العنود اللي مساء البارح وانا سيد سهرها
اقبلت مثل البياض وودعت مثل برديه
المساء ضج بسوالف عطرها واشعل سفرها
والعروق اللي روت مسيارها خضر ونديه
مانشدت اخت المهاه اليا متى حزت خدرها
حد علمي : يوم أمد لجيدها شرهة يديه
عقدها المغرور .. تاه بعطرها ولا نحرها
ساعة(ن) أشره عليه .. وساعة(ن) يشره عليه
كل مالدت علي الماس والعقد يخزرها
قلت انا ماني خوي عادته ينسى خويه
ليتها تدري وعقد الماس لو يدري عذرها
اشهد ان الجمره اللي بالحشى مني وفيه
من سرت يمي وأنا مالي خيار الا قدرها
كنها كل السنين المقبله والأوليه
جادل(ن) كل الدروب المعشبه تنبت بأثرها
جت تبي جرح وقصيد .. (وخلت الثنتين ليه) !!
من يحدثني حديث الثلج للجمر بثغرها
أشهد اني كنت ناوي لي بهاك الجمر نيه
من نشد هاك الوساع الخرس عن دنيا حورها
وش جمع سحر الغموض بسحرها والنرجسيه
الوكاد .. إني بشط الكحل غنيت لبحرها
ماحلا هوسة هدبها والمساء والسامريه
من يعلم مستريح الريح عن فوضى شعرها
الحرير اللي كسى هاك المتون العسجديه
علموه ان مازح الغره ونشل عن قمرها
لايخاف ان شاف له ظلمى وشاف الشمس حيه !!