المشاركة الأصلية كتبت بواسطة تفاهم

حياك الله أكثر أخي الفاضل وشكرا على ردك وجوابك المنطقي لي وجعلك الله أخا ذخرا لنا ويرزقك من جناته ، لي بعض الاستفسارات:
1- أين أجد أسواق الجملة بالامارات من المنتجات التي ذكرتها وسبق وذكرت سوق نايف وانا متجولة به ولكن لاأدري هل هذه المحلات التي به هي مفرد أو جملة.

صحيح , عندك سوق نايف اللي هو سوق ديره , والبيع فيه بالجمله من كل شي واهم شي ( الجلابيات الفخمه + الجلابيات الشعبيه "حق البيت" + البلايز النسائيه والبناتية + الفساتين بانواعها + البيجامات النسائية والبناتية + الشنط النسائية + الاكسسوارات النسائية + المواد الخام لتغليف الهدايا وهدايا المواليد والاعراس + مفارش الطاولات المشغوله بالشك والتطريز + واشياء كثير ما تحضرني الأن ) وأيضاً الأجهزه الالكترونيه وهذي موجودة في شارع نايف عند محلات زينة السيارات بتلقين سوق الجمله تبع الجوالات ( الجوالات بانواعها + الأي فون + الأي بود + وشغلات ثانيه ) .

2- أين أجد السعوديين الجادين الذين يطلبون المنتج الراغبين وياحبذا تفيدني بالامر ونكون زملاء عمل.

بالنسبه للزبائن بتلقين كثير جدا جدا جدا وفوق ما تتصورين , ولكن المشكله بالجديه , وممكن تبدأين مع الأعضاء في المنتدى هنا , وممكن انتي تختاري من الأعضاء اللي تشوفين انهم جادين بتعاملهم بناءً على مشاركاتهم , ولا تتعاملين الا مع الجادين فقط , وبالنسبه لي انا ارجو المعذره لأن والله ما عندي الوقت الكافي ومجال عملي مختلف تماماً عن هالمجال .

3- بناءا الى عدم معرفتي بالشخص الذي يطلب البضاعة كيف يستطيع ان يرسل لي المال لاشحن بضاعته.

الموضوع هذا يعتمد على الثقه , يعني اذا وحده تبي طلبيه منك بقيمة 10000 الاف درهم وهي خايفه تحولك المبلغ , ممكن في البدايه تجزؤن الطلبيه , يعني تحولك 3000 الاف درهم وتشحنين لها بضاعه بنفس المبلغ وبعد ما توصلها تحولك الجزء الثاني وبعدها الجزء الثالث , وهكذا , وعموماً البداية بتكون متعبه شوي ولكن خلال ايام بتلاحظين إن الامور بدأت تتسهل من رب العالمين خصوصاً إذا كانت النوايا طيبه وصافيه .

4- طبعا ومن الواجب ان أعمل اعلانات في معظم المنتديات ولكن لو تعرف بضعة اشخاص معرفة حقيقة يكون الافضل لاني شخص احب التعامل بالسليم وعندي صبر وغير طامعة بما يقسمه الله لي.

صراحةً ما يحضرني احد الأن , ولكن لو تخشين قسم البيع والشراء في هذا المنتدى وتحاولين البحث في مواضيعه , بتستفيدين شغلتين وهي :
1/ انك بتتعرفين على الأعضاء المهتمين بالاستيراد والبيع ومدى جديتهم وممكن تراسلينهم وتعرضين خدماتك عليهم .
2/ انك بتتعرفين اكثر عن المنتجات المطلوبه والمتداولة في السعودية واللي عليها طلب .
وطول ما النيه صافيه ربي بيكتب التوفيق إن شاء الله .


5- ممكن ارسال ايميلي لمن يريد التعامل معي ومن خلالك ايضا وأعرف طلب مزعج لك مني ان تعطي ايميلك لي لاني فعلا جادة ومتوكله على رب العالمين لاستشيرك بما انعم الله عليك من معرفة بدراية هذه الامور.

وفقك اللــه

اختي الكريمة , نصيحتي لك هي :
1/ ابدأي بالبحث في المنتديات النسائية السعودية وخصوصاً اقسام ( البيع والشراء ) وحاولي تكتشفي المنتجات اللي عليها اقبال وطلب كبير من المتسوقين وسجليها عندك بالترتيب حسب الاهميه .
2/ بعد كذا ابدأي استفسري من الاعضاء اللي يبيعونها عن اسعارهم وطريقة بيعهم .
3/ بعد كذا انتي ابدأي ابحثي باسواق الجملة في دبي عن هذه المنتجات وعن اسعارها بالجملة .
4/ بعد كذا انتي تكوني عرفتي سعر بيع المنتج بالسعودية بالمفرد وعرفتي سعر نفس المنتج بدبي بالجملة !!!! تمام !!!! طيب لنفرض انك حصلتي منتج بالسعودية بسعر 100 درهم ونفس الممنتج موجود في دبي وسعره بالجمله 40 درهم ... هنا انتي ممكن تسوقين المنتج في المنتديات ( طبعاً تبيعين بالجملة ) بسعر 60 أو 70 درهم , بحيث اللي تشتري منك المنتج هي تبيعه وتتربح منه برضو ... إن شاء الله وصلت الفكره ؟؟