السلام عليكم ورحمة الله وبركاته

والله اني انبسطت لما شفت منتدى يهتم بالبطالة وكل شي عنها والوظايف في القطاع الحكومي والخاص

لكن انا جاية وبكتب لكم قصتي من البداية للنهاية وشدة الأعصاب وياليت تجيبوا كاسة ماء باردة جنبكم

انا نور العين من جده تخرجت من جامعة الملك عبدالعزيز في فبراير سنة 2006م من كلية العلوم قسم الكيمياالحيوية ومعدل كويس جدا

وبدينا يلا ندور بالوظايف وانا فضلت اني اشتغل بالمختبرات والمعامل الطبية وفعلا لقيت مستشفى خاص واشتغل بالمختبر وراتب 2000 ريال (تخيلوا سعودية بالفين)
قلت مو مشكلة ومافي بدلاااات رغم انه المستشفى بعيدة جدا بجنوب جده وحواريها (مشوار 40دقيقة عالأقل)عن بيتي بس لما شفت مساندة والدي ليا قلت مو مشكلة وبديت فيها
وفعلا مدير المختبر ياسلااام عليه عصبي ومش مسلم بس والله وللأمانة علمني كل شي من الى كان صح يكره اني اروح اسيب الشغل عشان اصلي واني اصلي بغرف المختبر (لأن المستشفى مافيها استراحة نساء خاصة ؟؟كل البنات اللي بيها مشعترين في كل مكان ) وكان دايما يقلي انا اهم شي اني اعلمك وادربك لأني ابغاكي تكوني سوبر فايزر
المشكلة في دا المكان اني بشتغل وسط شلة مصاروة حاقدين وفي اتنين هنود زي العسل من اول يوم جيت فيه العيون تلاحق وقد ايش حتقعدي هنا وانتي تدريب ولاتوظيف واسئلة مالها داعي واستخفاف بينا احنا السعوديين قلنا معليش واستحملنا
وكان في وحدة يمنية (سكرتيرة طبية)الله لا يوفقها ولايحللها ولايكتب لها خير خبيثة جدا وحاقدة هيه التانية انو سعوديات جايين والله انها اخس من الرجال (عايدي حريم )
المهم استحملنا ورضينا بالهم لكن الهم مارضي بينا ! مايهم العداوات اللي شايلينها عليا من اول يوم المصيبة الأكبر ارتكاب الأخطاء ومن ثم الصاق التهم بيا
اي لخبطة في نتايج مريض تعالي يافلااانة انتي سويتي لاعاد تمسكي ولا تعملي الا تحت اشرافي ومدري ايش (والله كاني طفل صغير يخاصموني )
كنت كل يوم ابكي قبل ما اروح دوامي ابكي بكاء حار

لما اشتغلت كان معايا وحدة صحبتي من ايام الجامعة سابت الشغل بعد شهر و6 ايام بالضبط ماقدرت تستحمل (فتخيلوا وضعي اني اكون حمل وديع وسط الذئاب )

احكيلكم عاليمنية شي فظيع ماسابت صغير ولا كبير ذكرا ام انثى الا وسوت مشاكل السما والأرض ..والمر انها ليش تكرهني لأن كان عندي اشغال كثير اسويها (تحاليل لمرضى) والأخت تبغاني اساعدها بورق ..من طيب اصلي ساعدتها شوية وسبت الباقي تكمله رغم ان بيننا مشاكل لكن اللي ماتستحي ما يثمر فيها وراحت تشتكيني لمدير المختبر وتتبلى عليا بكلام فظيع واني اسبها واقلها كلام حقير ما اقدر اقوووله وانتشر الكلام بين العاملين والمستشفى كلها
حتى المدير العام يحسبني اني قليلة ادب واتكلم بكلام بذئ وسوقي
بس مدير المختبر(الهندي البوذي) الحمدلله انه ماصدقها وقالي يا .... انا عارف انك تعاني وكلنا نعاني لكن اللي ابغاكي تعرفيه ان اللي يحاول يؤذيكي لا تجاريه لأنه لو جاريتيه فكأنك تساعديه (يعني بالعربي اذا نطق السفيه فلا تجبه )
المهم حطيت دا الشي باعتباري

