السلام عليكم اخواني واخواتي أعضاء المنتدى الكرام
بقولكم قصتي بس فعلا أبغى حل شوفو انا كنت موظفة في شركة خاصة صغيرة المدير مصري و مديرتنفيذي سعودي وأنا ووالسكرتيرة سعوديات والباقي أجانب .اشتغلت مدة سنة وشهرين سواق الشركة يجيني الصباح وأرجع على حسابي العصر "يوم ما طلبت بدل مواصلات اداني المصري مية ريال لو مأجرة حمار كانت اجرته أغلى"طبعا في نهاية المدة حسيت بضغط نفسي ماني مرتاحة مافي تقدير لشغلي وانا الوحيدة اللي في القسم ما غير السكرتيرة جالسة برة في الإستقبال طبعا ولانها كانت اقدم مني وتشتغل حتى وقت الإجازة فكان ليها صلاحيات انه السواق على حسابها وكلمتها مسموعة وانا ضعيفة جالسة (لدرجة جاتني كتمة ما قدرت اتنفس من القهر غير ربنا سترها) المهم جاني تعاقد في مدرسة حكومي "فررررصة يابنت لا تفوتك"قلت للسكرتيرة لأني كنت مترددة شوي طبعا انتو عارفين انه لازم أروح على الطول اختكم ما كذبت خبر رحت على بالي اسلم الاوراق وارجع للشركة الى ما يبدأ الدوام الرسمي اتاري انه اجلس اداوم في المدرسة دوام رسمي وتوقيع وحركات داومت يوم الاثنين وبعدين يوم الخميس اللي هوة اجازة في الدوام الحكومي ودوام عند" الضعفاء موظفي القطاع الخاص "اتصلت أبغى سواق الشركة يجيني عشان ازبط الملفات للشركة وأوريهم ايش الشغل اللي عندي"طبعا من عندي ما أحد قلي"واتاري السكرتيرة ما قالتلهم انه ما حأجي في نفس الوقت على بالها اني كلمتها كصاحبتي مو كموظفة واعتذرت طبعا من المدير لأنه في خطأ غير مقصود حصل مني ومشي الحال لكنهم ما يبغو يرسلو السواق قلك اني جاية عشان مصلحتي مو عشان ارتب الشغل وسكت على الموضوع فترة لكن لما جيت اطلب الخبرة و اخلاء الطرف سولي هلييله اطريت أروح الشركة أشوف المشكلة أتاري لما عرفو انه ربي سهلي وظيفة أحسن في واحد الله يكسر يده دخل على جهازي وحذف شغلي لا وحاط مكانه اغاني (بالله يامسلمين هذا يصير) وقالو مافي شهادة خبرة الا لما تجيبي الشغل اللي انحذف طبعا رحت راجعت ايميلي وطلعت الشغل مرة ثانية بعد جهد جهيد لكن لما جيت أودي الشغل جهازي اخترب واضريت افرمته وضااااااااااااااااااااااااع الشغل مرة ثانية (قلت يمكن فيه مصيبة حتجيني لو وديتلهم الشغل) وانا جاسة دحين ماني عارفة ايش اسوي.
على فكرة أنا ما وقعت عقد مع الشركة وما عندي تأمينات على الراتب لكن لما خلصت فترة التدريب 3 شهور أخذت شهادة خبرة ومكتوب اني مازلت أشتغل عندهم اللي عنده حل يجاوبني
والسلام ختام