دمتم جميع واسعدكم الله اعضاء وزوار
الكل منا له صاحب مزعله والبعض منا من صاحبه زعلان هذي قصيد تبين قيمه الصاحب اللي يشدك لاضاقت بك الدنيا
نزعل ونتكبر وحنا من الطين
والكل منا يصد لا اقبل خويه
نفخر نقول احنا على الصد قاوين
وهي علينا في الحقيقه قويه
ننسى نهايتنا وعلى وين ماشين
وننسى الزمان اللي جمعنا سويه
المشكله ماهي بحاجه لتخمين
ولاهي ياناس صعبه هذي القضيه
دق الرقم كيفك هلا فيك واهلين
انا الخوي اللي مزعل خويه
تغيب وصورتك في داخل العين
ويبقى لحبك في خفوقي بقيه
اخوان احنا لويجي بيننا شين
وماتفترق دام المحبه نديه
خلك قوي لاتحتكرك الشياطين
قبل الفوات وقبل وقت المنيه
هاذي هي الدنيا من الحين للحين
لابد بين الناس تحصل خطيه
ومن لايقدر غلطة احبابه الحين
يقرا حروفي ويعتبرها هديه
باكرتمر سنين وسنين وسنين
والكل يرحل في الدروب المديه
صدقني تندم واذكر حروفنا زين
تندم على خلك اذا غاب ضيه
دنيا غريبه واكثر الناس ماشين
وكم صاحب والله دفنته بيديه