السلام عليكم أختي... أول شي الله يريحلك بالك و يسهل أمورك بإذن الله يارب .. تاني شي فكرة مشروعك جيده جداً و ممتازه بالنسبة لحالتك الفراغيه,, أنا خالتي الله يطول بعمرها تحب التجاره تموت في شي إسمو بيع و شراء ومن دا الكلام المهم كانت تجيب بضايع من اليونان و ماليزيا وتبيعها لحريم العيله إحنا ما شاء الله تبارك الله عيلتنا كبيره يعني مافي مشروع تفتحو أي حرمه عندنا إللي و ينجح و الكل يشتري إللي يجامل و إللي من جد.. المهم و تمر كم سنه و تغير فكرة مشروع بيع الملابس و العطور الحريميه مشروعها الجديد دا إللي ابغى اكلمك عنو بدأت فيه من قبل ما شاء الله تبارك الله 4 سنوات و مدخله منه فضه و ذهب و ألماس كمان ترا بالغت في الأخيره ههههههههههههه المهم خالتي الله يطول بعمرها تبيع معجنات بكافة أشكالها و أنواعها هالمشروع من بيتها ما عندها محل تبيع فيه من بيتها بتشتغل إلي خلاها تشتغل في المشروع دا يا حبها للعزايم و جمعات الحريم كانت دايماً تجمع الحريم في بيتها و يتونسو و يهيصو(( أعرف الحكاوي دي من كتر ما أوصل أمي عندها و آخر الليل آخدها من بيت خالتي و تقعد تحكيني طول الطريق إلين ما نوصل البيت و الحمدلله أخرج من السيارة و أنا أصنج)) Lo0o0o0oL المهم في مره من العزايم و حده من جاراتها قالتلها و الله السمبوسه دي لذيذة من فين أشتريتيها خالتي قالتلها و الله أنا إللي مسويتها المهم الجاره دي قالتلها طيب ممكن تعمليلي 40 حبه عشان عندي عزيمة و بدفعلك خالتي ماقصرت قالت طيب أعملك و ترا عندي أنواع كتيره شي بالجبن و بالخضار و باللحم و ما شاء الله مع مرور الأيام و الشهور الزباين طلباتهم بتتزايد,, تسأليني كيف أنشهرت خالتي؟؟ من جمعات الحريم فلانه تقول لعلانه و علانه تقول لفلانه إنو هادي معجنات ( أم أحمد) طبعاً دا الإسم التجاري ومع مرور السنين خالتي صارت معروفه بين جيرانها و جيران جيرانها و صحبات صحباتها و الطلبات صارت زااااااااايده جداً المهم مسكت شغالتها الأولى و التانيه و علمتهم الصنعه وهي معاهم تلف و تعجن رغم هي ما شاء الله ماهي محتاجه شي و ضعهم المادي جداً مستقر بس تحب التجارة و الشغل وعلى قولتهم في الحركه بركه طريقة البيع عندها (ترا سر) تسأليني كيف عرفت؟؟ سألت أمي لأني كنت ابغى افتح محل للمعجنات و قلت إللي راح آخد من عنده خالتي نفيد و نستفيد, المهم هي كالتالي:- 1- سمبوسه "بيتي" بالجبنه ولا بأي شي 30 حبه بـ 30 ريال يعني الحبه بريال لأنها تتعب شويه. 2- كرواسون بالجبنه ولا زعتر 30 حبه بـ 30 ريال يعني الحبه بريال لأنها متعبه و فيها لف. 3- و الله ما أعرف إسمو بس المهم هوه (بالسجق أو النقانق) هادا الحبه بـ ريالين بس لما يطلبو كميه كبيره شويه من عندها تصير الحبه بريال ونص . وهكذا يا أختي شويه شويه و من سار على الدرب وصل و إن شاء الله أكون أعطيتك التفاصيل الكامله و تستفيدي منها في حياتك وربي يطرحلك البركه في رزقك.. لو عندك أي إستفسار أي شي للمناقشه تحت أمرك إحنا أخوان و الناس للناس ولا عاد تفكري بالإنتحار أستغفر الله العظيم في مثل يقول (حيلة البليد مسح السبوره) و مثل حجازي يقول (الخايبه تتعلق في الحبال الدايبه) وإنتي إن شاء الله بتكوني أحسن من كده طالما أملك في الله كبير قولي هادا الدعاء (اللهم يا مغير الأحوال غير حالي إلى أحسن حال) أخوكي : جداوي يجرح و يداوي في حفظ الله ورعايته..