كان لي زميلة سعودية لها تشتغل قبلي سنة تخيلوا معاملتها ليا اتغيرت تحسبني مثل ما قالولها وكنت احيانا بوقت العمل تجيني يا نور (تراه مو اسمي الحقيقي) انتي قلتي عليا كدا وكل شويتين تجي تسالني ؟ قلت يا ويلي اشبها دي البنت عليا طلع الاخوة المصريين واليمنية كل يوم يطلعوا محشات واني اقولها عليها تخيلوا عيال الايه
والله لما عرفت اقسم بالله اني انهبلت ورحت لها وصارحتها و وضحت لها كل شي وقلت لها مصير الأيام توريكي

وكان في واحد مصري فرعون دبوووس سوووسة هادا الرجال الكريه كان نفسي احرقه بولاعة من كتر كرهي له لأنه كبيرهم الذي علمهم السحر (ما حأدخل لكم في التفاصيل ) بس كل اللي اقوله لكم انه هادا الشخص تخيلوا يجيب زملاؤه من العمالة ويعملهم فحوصات ويكونوا احيانا مصابين سواءا بكبد وبائي ويمشيلهم هيه ما يبلغ عنها لوزارة الصحة انا عرفت عن دا اشلي بعد مضي فترة من وجودي وكلمت المدير (الحمدلله انه سعودي ابن حلال)وقالي انتي بس جيبيلي دليل

كانه المصري عرف وخفف وصار مايسوي دي الأشياء قدامي

كانت امي تنصحني بالدعاء والاستغفار وان الله يجعل بأسهم بينهم شديد واني اكون صريحة وقوية الشخصية وما اخاف في الحق لومة لائم

وفعلا صقلت شخصيتي صرت ما اتكلم الا في الألزم من اللزوم في وقت استراحتي اروح اقرأ كتاب علاقتي فقط بمدير المختبر والسوبر فايزر (واحد هندي طيب مو زي الفرعوني الخبيث )

واللي يغلط عليا نظراتي حادة وكلها كلمة وحدة احترم نفسك وخليك في حالك والا انتقامي شديد

والفرعوني الخبيث ادبته وخليته لما امر يخلي عينه بالأرض ورفعت عليه شكوى للمدير العام

وفعلا كلها شهرين وزي الكلاب يتصاقعوا في بعض ويتمشكلوا مع البعض وصارت البنت الطيبة حبيبتهم اللي واضحة وماعندها لف ودوران هيه نووور ياسبحان الله

واليمنية انتقلت للعمل بقسم تاني والكل ارتاح من وجهها

وصار كل واحد يجي يفضفض عندي وانتي طيبة وانتي كويسة (سبحاااانه)
بس برضو كنت حريصة وانتبه من الحقد

وبعدها حصلت مشكلة كبيرة جدا بسبب لخبطة من واحد مصري وحاول يلصقها بزميلتي السعودية اللي ماعندها حسن التصرف والمدير عاقب الكل وبسبب اني مظلومة اضربت عن العمل انا وزميلتي السعودية اجي اتونس واضحك واذاكر وما اشيل قشة واقلب الباب

الين حصلت احداث ما رح ادخل فيها ومشاكل حسيت انه بيطقلي عرق ونقلني المدير الى فرع المستشفى الثاني واللي يبعد عن بيتي مسافة ربع ساعة فقط

وقبل ما امشي جاني الفرعوني الكريه وحذرني اني انتقل هناك قالي ترى الوضع سئ قالي ماحد حيعلمك ولا حتدربي عالشغل مظبوط قلت له مو مشكلة انا اصلا متعلمة جاهز ما احتاج احد يعلمني

