والقريه والاحياء ومضارب الباديه والشباب والشيب وبعض

المناظر وغيره و غيره ويتلخص ذالك في قصيدة من نظم

ابو طلال ماجد بن عبود بن مزيد بن مغيرق يوصي

نفسه واولاده والمستمع بردع جماح النفس وصدها عن

اهوائها

( بداية القصيده )

المبتدامن منطلق حس واحساس + مابين هاجوسٍ وطاري وهوجاس + من كثر ماشاهدت ناسٍ من الناس
+ سميت باسم الله وسبحت بأسماه
اليوم وامس وقبل قبل امس مريت + لسوق العقاريه وجلت وتمشيت + ولمحت بالعينين ماشفت واغضيت
+ وقلت العفو يالله يالله يالله
وحسيت واختفيت وغبت وتواريت+ ومهما عذلت القلب عن عذله ازريت+ وشعرت بأني بالخطايا تماديت
+ وقلبي يحدثني وانا اعصاه وانهاه
ونهيت قلبي عن خطاه وتفاديت + وقلت اله يا قلبي تحاديت واخطيت + وجهت وجهي للولي حامي البيت
+ يحميني من الذنب والوذ باحماه
لو استجبت لرغبته واستمريت + وقعت بانفاق الظلام وتحاديت + عن طاعة المعبود وللمغوي اصغيت
+ وش عذري من الله نهار الملاقاه
ونفسي تحدثني وقلبي دليلي + وضليت افكر بين عدلٍ وميلي + وانا ونفســـــي بين حطــــــاً وشيـــــلـــــي
+ وقررت اجاهدها على طاعة الله
قبل الرجل بالوحل يهوي قدمها + وتدرع في الاشواك ويكبر ورمها+ ومن طاوع اهوا النفس نفسه هدمها
+ امارة بالسؤ لمن طاوع اهواه
ورجعت من توي مذهولٍ وخايف + بعد لحظت وشفت زين الوصايف + والعين سباقه وقلـبي مـهـايــــف
+ ذكرني بعز الفتوه وذكراه
وتحركت مشاعري بالتماثيل + مثائلاً توافدت باخر الليل + باقصى الحشا هاجت وترسل مراســــــــــيــل
+ وهاض الضمير وهاض قلبي من اقصاه
واسترسل الخاطر بنظم القوافي + باخر هزيع الليل والجو صافي + وبينت مما اخفيت ماكان خــــــــافــي
+ وللشعر دور وفن واسلوب ورواه
وبيدت باسم الرب رب السموات + وسجدت لله حمد واقرا التحيات + لرجوا الثواب ومغفرة كل ما فــــات
+ ياعالمٍ بالسر وكامن خفاياه
ياعالمٍ بالغيب ومكون الكون + تعلم بما لانعلم وكل مكنون + ومن طاعك اله النصر والفوز مـــــضـمــون
+ وانت الرحيم بحال عبدك وملجاه
وانت المعين وعون من كان يرجيك + ومفتاح باب الخير كله بياديك + والشر ياقع فيه من كان عاصيك
+ وانت الملاذ لكل مظلوم يالله
يا موضـح لعبدك طريق الهـدايـه+ ونهيته عـن الشـرك ودرب العصايـه + وبينت درب الحق ودرب الغوايه
+ وحبل الرجاء وصله بأياديك وارشاه
البارحه بالقلب فكر وتفاكير + خواطر تنبيء بيقضه وتذكير +ذولي جدد وورود و ذولي مصــــــاديــــــــــــر
+ تملي حدث ماصار وكنهه وفحواه
تحاورت بأقصى الحشا وازعجتني + وغنا مغني لحنها واسمعتني + وهاتفتها من بعد ما هاتـــفــــتـــــنــــي
+ وطار الكرى وانصت للصوت وانداه
ما بين مد وجزر وعنف وتحدي+ مره تحاورني ومه تصدي + ولحــــنــــهـــا مجـبــور اجـــــاوب واردي
+ ولا كل من شاف الهدف صاب مرماه
بلحون من مكنون مما طرالي + ما قلتها من نسج ضرب الخيالي + واللحــن شـــوقـــنــي وتـــوا استـــــوالي
+ وحن الضمير وتاق للحن واغناه
ودونت بالريشه لحون ومثايل+لها في الهاجس دليل ودلايــل+ تـــــومــــي كمـــا تـــومي باهـلهـا الرحــــايل
