ماشاء الله تبارك الله حلو الواحد يكون عنده موهبة بس ليش الدموع ههههههه
انبسطي في ناس كثير يتمنوا موهبتك

بقترح عليك شي ومدري يمشي ولا لا في حالة انه ماتبغي قرض وماتبغي تستاجري:
رأيي تشوفي تصميمين او 3 او اكثر على حسب ميزانيتك يعني وسوي رسماتهم وزبطيها
بعدين سوي اعلان في النت في المنتدى عن انك تبغى شراكة مع خياطة واذا مالقيت حاولي تشوفي احد يقرب لك عنده مشغل واتفقي معاه انه يخلي الخياطة الي عنده تخيط لك وله نسبة بس طبعا بسيطة واذا ماعندك احد يقرب لك عنده مشغل شوفي اقرب خياط باكستاني وخليه يخيط لك
وبس طبعا اشتري القماش وباقي العفش واعطيه الخياط وادفعي قيمة الخياطة

طبعا هذا كله بيكون ماله داعي لو عندك تصميمات منفذة من قبل سواء فستان لك او لاقاربك لانك بتصوريها وخلاص

المهم بعد مايكون في يدك فستان جاهز من تصميمك او صورة اعرضيها على البوتيكات الصغيرة واتفقي معاهم انه تعرضي فساتينك في جنب من البوتيك ويكون عليها اسمك وهما لهم نسبة في كل فستان يتباع او مثلا ماتعرضي بس يسوا اعلان عندهم انه في المصممة فلانة الفلانية تسوي تصميمات وهذا رقمها وهذا كتالوج رسماتها وهذي نماذج فساتين قيد سوتها يعني البوتيك او المشغل يكون صلة وصل بينك وبين الزباين طبعا المشغل بيستفيد انه اسم مصممة ازياء عندهم وبياخذوا نسبة من شغلك او بياخو قيمة ايجارك لركن عندهم وانت تسوي اعلانات لشغلك في النت وتتفقي مع الناس انه يجوك في المشغل او البوتيك وتتفقوا وتاخذي المقاسات وتوريهم عينة من القماش اللي تقترحيه للفستان واي تعديلات يبغوها على التصميم ووو يعني يكون التصميم والقماش والخياط كله عليك هما بس يقيسوا ويستلموا فستان زي الصورة بالزبط

وبس كذا تنشهري ان شاء الله ويكون لك صلة وصل بالناس وباقل الخساير وهذا كله طبعا ارجع اقول لو مجرد بداية وماتبغي تسوي بوتيك خاص بيك وماتبغي تستاجري مكان وديكورات وخلافه

وفي النهاية مااعرف في شي كذا يصير ونظامي ولا لا اندمجت مع الموضوع وقلت الافكار اللي خطرت على بالي وسوووري عالاطالة

والله يوفقك يارب وينور بصيرتك وييسر لك كل امورك