وانتقلت وليتني ما انتقلت وليتني مادخلت دي المستشفى من الأساس

المستشفى دي منظر بس لكن ما ادراك ما بالداخل

اولا مدير المختبر حسبي الله عليه لما التقيت بيه قالي انا عندي ضغط كبير في المرضى ابغاكي تمسكي قسم استقبال المختبر والتحاليل لفترة بس الين يجوني موظفين زيادة

وافقت لأنه بصراحة الناس اللي تشتغل هناك طيبين جدا واخلاقهم روعة وفعلا مارح احصل زيهم ومنها اكمل خبرتي اللي احتاجها عشان امتحان الرخصة الطبية

بديت العمل بالاستقبال واخذ العينات (حسبته قسم مرتب زي المستشفى اللي كنت فيها احسبه شي سهل ) من اول يوم فوضى فظيعة ومافي سكرتارية تنظم الورق ولا شي ومافي كمبيوتر ويتعاملوا كله مانولي (يعني باليد) قلت يا سلاااام طبعا اجانب مايعرف الكلمات العربية فلما يجيهم طلب باسم محمود مهند كلها تنكتب محمد لخبطة بالأسماء والسجلاااات وارقام الملفات وغيره انا اتجننت قلت لهم على حلول تطويرية قالولي دا كله مو عندنا ياسلاااام وقد ما نطلب ما يسوووه لنا

استحملت وصبرت والشغل ضغط فظيع فعلا مافي وقت انه اي احد يتضارب مع احد ودي ميزة حلوة
تخيلوا كنا 4 اشخاص (انا ورجالين وزميلة ليا جات معايا )نمسك الشغل من كثره بعد فترة تقلص العدد الى 3 وبعدها 2 (انا وزميلتي ) فجاة مرت الأيام والشهور حوالي 4 شهور وانا محلك سر ؟؟؟؟؟؟؟؟؟؟
دخلت لمدير المختبر وقلت له انا متخرجة بكالوريوس وعندي خطاب من مدير المختبر السابق اللي اشتغلت معاه وعندي دورات ومؤتمرات وانتا حاطني في مكان سئ لازم تعدلي وضعي ...صار يتلككلي ويقلي انا ما منعتك من الشغل بالمختبر وانك تستفيدي وتاخدي خبرة انتي خلصي شغلك في الاستقبال وتعالي (يضحك عليا كيف انا اخلص شغلي واجي استفيد وانا الشغل عندي ما يخلص )
المهم ما استفدت منه بشي لكني كنت حريصة اني ادور على فرص تانية وقلت استحمل الين تجيني فرصة افضل
لقيت معيدة بجامعة المدينة لكن بدون سكن وصعب عليا اني اسكن لوحدي واهلي ما وافقوا فصرفت نظر عن الموضوع
جاتني بعثة اهلي ما وافقوا وبرضو بسبب انه صعب اروح لوحدي
والمشكلة انه اهلي مو فاهمين الوضع اللي انا فيه
يقوليلي عندك وظيفة وبتشتغلي اش تبغي كمان المشكلة اني انا مرتبتي اخصائية مختبر وبشتغل شغلة ماهي شغلتي ومو بخبرتي وشي صعب مو على قد الراتب 2000 ريال انا ماعليا من الراتب قد ما اني استفيد فعلا واشتغل بتخصصي الين ربي يسهلي الأفضل

وكمان ازيدكم من الشعر بيت دي المستشفى يجووها كمية ناس فقراء من ناحية الخلق والأدب ومتنعنصرين يعني لو شاف بنت مايحط في باله انها متعلمة وبنت ناس وانها سعودية وانها بتشتغل هنا لأنها مالقت حكومي ...اهانات اشكال والوان واشياء ما اقدر اوصفها والله ماتوقعت انو الشعب السعودي فيه ناس بدي الطريقة
مع اني صادفت بنفس الوقت ناس يشجعوا السعودة ويدعولي بالخير وانه ربنا يسهل لي بالأفضل وكثيرين قالولي والله اننا ننبسط لما نشوف سعوديين بمكان عمل