+ بين الذهاب وبين الاياب بوماه
حلت وانا باحلى منامي وفزيت+ ومن ذعرها ذكرت ربي وسميت+وهـلـلـت واستـغـفـرت وللـرب صليت
+ واتلي من اياته وسميت باسماه
ابن ادم بدنياه دايــم مسـير+ في حكمة الخــــلاق مـــاهـــــو مخــيــر+والـى وقــع بـالـذنـب يـبـقى مـحـيــر
+ ماله مفر وحيل الاحيلة الله
يا غافل بدنياك لابد من يـــوم + تشوف من لوعاتــها هم واهــمــوم+ وتراكم ذنوبك وتفزع مـــن النـــــوم
+ وتقول يا ويلي من الله ويلاه
لو تبتسم لك واضحكت وارقصت لك+ ما تؤنمن ميلاتها لو صفتلك + سريعة الاقـــــفــــاي لــــو اقبلت لك
+ ما دامت لقارون و فرعون دنيــــــاه
متقلبه والها خطر واصطفاقه + مهما انتبهت وصار عندك حذاقه+ مــا فــي يــدك حـيـلـه ودبـره وطـاقـه
+ كم واحدٍ من غمها جاه ما جاه
لها انقلابه واصطفاقه وطله + ومن لاعته عجزت اعظـــــامه تقله+ لا مامــــــن ولا مـــزبن ولا مـظـلــه
+ الا اظلال الله ولطفه ورجواه
والدين من نص الحديث النصيحه+ للصالحين اهل الوجيه الفليحه + ومن اتعـض قـدام سـاعـــة مـطـيـحه
+ يلقى جزاه وتوبته عند مولاه
افطن ترى الدنيا كما الظل زايــل + ما تنومن لها انــقلاب وحبايل + مثل الجدار وساسه الى تـــهـــايــــل
+ لابد ما ينهار ويطيح مبناه
طلال انا بأوصيك واحث طارق+ وخالد وتركي قبل وقت المفارق+ لا تنخدع وتضيـــــع يا بن مغــارق
+ ما تنفع الكنيه ترى النافع الله
صلوا صلاة الفجر بصف الجماعه + بخشوع وذله وخوفٍ وطاعه + تشفعلكم يوم الحشر والشفـــــاعـــه
+ وسيروا على سيرة نبيه ومجراه
وتنافسوا بدروسكــم يا عيــالـــي+ وتنافسوا في كسب عليا المعالي + ولا تنصتون لقول قيلٍ وقـــــــالي
+ ومن قارب الاجرب بفيروسه اعداه
حنا علينا حثكم للمراجــــل + والبــــــر خير البر لا صار عاجل + نحثكم عاجل ماهو حثٍ اجـــل
+ قبل القطار تفوتكم سرعة خطاه
من الواجب اوصيك واحفض وصاتي+ اد الفروض الخمس بوقت الصلاتي + وصوم الشهرلا هل واد الزكاتي
+ وعليك حج البيت ومرضاة الاله
واضب على درسك وكرس جهودك + وركز مع مدرسك واثبت وجودك + ما دمت غض بمبتدا نمو عودك
+ وتصفح اكتابك وناجه مناجاه
وافطن لشرح الدرس وحضر احسوسك+ والى رجعت البيت ذاكر دروسك+ وثوب الجهل لا يعتريك ويدوسك
+ والعلم عز البيت وتشييد مبناه
وبيت بليا علم مثل الخرابه + لاصــار رب الـبـيـت مـالــه مـهـابـــه + وجوده مساوي لفجوة غيـــــابــــــه
+ مهدوم شخصيه وهادم لمبناه
مشمات ومعقد وضعه مـزعـزع + والـطـفـل يبـكي والـولـيـه تـلـعـلـع + لا عين تدمع له ولا قــلب يجزع
+ ومسيب اولاده وعايش مع اجواه
اول شروط العلم حثاً بترغيب + ساعات ترغيباً وساعات ترهيب + والعلم تـنــــويراً لعـقـلـك وتـــهـذيـــب
+ ضاعف جهودك لاتفوتك مطياه
انت واخوانك عندنا بالسويه + مالك عليهم ميزه ولا افضليه + والله ومر بالعدل بين الـــــــــرعــــــيــــــــه
+ وحنا لكم خدام وكداد وارعاه
وليا طرحتولي عتاب وسوالي + وقلتوا وراك تخص اخونا طلالي + وانت الابو واحنا اربعتنا العيـــــــالي
+ وانت ولي الامر والوالي الله
