صرخة جامعي بدل غلاء المعيشه زيادة 5% للموضفين و و للمتقاعدين وو للمستفيدين من الضمان الاجتماعي وطلاب الجامعة ماياكلون ماحنا حاسديهم الله يهنيهم بالـ 5% لاكنا حنا الطلاب نستلم 840 ريال امااانه ذي تعيش احد 30 يوم مع مصاريف الدوام وايجار السكن.....الخ أنا امثل قرابة 50 % من طلاب الجامعات ابغى احصر لكم مكافئة الطلاب وين تروح : - ايجار السكن طبعا مو سكن جامعي بعيد شوي 1500 /3= 500 طبعا بتقولو ليه ماتسكن بسكن الجامعة ؛ سكن الجامعة غرفة وحده يسكنها اثنين عادي ماعندي مشكلة بس الزحمة الي تصير وقت حجز السكن يحول بيننا وبينه الواسطات وانتو ادرى بالواسطات والا والله ماكرهنا سكن نظيف ورخيس بس مافي اليد حيله 500 راحت في السكن تيب يبقى 340 نشوف وين تروح - المغسلة 50 البقالة قرابة 80 طبعا ذي على الواحد مو الثلاثة , البنشر 45 حق غيار الزيت المكتبة كل شهر تاخذ قرابة 40 شهري تصوير وبحوث وخرابيط جامعة , شحن الجوال كل شهر 20 حق الاتصال على الغاليه امي كل يوم دقيقتين صبح ومساء , والبنزين وما أدراك مالبنزين كل يوم 5 ريال بنزين حق الروحه والرجعه بس 150 بنزين . الحين صار 385 وهذي الضروريات بس . فين حق المعيشة ؟ كنا كل يوم 6 ريال سندويتش وعصير ؛ فطور وغدا وعشاء 6 ريال كل يوم تطلع 180 ريال شهريا قويه شوي واحنا الحين رصيدنا بالسالب يبغالنا نتسلف والمكافئة الي بعدها تنقص ونصير في عجز تام . قلنا مالنا غير التميس 4 تميس واحد فطور واحد غداء وواحد عشاء وواحد حق العصرية مع الشاهي كلام والله . التميس طلع حل مناسب الله يجزى راعي الفكره خير 4*30=120/4=30 طلع على الواحد 30 ريال حق المعوشة . توزيع المكافئة على النحو التالي : 500+50+80+45+40+20+150+30=915 ريال هذي الضروريات بس مافيها كبسات وتقاطيع وعلوم دسمه كلها قوت لا تموت . الحمد لله على كل حال بس تكفووون زيدو المكافئات تكفوون لو طلبت الأهل قالو وين تروح المكافئة اكيد انك تدخن ياويل حالي انا لاقي اكل عشان اكيف اااااه بس طبعا بتقولو ليه ما تتوظف رحت لعدة شركات وكان العذر اني طالب انتظام قلت بحول انتساب قالو خذ ملفك وارفق معه إفادة انك طالب انتساب ويصير خير ماعندي مشكلة احول انتساب بس المشكلة ما ادري يقبل او زي غيري حط ملفك ونتصل عليك واجلس في الشارع . وربي قهرررر اروح احمل ركاب يعطوني قسايم ممنوع سيارة خصوصي ياناس وين اروح او ركب معك مصري او باكستاني ومشورك 60 كيلو على 10 ذي تروح بنزين . من وين ماطقها عوجه . انا اكتب لكم هنا من قهري كل الناس لهم زيادة غير الطلاب احنا ما ناكل او غير البشر قالو طلاب ياشيخ مصروفه على اهله الاب يقول المكافئة تكفيك على باله 5000 مادرى عن الحال والواحد مايحب يشكي غير لربه ماتضيق الا وتنفرج ونحمد الله على كل حال . وابي المسولين يلتفتون للطلاب ويشوفون احوالهم بالذات الي في غربه وفيه طلاب متزوجين ومصروفه على الله ثم المكافئة . دعواتكم لنا بتحقيق المراد وخدمة الدين والشعب مع تحيات طالب جامعي احترم القانون