توك صغيره وابتديتي تحبين من علمك ليل السهر ياصغيره ؟
بدري عليك العشق يابنت هالحين حرام هذا القلب وشهو مصيره ؟
انتي بريئه في الهوا ليه تشقين؟ دروبه طوال ٍ عليك وعسيره
رحتي بدرب ٍ ماله اصلا ً عناوين وانتي مشاويرك من اول قصيره
ياطفلة ٍ حبّت وراحت على وين ؟ عقب الهنا ذقتي الحياه المريره
وينك ووين الحب والشوق والبين ؟ عميتي عيونك وصرتي سهيره
امحق تسلّي كان ودك تسلّين الورد لولا اللون وشهو عبيره ؟ ؟ ؟
خلّيتي دروسك وصرتي تحاتين الدرس في ديره وصرتي بديره
وصرتي بعد من غير هذا تغارين والمشكله يابنت منتتي خبيره
نصيحتي لك كان ودك تردين يم السعاده والحياه المثيره
خلّك بجو العايله لا تعدّين ماما وبابا والعجوز الضريره
شيبانك اللي ما يبونك تعانين من بينهم عشتي كأنك اميره
الحب قبلك هز ناس ٍ كثيرين خلا القلوب تعيش هم ٍ وحيره
والحب يفضح لا انكشف داخل العين وانتي بنفسك ما هقيتك بصيره
طيعي كلامي واحذري لا تمادين تراجعي لعل في الأمر خيره
عيشي الطفوله والبراءه لك سنين وبعدين حبّي لا غديتي كبيره