وجوابي اكبركم في السن اله دور + بعد الابو يرجعله الراي والشور + لاصار صالح مابدر منه اقصـــور
+ قدوه وطاهر في سلوكه وممشاه
وحنا عرب لنا اسلوم ومذاهب + ومكارم الاخلاق حظ ومواهب + والعمر مهما طال فاني وذاهـــــــــــــب
+ ولاكل متمني حصل غاية امناه
طلال خلك منتبه مع اخوانك + هم عضدك وساعدك ويدك وبنانك + وزندك وعونك في تقلب زمانـــــــــــك
+ وصل الرحم واجب وصى به الله
وابعد عن الاشرار وغثا المجالس + مابين بليسٍ وخاتل وبالس + حتى الذي غافل بداره وجالــــــــــــــــس
+ تلحقوه وشرشحوا كل موتاه
واحذرجليس السوء خيره وشره + وعدوك احذر منه مره ومره + واحذر صديقك ياطلال الف مـــــــــــره
+ يضحك ويفشي سرك لكل من جاه
وابعد عن النمام واهجر محله + واحفظ لسانك لايجي منه زله + يرميك في حبل النشب والمــــــــــــــذلــه
+ ومن هان نفسه هين وخصمه توطاه
واحذر تجي للقيل ناقل ونقيل + تضحك بك الاوباش ورؤس الرجاجيل + مابـيــن عـقالٍ وناس مـهـابـيــل+ وتصبح كما المنبوذ منذاك الى ذاه
لاتصحب اهل القلقله والرذيله + اهل الدوادي والعلوم الهزيله + تصبح معرض للخطر والـــــــفـشــيـلـه
+ ويخدعك من عيبه يغطي مزاياه
خلك حذر وافطن لبعض الاقارب + بعض الاقارب يابن ماجد عقارب + خصٍ بجيل اليوم بعد التجارب
+ وتكشف لك الايام من كنت تخشاه
خلك جرئ وانطق بهرج الصراحه + وانهل من اهل العلم واهل الفصاحه + واياك تتلفض بالفاض الوقاحه
+ احفظ لسانك والعدو لاتقفاه
رغم حداثة سنك وتوك اصغير + قدمك طرق متعرجات ومشاوير + وجيلك خطير وفيه خــله وتــدمــيــر
+ لاتنجرف في ركبهم بالمجاراه
واحذر عليك يلف صايع ومخبول + بحلاوة لسانه ومنطوق معسول + من معـدناً سافل وساقـط ومجـهـول
+ ابعد عنه لاتنتشر فيك عدواه
عاصي وللشيطان دايم مباري + بحالك ظلام الليل وسط الغداري + ساذج وعقله خالي واخـــــــنـفـشاري
+ ومن رافق الماكر في الخبث وداه
ومن طاوع اهواء النفس ضايع وغاوي + هوى مع الهاوي في اخبث مهاوي + مجرد من الاخلاق وسافل واوي
+ وسلك متاهات الجهل والله اعماه
اوما قرينه له وصد وتجبر + مغتر في دنياه وقام يتكبر + وسوس له الشيطان وضاع وتــــــــــــــــهـــــور
+ ومن طاوع الشيطان يتحمل اخطاه
يومي براسه مثل راس البهيمه + وجرح المشاعر مهنته والنميمه + والغيبه وشذب القفا والظليمـــــــــــــه
+ وملفه اسود من كباير خزاياه
بالاخره لاقربوا له ملفه + وظلت عصي محاسبينه تهفه + وكل تبرا منه ماحدٍ بـــــــصــــــــــــــــفـــــــــه
+ تشهد عليه اعماله بكامل اخطاه
بكره الى رزت عليه النصايب + وحطوه تحت اللحد وشاف الغرايب + لامن صديق ولاقريب وقرايـــــب
+ ماحوله الاالدود ياكل من اعضاه
وامسى وحيدٍ تحت لحده وغايب + وتكالبت عليه كل المصايب + وغدت ضلوعه في الحوده حطايـــــــــب
+ وشاهد عمل يمناه بشهود يسراه
بينت الك ماعندي من النصايح + قبل تورط بالنشب والفضايح + ويسجل اسمك في سجل اللوايــــــــــــــح
+ وتغدي كما اللي يصفق يداه بيداه
وضحت الك كل النصايح بتبيين + تشعر بها لاكمل السن عشرين + وتقول تو اني عرفت القوانـــــــــيــن