بعد 5 شهور من قدومي للمستشفى جات وحدة يمينة محترمة جدا شهادتها مختبرات طبية (دكتورة مختبر)من اليمن ونعم الخلق ومحجبة ومحترمة جدا
سألتها انتي جاية ايش تشتغلي قلت لها انتبهي لايكون مسماكي بالتوظيف شي وتجي تشتغلي هنا شي تاني (زي حالتي انا وزميلتي) قالت لي انا جاية من طرف صاحب المستشفى واكيد اني رح اخد تدريب واستلم شغل بالمختبر (قلت في نفسي انا سعودية وجاية من طرف صاحب المستشفى اللي اخوه صاحب ابويا وماقدر يفيديني )
المهم قلت لها اتمنالك التوفيق وفعلا اشتغلت بالمختبر مسكووها شي مررة بسيط وانا وزميلتي فرحنالها لكن والله كلها 3 اسابيع وصار مصيرها زيي انا وصديقتي

نفسيتها تعبت وحالتها حالة انها تجي بمسمى شي وتشتغل شي تاني تعبت وكلمت هاذا وذاك لكن ما احد فادها مرة يقلها المدير جيبي رخصة طبية ومرة يقلها انتي مو على كفالة المستشفى وغيره ورحنا لمدير المستشفى يقلي انتوا هنا عشان تشتغلوا حسب ما احنا نحطكم تخيلوا

وصرنا ثلاث ولايا(نسوان بالسعودي ) نخالط رجال ونتعرض للكلام الصعب من ضعاف النفوس واللي ما يخافوا الله

جا رجل من وزارة الصحة وسألنا عن شهادتنا وقلنا له بكالوريوس مختبرات وغيره نظر نظره قاسية للسوبر فايزر وقاله اش دا مشغلين ناس بؤهلااات عالية في مكان المفروووض يشغلوا اصحاب الدبلومات والثانوية(مع العلم انه اللي يشتغلوا بالمختبر والتحاليل معاهم دبلومات فنية بس ) ايش الكلام دا وقاله لازم تجيبوا موظفين خاصين بدا المكان ....وتحسبوا انه الوضع تغير

حبايبي الوضع زي ماهوه ماتغير ولا شوية

وبعد فترة كمان جات وحدة سورية لها تقريبا 11 سنة خبرة بالمختبرات الطبية وقلنا يمكن هيه دي الخبرة اللي يبغووها

وفعلا جات وكالعادة يوهموا الشخص اللي يجي انه يشتغل بتخصصه وفجأة يحصل نفسه في مكان وشي تاني

وفعلا صرنا 4 ولايا في غرفة العذاب وسط صراخ المرضى وسفاهتهم ومشاكل المستشفى

واللي استنتجته انه هذا المدير مايبغا اشخاص سواءا سعودين اوغير سعوديين من اهل البلد انهم يستفيدوا ويكون لهم سلطة وبالذات السعوديين فقط يبغا هنود من جماعته يجيبهم ويشغلهم

ويطلب من المدير العام زيادة عدد الموظفين لأن العدد مايكفي للعمل
طبيعي ما يكفي لأنه عندك 4 اخصائيات ما بتستفيد منهم ورفضوا زيادة الموظفين

وبعد فترة بسيطة مبرووك دخلت الكهربا عندنا جابوا كمبيوتر وعلت الزغرودات واننا حنرتاح من لخبطت نتايج المرضى والمشاكل

وفعلا قسم كبير من المشاكل رح وصرنا احنا ال4 نحاول نشووف حلول للمشاكل اللي تواجهنا وبدايل لها

وبعد شهر اخذت انا اجازتي السنوية اريح دماغي وبعد ما رجعت حصلت انقلاابات ومشاكل

1-غرفة العينات التي اعمل بها ما يجي عامل ينظفها بسبب قلة العمال بالمستشفى
2-المراسل اللي كان ياخد العينات ويوصلها للمختبر سافر خروج نهائي وماجابوا بداله
3-زميلتنا السورية سافرت بعد ماكانت بالسعودية مدة 11 سنة (كرهوها بالسعودية حسبي الله )
4-معظم اللي بيشتغلوا من الأجانب بالمختبر خارجين نهائي من السعودية لأنهم شايفين انهم بيكرفوا عالفاضي ومو بمستوى تعليمهم وشهادتهم

