الله يفرج كربتك ويزيل عنك الهم والغم
تعوذي من الشيطان ياأختي .. اذكري الله لاتدعين على نفسك
ماخطر ببالك يمكن يجي اليوم اللي تكون لحياتك قيمة عندك وعند ناس غيرك ؟
ماخطر ببالك انك مهمة عند ناس وموتك بيذبحهم ؟
أمك أبوك أخوانك واللي يحبونك .. وش ذنبهم تدعين ان ربي يحرمهم منك ..
طبعا الاعمار بيد الله لكن مجرد فكرة انك تروحين عن اهلك فيه عذاب لهم
ادعي ان ربي يحفظك لهم ويحفظهم لك وان ربي ييسر رزقك من مال وزوج وعيال وصحة وطاعة
ادعي ليل نهار لا تيأسي .. تفائلي حتى لو الدنيا سودة بوجهك
سوي مثلي .. كنت اسمعهم يقولون اضحك للدنيا تضحك لك .. وكبرت على هالكلام ومحد يشوفني الا مبتسمة
صحيح اني كل مااضحك تتفل بوجهي ههههههه بس وش اسوي عاد هذي الحقيقة المرة اللي لازم مانعترف فيها
لازم نستمر بالوهم اضحك للدنيا ..
لكن لازم نكون اقوياء وماننسى حديث الرسول عليه الصلاة والسلام (تفاؤلوا خيرا تجدوه) تفائلي ياحبيبتي الله يجيب لك ماتفائلتي به لحد رجليك يجره جر لك مثل ماجر الله سبحانه احمد بن حنبل للخباز
ادعي واستغفري وتصدقي وعيني وعاوني وصلي وانا اعرف انك مصلية وتخافين ربك والدليل انك عاطلة وهذا ورد في كلامك وانما اصدقك بقوة والسبب اني مريت بنفس مامريت فيه .. عرض علي عمل براتب خمسة آلاف في شركة مرموقة لشخصية مرموقة وبعد ثلاثة شهور ترقية ضعف الراتب تخيلوا .. طبعا تبون تعرفون وش الثمن .. الثمن اني اكشف وجهي وانا عالمكتب يعني استقبل العملاء بوجه مكشوف وحاطة ميك اب ومطلعة جزء من الشعر من الامام لاني يوم اعترضت قلت مابي اكشف قالوا خلاص طيب حطي شيلة على الشعر لكن الجزء الامامي مكشوف .. اما الملابس بنصرف لك ملابس ماركة عشان يتماشى الستايل مع رقي الشركة هههههه طبعا رفضت .. قالت لي صديقتي صلي الاستخارة .. قلت لها اصلي الاستخارة على وش ؟!!! على شي مفروغ منه مايختلف على حرمته اثنين يخافون ربهم ؟ طبعا كانت النتيجة اين لحد الحين عاطلة بدون عمل لكن موب مشكلة اهم شي ماطيحت راس اهلي بالارض .. مع العلم انهم ماكان احد راح يعرف بالموضوع يعني فيه قسم نسائي اصلا وقالوا اذا جا احد من اهلك بتكونين هناك تدخلين على القسم من باب لكن فاتهم ان الاهم منهم هو اله سبحانه .. الله يثبتك ياأختي على دينك وأخلاقك ويفرح قلبك بالوظيفة وقبلها الزوج اللي يغنيك عنها طول العمر يعزك و يرزك اللهم آمين
لا تيأسين ماتدرين يمكن خيرة وابتلاء من الله لاختبار صبرك يبي يشوف قوة ايمانك .. بعد ماتقرأين كلماتي أسألك بالله تصلين ركعتين تتوبين فيها توبة نصوحة من قولة جعلي أموت وأبي أموت .. حياتك غالية عند غيرك الله يقسم لك الصالح من خلقه والذرية الصالحة وتعرفين وقتها ان حياتك غالية ماتبين تفوتك ساعة منها .. ولا تنسي (ان مع العسر يسرا ، ان مع العسر يسرا) واذا حبيت تقولين لي اي كلام عالخاص تفضلي وان حبيت تتعرفين علي وتكسبين اخت وصديقة حياك ربي أنا مستعدة اكون لك الصديقة لكن موب مثل صديقة المصلحة الله يصلحها بس