اقتباس:
المشاركة الأصلية كتبت بواسطة قلبي حنون
السلام عليكم اطلعت على افكارك واراءك اخوي فتى نجد وحبيت استشيرك في مشروع صيدليه .عرض عليه صيدلي مقيم موضوع فتح صيدليه يكن التمويل مني وانا طبعا موظفه حكوميه حابه الفكره بس خايفه خاصه ان تمويلي للمشروع عن طريق قرض من البنك والصيدلي مقيم ومن عروض الصيدلي ان الادويه تكون بخبرته ومعرفته بالشركات دون دفع مبالغ في البدايه لين تشتغل الصيدليه ويكون براتب في البدايه لين مارجع راس مالي وبعدين يسير شريكي اخوي فتى نجد مارايك في المشروع وهل هو مضمون ولوالمشروع ناجح كيف اضمن حقي وكيف تكون العقود وهل راس المال فعلا 150000ريال ارجو الرد علي ولاتواخذني في الاطاله جزاك الله خير
|
حياك ...
اختي الكريمه طبعاً أنا ما املك أي خبرة عن مشروع الصيدليات ولكن بعطيك رأيي من وجهة نظر عامة .
الصيدليات بشكل عام ارباحها مجزيه لأنها تعتمد بالمقام الأول على الكماليات أكثر من الأدوية , ولكن من وجهة نظري ( واحتمال كبير تكون خطأ !!!! ) اني اشوف بعض العوائق مثل :
ــ المنافسه الشرسه من كبرى الصيدليات مثل ( النهدي - كنوز الصحة - زهرة الروضة - السقاف .... الخ ) لدرجة اننا نشوف صيدليتين متقابلتين بنفس الشارع لشركة وحدة , وبعض الشركات وصل عدد فروعها الى اكثر من 200 فرع .
ــ عدم امتلاكك للخبرة الكافية في هذا المجال , مع ملاحظة ان هذا المجال يعتبر من المجالات الصعبه وخبرته تحتاج وقت كبير , وصعب انك تمنحين ثقتك بطبيب اجنبي عشان يدير مشروعك لأن الشركات اللي بتنزل بضائع على الدين بتاخذ منك خطابات التزام بتسديد المبالغ , يعني ممكن يوصل دين الصيدلية الى اكثر من 300 الف ريال ( بالراحه طبعاً ) والابره والمخيط بيد الطبيب الاجنبي , فلو لاقدر الله لعب لعبه قذره وضربك بهالمبلغ !!!!!!! وش الحل وقتها .
ــ بحكم انك امرأة , هذا يصعب الموضوع اكثر واكثر ويعطي الدكتور الاجنبي حرية اكثر في اللف والدوران اذا كان ضعيف نفس لأن حركتك ومتابعتك لشغلك بتكون محدودة جداً جداً , وحتى لو كان لك وكيل رجل ( زوجك او اخوك او والدك ) ما اعتقد بيقدرون يظبطون الاشراف لأنهم ما يملكون خبره في هالمجال ولصعوبة الخبره فيه نظراً لكثرة المنتجات و الموردين واختلاف عقود الاتفاق من مورد لأخر .
ــ حسب علمي من فترة طويلة , إن رخص الصيدليات لا تصرف إلا للصيادلة السعوديين فقط , حسب النظام .
ــ الاولين ( شيبان أول يعني ) عندهم مثل يقول (( حلالٍ تــودعـــــه .... بـعـــه )) .
من رأيي تبحثين عن مشروع تقدرين تشرفين عليه بنفسك , خصوصاً إن مبلغ 150 الف ريال تعتبر رأس مال ممتاز , وممكن مثلاً تفتحين بوتيك ملابس نسائية ( بلايز - تنانير - فساتين - شنط - اكسسوارات ) وممكن تستأجرين البوتيك داخل مشغل يكون موقعه ممتاز , بحيث تجيبين هالشغلات بنفسك من ( تركيا - تايلند - الصين - دبي ) وبأذواق حلوه وارباحها ممتازة جدا جدا جدا , وتسويقها وإدارتها سهل جدا بالنسبه لك كإمرأة .
وبالتوفيق إن شاء الله ...