وكم من مرة يقولولي يانور انتي وزميلاتك روحوا اماكن افضل انتوا احسن من انكم تشتغلوا شغل مو شغلكم
المهم زميلتي صديقة عمري السعودية لقت لها مكان افضل وراحت بالاضافة الى 5 اشخاص رجال كلهم راحوا خروج نهائي
فصار الوضع ضغط جدا جدا جدا علينا ونفسيتي صايرة حالتها بالبلاء واتظاهر قدام اهلي اني اوكي عشان ما ابغا اقلقهم معايا
وصرت في غرفة العذاب لوحدي رغم انها تحتاج 4 اشخاص ويالله يمشي الشغل
والمصيبة جو 4 شابات وشاب يتدربوا من الجامعة بالمختبر وطبعا هاذا المدير الظالم تاركهم عندي اني انا اقوم بتدريبهم (يعني عارف اني انا كفوءة للتدريب واعداد ناس للعمل لكن الشغل العملي حارمني منه ) مساكين انا احاول قد ما اقدر اني اساعدهم واشرحلهم ووقت فضاوتي آخدهم للمختبر واشرحلهم وكم من مرة يشتكولي انهم يعانوا وانه مافي احد يشرحلهم ويفهمهم

تخيلوا اني صرت اشتغل مراسل انقل العينات بنفسي وعامل تنظيف امسح الدم واخذ العينات من المرضى وتدريب 5 اشخاص كل واحد عنده سؤال تفسير نتايج المرضى اذا سألوا عن فحوصاتهم والأدهى والأمر مستشفى يتعامل بالسجلاااات وكل شي بالكتابة اليدوية مو بالكمبيوتر..ولا تقولولي عندكم كمبيوتر هادا الكمبيوتر كل يوم يخرب ويوم صاحي ويوم نايم ويوم يخرف واذا طلبت مساعدة من احد ماحد يساعدني لأنه عندهم مشاغل بما فيه الكفاية بس الأصعب عليا انا وزميلتي

وظفوا وحدة بنت جديدة معايا تساعدني ونفس الحكاية عندها مؤهل عالي دارسة مايكروبايلوجي لكن انتهى بها المطاف معايا ونفسيتها زي الزفت دحين لها اسبوعين بالعمل مو كل شي تعرفه فأضطر اني اسوي كل شي بنفسي

المهم صارت تجيني مشاكل كتير والمدير الطبي المصري كمان سفيه وصار يجي ويعطيني كلام مايعجب احد وكاني انا مرتكبة الجريمة ومدير المختبر مايحميني تاركني لمهب الريح
وتكرر دا الشي كثير وسفاهة المرضى كماااان ولخبطت الشغل والسوبر فايزر الطيب اللي يساعدني بقد ما يقدر مسافر خرووج نهائي كمان

انا تعبت نفسيا وبشدة تعب بدني والأكثر منه نفسيا صايرة عصبية حتى على اهلي

ويوم الاثنين حصلت مشاكل كثيرة كلها في آن واحد

تضايقت كتير وطلعت للمدير العام وتكلمت وقلت كل شي وقالي قدمي شكوى كتبتها عندي بالبيت ومن يوم الاتنين واليوم الخميس مارجعت للعمل وناوية اقدم استقالتي وآخد خبرتي وادور فرص تانية افضل واتمنى اني احصل
لأني من جد في مكان بشتغل 7 صنايع والبخت ضايع

انتوا اش تنصحوني اسوي وانتوا اش رايكم باللي يحصلي ؟؟؟؟؟

مع العلم انه زملائي قالولي انه دا المدير بيعمل كدا من زمان وياما وياما سواها ببنااات وشباب سعوديين كتير