+ وفهمت مقصود الموصي ومغزاه
وعقيدة المؤمن وقلبه دليله+ينبيه بدقاق الحدث مع جليله+ومن لا استشاروشار واعزتي له
+ منفردا برايه وظل بعمياه
والاحمق أبعد عنه وأترك علومه+ لو بان الك في مظهر أحسن هدومه+ترى البلاوي معه داخل كمومه
+ وتبدي لك الأيام خافي خفاياه
وأكرر وصاتي وأنبه وأكرر+لا زلت أكررها وأنبه وأحذر+مهما أختلقت العذر ماله مبرر
+ وأحذر تناسى للوصيه وتنساه
ومن لا اجتهد في درسه ولاتعلم+بالمجتمع مثل البهيم المبلم+ لمحدثه ما يستطيع يتكلم
+ عهده على الابوين من وقت منشاه

اسمع واخذ من راسه اليوم شايب+ جرب وشاف من التجارب عجائب +وعايش بعيد الناس وادنى القرايب
+ ويدمح للاحمق زلته ويتحاشاه
لا تعصف بك العاصفه والهبايب+تومي كما تومي باهلها النجايب+اطلب من العبود راع الوهايب
+ يدلك على درب الهداية وتقواه
ما كل رجالٍ يقال اله رجال+بعض الرجال اجروم وازوال واشكال+يبين لك فيه الخلل والتخلخال
+ ويعميك عن دربك الى انصت لارياه
في سنحته رجال وبالهرج دجال+متلون وماكر وللناس ختال+لو قابلك بالبهللة والتبهلال
+ منبوذ من بين اصدقاه ودناياه
والعقل ما من عقل خالي وثرثار+تخبرك الأيام بمصيره والاقدار+ينهش وينبش بالجحاره كما الفار
+ ولا ينعرف وجه النذل من مقفاه
يظهر عيوب الغير ولا شاف عيبه+اكبر خطا واكبر ذنوب ومصيبه+اولا به يفتش عيوبه وجيبه
+ قبل اغتياب الغافل يراقب اخطاه
هذاك مفلس في نهار الحسابي+تذهب حسناته لقاء الاغتيابي+توزع على طلابته بالكتابي
+ ويلعن نصيبه والذي بالخطا اغواه
هذا جزا من قام يطلق لسانه+وسار بطريق الخبث وشاف المهانه+مذموم باولته واخر زمانه
+ ويعض بابهامه وتنشف شفاياه
مهما تظاهر باستقامة هل الدين+ بالشكل والهندام والخلق واللين+تراه وكر الشر وشيخ الشياطين
+ وراس النفاق وقمته في محياه
رافق كتاب العلم وخله رفيقي+افضل صديق ولا يخون الصديقي+تنهل منه ويدلك أحسن طريقي
+ نور العقل والفكر ونبراس مرقاه
اقرا القصص للانبياء وافهم النص+وما صارلادم هووحواء من اقصص+ومكايدات ابليس وغواية الحرص
+ ومن سبته طردوا من الجنه وماه
ولمحات عن قابيل مع اخوه هابيل+اول قتيل سالت ادماه هابيل+من واقع التاريخ تلقى التفاصيل
+ اول قتيل من البشر تسفك ادماه
وعن شيث لمحة في قرائتك ونظره+واجب تلم بما جراله بعصره+وراجع قرائتك بين فتره وفتره
+ واهتم بالتاريخ ويوميا اقراه
واقرا بقصة نوح واهل السفينه+ رست على الجودي وكون مدينه + ومعه ثمانيناً تمشوا بدينه
+ ونجاهم الله من غرقهم ونجاه
وما صار لابراهيم ونمرود بابل+ باوامر النمرود وحبك المحابل+بحرق الخليل بنار حابل ونابل
+ ونجاه ربه وافسد النار واطفاه
وموسى وقومه لامره مخالفينا+ولون البقر تشابه علينا+وعصوا وظلوا لامره معاندينا
+ عصوا نبي الله واخزاهم الله
ويوسف وجبه واخوته يوم خانوه+رموه وسط الجب وراحوا وخلوه+ودمه على القميص لابوه وروه
+ ومن غدرهم نجاه ربه ونباه
وعيسى عليه أفضل صلاة وسلامي+وقصة صليب اهل الصليب الليامي+وعلاه رب الكون باعلى مقامي
+ ولهم الخزي والعار ولعنهم الله
