السلام عليكم ورحمة الله وبركاته


في تمام الساعه 2:45 فجر اليوم الخميس قلت خلني اشيك على المنتدى واشوف احواله

وادخل ومااشوف اللي قاذفات الهاون والار بي جي تتهاوى من كل حدب وصوب في قسم الواحة

المشكلة توني جاي من عزيمة وتعبان --> يعني ماكنت اقدر اجري واهرب من خط النار
لدرجة انه اصابتني شظية ---> بس الحمدلله جات سليمة

حاولت اشوف مصدر هالمقذوفات والاسلحة

الا واشوف زيدان ممتد تحت الاعشاب وحوله 8 قنابل يدوية وار بي جي

قلت هالادمي مع من داخل الحرب ..!!
واخرج وادور المصدر الثاني لإطلاق النار

الا واشوف حاكم بيزنطة حافر خندق وداخل فيه ومعه رشاش كلاشنكوف وهاون

قلت الصلح زين
خلني اكلمهم واصلح بينهم
وهذا نص المحادثات اللي حدثت بيني وبينهم

اقتباس:

المشاركة الأصلية كتبت بواسطة وزير البطالة صباح الخير ياحاكم بيزنطة وش هالهواش العلني اللي بينك وبين زيدان كل واحد ينعت الثاني بالمهايطي والله الظاهر انكم كلكم مهايطين من جد اقضبوا الارض انت وياه واتركوا سوالف المبزرة والحروب

اقتباس:

المشاركة الأصلية كتبت بواسطة حاكم بيزنطة هلا صباح النور ياخي زيدان هذا مسوي فيها فاهم كل شئ تصدق يقول عني مهايطي لهذه الدرجة مستهتر بإمكانياتي وشجاعتي وبطولاتي اللي لايوجد لها مثيل ياخي انا هتلر اتصل علي من قبره يقول انا اشوف فيك مواصفات القائد واتوقع انك انت اللي بتبيد يهود العالم جميعا من بعدي ويجي واحد اصلع اقرع ماعنده سالفة ويقول عني مهايطي ! يرضيك هالشئ نسى مغامراتي مع الفراعنة ومع الديناصورات لكن اذا ماصار نكتة المنتدى لا تسميني حاكم بيزنطة

حسيت ان حاكم شايل بخاطره ومستحيل انه يبدء الصلح
قلت خلني اكلم زيدان لعل وعسى انه يروح لحاكم وينهي الخلاف ويعتذر له

اقتباس:

المشاركة الأصلية كتبت بواسطة وزير البطالة صباح الخير يازيزو دخلت البارحة المنتدى الا واشوف الحرب الباردة قائمة بينك وبين حاكم بيزنطة وبيني وبينك انا سألت حاكم بيزنطة ويقول اللي بدء الاعتداء الغاشم هو الاقرع زيدان والمفروض ماتوصل لهاالدرجة بينكم لأنكم من خيرة الاعضاء ..!!

اقتباس:

المشاركة الأصلية كتبت بواسطة زيدان هلا وغلا بك ياوزير ياخي وينك من امس ؟؟! احسبك انحجزت بمركز التدريب قلت الله يستر شكله جاب العيد في هذا الاسبوع سألتني عن سالفتي انا وحاكم بيزنطة ياخي تراه يكذب عليك واللي بدء هو من قصصه المكذوبة هالادمي يرفع الضغط واكبر مهايطي بالعالم تلقاه في كل مكان يمدح نفسه بطريقة مباشرة وغير مباشرة لكن مااصير زيدان اذا ماخليته نكتة لكل اعضاء المنتدى

قلت ياساتر حتى زيدان راسه يابس
مالي الا اكلم قلب المملكه واخليه ينهي هالخلاف بطريقته الخاصة وبسلطته

اقتباس:

المشاركة الأصلية كتبت بواسطة وزير البطالة صباحك ورد ياقلب المملكة كيف حال حكومة المنتدى انشالله بخير تصدق انا مصدوم منك ..!! تشوف هالهواش والحرب بين زيدان وحاكم بيزنطة ولاتتحرك حتى توقف هالحرب ..! انا اللي اعرفه انك مثل المباحث تقبض على المجرمين قبل وقوع الجريمة بس مادري وش السالفة الحين جالس تتفرج ولا وترد بعد على مواضيعهم ..! والمشكلة جالسين يدخلون اعضاء المنتدى بحربهم مثل هيبة وكبتن عتيبه وطاغية الانوثة يعني المشكلة ممكن تكبر

اقتباس:

المشاركة الأصلية كتبت بواسطة قلب المملكة صبااحك ورد ياوزير شوف انا بقولك سر بس خله بيني وبينك انا متعمد اخليهم يهايطون على بعض وبكيفهم ويسبون بعضهم لاتحسبني غافل عن هذا الشئ لأن هالعضوين بصراحة رافعين ضغطي من زمان وودي اعطيهم باند بس مثل ماتدري ما اقدر اعطيهم باند كذا على الفاضي من الباب للشباك لازم يكون بسبب مقنع للإدارة فجات لي هالفرصة على طبق من ذهب وماراح افوتها بس اصبر كم يوم الين توصل الحرب الي مرحلة متقدمة ثم اصكهم بذاك الباند اللي على كيف كيفك واوعدك انك تدخل المنتدى الاسبوع الجاي وتلقى جنب معرف كل واحد منهم كلمة baned بس مثل ماقلت لك خل الموضوع سر

وهذا كل اللي صار بيني وبينهم
وقررت اكشف لكم السر