ماشاء الله
الله يوفقك ويفتحها في وجهك يارب
أخوي الافكـار كثيرة ، وخصوصاً الاشياء اللي فيها [ تقنية ]
تحس ان الابداع فيها بلا نهاية ، او بالاصح للابداع بقية
اعجبتني كثير تصاميم البرشورات ، واعتبره بداية ممتازه وموفقة
بإمكانك اخوي في هالفترة اللي حنا فيها [ الصيفية ] انك توزع
البرشورات ع المراكز الصيفية ، وعاد خبرك بالسويدي كثيرة المراكز هناك
طبعاً بالتنسيق مع ادارة المركز ، مثلا تخفيض 10% لطلاب المراكز
بتكون فكرة مثمرة باذن الله 
أيضاً اخوي ليه ما يكون لك
تعاون مع احد المنتديات السعودية
وخاصه الموجهه لأهل الرياض
مو شرط كبيرة ، عادي لو تكون متوسطة
بحيث انك تسوي معاهم تبادل اعلاني ..
واقصد فيه انك لما تسوي فورمات لأحد العملاء عندك
تحط في المفضلة عنده الموقع اللي انت متفق معه على التبادل
وهو يحط لك بنر + صفحة خاصه فيك في منتداه
وفيها اعلانات لمحلك والجديد اللي فيه ، وممكن اخوي اصمم لك الصفحات او البنرات
وبكذا انت بتستفيد وهو بيستفيد وايضا صاحب الجهاز بيستفيد بع ـد انه تعرف على موقع حلو
وحاول انك تختار موقع مافيه لا قسم للفن ولا خرابيطهم 
!
أيضا من خلال تجربتي مع الفورمات ، يعجبني المحل
اللي يحط لك برامج قووية وحلوه ، ويضبط لك الجهاز
وانت مرتاح ، بمعنى انك تشوف الاغلبيه وش يستخدمون من برامج
ياخي فيه بع ـض المحلات يحط لك برنامج [ الاوفيس ] ويمن عليك فيه !
حاول تحط مثلا ماسنجر ، بال توك ، متصفحات غير الاكسبلورر ، برامج حماية
الاوفيس ، فوتوشوب ، فلاش ، سويتش ماكس ، سينما فور دي ... وطبعا هالبرامج
تكون في الفاتورة بحيث ان البرنامج اللي يبيه العميل يحط عليه صح
وبكذا بتكسبهم ان شاء الله
ولي عوده ان شاء الله بالمزيد من الافكار ..