وسيرة نبي الخلق سيد العبادي + المصطفى الهادي لنا خير هادي+ شفيع الامه في نهار التنادي
+ بلغ بدين الحق وشرعه وفتواه
وارسل مراسيله لهرقل وكسرى+وصوب المقوقس في مقره بمصرى+ودعوة نبي الخلق للناس بشرى
+ بلغ بدين الله وعمم ببشراه
واقرا بتاريخ العرب قبل الاسلام+وعبادة الاوثان واقداح الازلام+وابن لحي وجلبه لبعض الاصنام
+ وحط اله منها معبد وقاضي اقضاه
هو اول مغير لملة ابراهيم+ غير قيم قومه وكل المفاهيم +الحد وللاصنام سوا المراسيم
+ وخزاعه تمجد صنمها وتنصاه
حطب جهنم في نهار القيامه+يجر قصبه في لهيب التهامه+وتنفر جهنم من روائح عظامه
+ بالنار من لهبها ماله مناجاه
واقر عن ابطال الفتح والصحابه+وتوحيدهم للرب والاستجابه+بسيرة غزوات النبي في كتابه
+ لابن هشام مدونه كل فحواه
بخلافة الصديق وعمر وعثمان+وعلي حكيم القرن بحكمه وتيبان+بغزوة بدر واحد والاحزاب له شان
+ ومن بارزه فقد عياله ودنياه
رجالً علينا ذكرهم بالاسامي + بقلوبنا لهم منزله واحترامي+ولهم في الجنه منزال ومقامي
+ والله رضي عنهم وحازوا رضاه
امثال خالد هازم الفرس والروم + ماهزم خالد في حروبه ولا يوم + وعدوه من الفرس والروم مهزوم
+والنصر بحروبه حليفه على اعداه
وابو عبيده وابن الاسود والانصار+ وجعفر وزيد وشرحبيل الابرار+ وجميع صحب المصطفى خير الاخيار
+احصايهم يصعب على المحصي احصاه
وجحافل القـعـقـاع وجيش المثـنــى + وشـقـيـقـه الضرغام اخوه المعنى + واقـدام ابـو محـجـن فعـل ما تـــــونى
+ارهب صفوف الفرس بسيفه وحناه
وسعد كسر كسرى وحطم عروشه+ ودمر قباب الفرس وهزم جيوشه + وكسرى المداين غارق في نعوشه
+والهرمزان استسلم وجاء من اسراه
وصلوا الى النهرين ومشارف الصين+ وخاضوا بحومات الوغاء مستميتين + لا ظهار دين الحق ونصرة هل الدين
بنصر محقق واسلموا ناس اعصاه
وغربا جبال اطلس وفرنسا والاسبان+ ومشارف الحمراء وطنجه وتطوان + وهرقل وغاره دمره جيش حسان
+ وكلمة هل التوحيد ما احد يتحداه
وابي سرح مقدام ذات الصواري+ فتح افريقيه وانشاء له مصاري+ من خيرة القاده وحازم واداري
+واستبشرت تونس بفتحه بعد جاه
وابن ال***ر اول مولودا في الاسلام+ ابن الحواري للمسلمين مقدام+ جندل زعيم الروم بسيفه ولا قام
+ واحتز راسه واقبل يزف بشراه
وموسى وعقبه بدعوا بالفتوحات+ بسواحل الابيض وبحر الظلمات+ وبالاندلس للعرب اقاموا حضارات
+ وطارق نشيد بفتح طارق وذكراه
والداخل وجنده لهم دور وادوار + صقر قريش ابحر بغبات الابحار + سجل له التاريخ شهره وتذكار
+ والاندلس تشهد بدوره وذكراه
ومعاويه وزياد للمجد رواد + وثالثهم بن العاص له دور واجهاد + واسم المغيره رابع الهم بالوكاد
+وذولا ادهات العرب وبالحيلة ادهاه
واقرا في المغني وشرح البخاري +يخبرك باشياء ما انته عنها بداري + من ماضي الازمان وما كان جاري
+بتفسير ما تجهل من الفه الى ياه
وزاد المعاد ينور القلب بالنور+ غذا لعقلك والخبر فيه منشور +والى فهمته نمت والبال مسرور
+يحميك من شر البليه وبلواه
وصحيح مسلم فيه كل الحقايق+ والترمذي مسند بكل الوثايق + بتدقيق وتمحيص ما به عوايقٍ ٍ
+ لصقل مدارك من قراه وتهجاه
