموضوع صعب شوي وعلى كلامه يبي له واسطه جآمده يعني إذا تعرف لك حآرس أمن في الفيصليه بينفعك << خخخخ

بخصوص الارقام مآيعرفون عنها شيء ولا أعرف عنها شيء

وبعدين ياشباب الرياض لي عتـب عليكم اللحين السفارات يعتبر في وسط الرياض ومدينة التدريب في طرف الرياض ورى مآتدق سلف أنت ويآه وتسألون يآمال الشحم < عصب خخخ
وفي النهآيه أتمنى إني مآنسيت شيء وإني قلت كل شيء أعرفه
واللي عنده سؤال يسأل يمكن إني نسيت شيء وأذكره

اللهم وفقنا لما تحب يارب العآلمين وترضى

في النهآيه أسأل الله العظيم إن يوفقني وإياكم للدخول في الدورهـ

أخوكم خالد الدوسري