السلام عليكم
بالنسبه لسوق السيارات هو سوق مربح , وعندنا بحارجات جده كثير من الاجانب اصبحوا مليونيرات,
بانصحك ومن واقع خيره ولا ارجو منك الا دعوه بظهر الغيب.
اولا تحتاج خبره,
طيب كيف تجيب الخبره!!؟؟
ملاحظه بعض الاخوان يقولون اذا ما تعرف صاحب معرض بتتعب, هذا الكلام غير صحيح!!
لان صاحب المعرض بيستفيد منك, يعني مصلحه متبادله, اذا كل اسبوع تشتري وتبيع عن طريق المعرض سيارات
نقول مثلا 3 سيارات, يعني انت مربحه مبيايعه لشراء السياره ومثلها في بيعك لها, غير حق الميكرفون,
يعني باقل تقدير يكون حق الميكرفون 300 ريال يعني السياره يوم شريتها دفعت للمعرض 300 ويم بيعا كذلك 600 ريال لكل سياره, توضيح لمدى علاقتك مع صاحب المعرض " مصلحه مشتركه"
في المعارض ما أحد يرحم احد مثل السمك كبيره ياكل صغيره, اذا ماكنت صاحب نفس طويل !!
نرجع لموضوع الخبره:
قلت لي راس مالك 100 ألف
نبدأ من الاول... وهذه االطريقه ان اشتغلت فيها في بداياتي والحمد لله,, طبعا زمن التعليم المجاني انتهى !!
اولا:
داوم في الحراج لمدة شهر كامل كل عصريه وانت مسنتر بالحراج, مر على السيارات وش كيف يحرجون عليها ,
حاول انك تضع سعر في بالك "خمن كم تسوى السياره المحرج عليها" يعني يحرجون على سياره قول مثلا هالسياره حقها بالكثير 15 ألف , وشف توقعك صحيح ولا ,,,لا. حاول تتعرف على المحرجين وأسالهم .
شف لك اكبر معرض وفيه نسبة مشترين كثير , وحاول تمر عليه كثير وتتفرج على الحراج ,
ركز على ايام العطل الخميس والجمعه الحركه اكثر والبيع والشراء اكثر.
طبعا انت بهالطريقه بتتعرف حتى على الشريطيه من كثر ماتشوفهم بتعرفهم , وما تتورط وتشتري منهم...!!
خلا ل هذا الشهر بحول الله , بتكون توقعاتك لاسعار السيارات قريبه جدا. وحاول تركز على نوعين او ثلاثه انواع من السيارات حتى لا تتشتت.
انتهى الشهر,,!!!!
تكون تعرف على احد المحرجين :
مهم جدااااااااااا
اتفق مع المحرج اذا شاف سياره سعرها طيب وفي مربح يدلك عليها....!!!
واحد يقول وش مصلحته!!
اتفق معه اذا اشتريت السياره من تحت الميكرفون من عنده, طبعا مع خيرتك البسيطه اللي استفده خلال الشهر,
وتبيعها عن طريقه من تحت الميكرفون اللي هو يحرج عليه "تعطيه نسبه من المربح " مثلا ثلث الربح.
هنا اصبحت مرتبط معه في مصلحه مشتركه , وبيساعدك لانه شريك معك.
طبعا انت وشطارتك ممكن تستمر على الوضع هذا شهر او شهرين لين تجتاز هالفتره ويصبح عندك خبره في طريقة البيع والشراء, وبعدين قوله "جمل الله حالك"
اذا كنت مصحصح ان شاء الله خلال 3 أشهلا بتكون ذيباااااان وما عليك خوف.
طبعا نرجع لموضوع الـ100 الف!!
خلال الثلاث اشهر حاول يكون مشتراك لسيارات في حدود الـ15 الف .فقط لاغير...
السبب مثل هالسيارات بتكون اقل خسائر ,
انسى باقي المبلغ اشتغل بس بـ15 الف ,
بعد ثلاث اشهر اذا شفت نفسك ,وهذا من خلال تقييمك لارباحك يمكن تزيد المبلغ وتشتغل بسيارات اسعارها من الـ30 الف وفوق , ويفض لا يكون راس مالك كله سيارات,
يعني سياراتين من 30 الف , لاتشتري الا اذا بعت او طبيت في صيده واضحه.
......
حاول تشتري السياره كنها لك ودك تستخدمها !!
معادلة سوق السيارات:
البايع زهقان.... والشاري رغبان
كيف تستفيد من هالمعادله.
احيانا واحد يبيع سيارته , نظيفه , لكن اسطب مهو شغال . صدام في حكات. طبلون مشقق.
انت تشتريها وحاول مثلا ترش الصدامات , تصلح الانوار الاسطبات, ترمم الطبلون.
عشان الشاري رغبان يبي كل شي جاهز.
حاول تتعرف على ورش بالصناعيه اسعارهم زينه وشغلهم زين, وعلمهم انك شغال بالحراج , وبتكون زبون مستديم عندهم ,,,,
احسب حساب الاصلاحات المطلوبه في السياره ,احسب حساب الاستماره اذا منتهيه , احسب حساب المبايعه , كل هذا قبل المزايده على السياره حتى تعرف كم تكون تكلفت السياره عليك , وهل فيها مربح ام لا
حط في بالك وانا اخوك , انه مثل مافيه مربح فيه خساره,
والله احيانا كنت اتعب في السياره واصلاحاتها وا بيعها بخساره, واحيانا تشتري سياره بعد ساعه وتكون مادفعت فيها شي وبعد ساعه تربح 1000 ريال,
ابتعد عن بيع النجش. ويمكن يمر عليك بعض الشريطيه يزايدون على سيارتك من باب الخدمه لك , اذا شافوا زبون
شراي "وهذا بيع النجش المنهي عنه" قفل عليهم وقل ماني بحاجه للمزايده منكم....
اعتذر عن عدم ترتيب افكاري
ولكن اذا ودك تسأل عن شي لايردك الا الكي بورد