اخير من صحبة عيال الحواري +و بشكاتهم بالليل تحت الكباري + وان سمعوا الانذار راحوا حباري
+ لغواية الشيطان هاوين واهواه
واهل الشبح ومشغلين البواري + عيال الترف لاجت ليال الطواري + غدو كما اللي يلبسن الخزاري
+ والدم مايع والعطب في خلاياه
والمجتمع صابه مرض وانجرافي + صابه ما صابه من خلل وانحرافي + وقطع الرحم حاصل وكثر التجافي
+ والوازع الديني تنكر وخلاه
هاذي خواطر يالطلال وطرايف + من واقع الواقع مثل مانت شايف + دنيا تقلب ماعليها حسايف
+ احد سعيد ابها واحد حظه اشقاه
تعال نلقي نظره بمجتمعنا + والتجربه فيها شرينا وبعنا + وتركيبة السكان فيها طبعنا
+ من كل جنس ولون يافزعة الله
والجار ماعد يتعرف على الجار + وسلم العرب ماعاد للسلم مقدار + عقب الرجال اللي لهم كار واذكار
+ واصبح عوضهم جيل جعجع وشرواه
يرقص على دش الهوى والخلاعه + ومزاجه لجمع الصور وانطباعه + وضاع بمتهات الجهل والضياعه
+ عزاه ياعيال الاجاويد عزاه
والابو ماعاد له قيمه ولادور + ماله مكان ولاتصرف ولاشور + والابن عاطل في سلوكه ومدمور
+ لاخير برب البيت ولاخير بابناه
ورجل كما الصوره وهيكل في البيت + في صورة ابن ادم وحياً كما الميت + ويقول انا الرجال ماعمري اخطيت
+ صورة رجل بالبيت والامر لانثاه
لا لعلعت واومت عليه بعصاها + استسلم ولا يستطيع يعصاها + لاخير بارجالٍ تطاوع نساها
+ اللي يحبون البذخ والمظاهاه
اكبرهم الى جاك في هيئة الشيخ + نفسه مزايمته وجهل ونفيخ + ويعد نفسه من شيوخ المناويخ
+ وهو نكرةٍ ماله مكانه ولاجاه
وان قلت له ياهن انته هن ابن من + تلعثم وطاطا براسه وطمن + وثارت جنون الخبل وانصاب وانجن
+ بعد ارتدى زياً مخالف عن ازياه
لبس له احسن بشت وجاك يتمايل + ويعد نفسه من عيال الحمايل + ويقول انا ابن افلان وافا الخصايل
+ مغتر في زوله وزيفه وخيلاه
ويقول انا ابن افلان والجد زعطان + وعمي مع اهل الخيل مقدام فرسان + لاجا نهاراً فيه طاعن وطعان
+ شي غريب وصحته ماسمعناه
جاهل ومتجاهل لوضعه وحجمه + ومعرض لنفسه لحتفه ورجمه + وين الثرى من الثريا ونجمه
+ وراس الطويله شامخ وعسر مرقاه
والناس تدري بالمعادن والاوباش + وبعض الاسامي والمظاهر على ماش + ولبس الحمايل صار لرعاة الادباش
+ لراع الجحش والثور ومربي الشاه
ومركبات النقص والاعوجاجي + تحدث خلل ومعكره للمزاجي + فيروسها ماله طبيب وعلاجي
+ يبقى عليلٍ لين يذهب لمثواه
زينة ابن ادم عقله ولطف الاخلاق + والمؤمن الخير للامجاد سباق + ومن يفتقر للخلق ياقع بالانفاق
+ وعطا مجاهيلٍ اطرقها ملواه
والخاتمه على اخيار البريه + صلاةٍ وتسليم وازكى تحيه + على محمد صاحب العبقريه
+ نمشي على سيره ونهجه ومبداه

ملاحظه

استخرجت هذه القصيده من ديوان او مكتبة ماجد بن عبود بن مزيد بن مغيرق العتيبي
بعد الاستئذان منه
وهي اجتماعيه وتاريخيه ونصيحه للاولاد ولكل من سمعها
ورد في بعض مفرداتها:
1ـ اول من جلب الاصنام ووضعها في الكعبه المشرفه وغير ملة سيدنا ابراهيم عليه الصلاة والسلام

2ـ عبد الله بن سعد بطل ذات الصواري قائد المسلمين في شمال افريقيا
في عهد عثمان ابن عفان رضي الله عنه