ياجر قلبي جـر لـدن الغصونـي
وغصون سدر ٍ جرها السيل جـرا
وأهله من أول بالورق يورقونـي
على غديـر ٍ تحتـه المـا يقـرا
على الذي مشيه تخطـا بهونـي
وعصير من بين الفريقيـن مـرا
لا والله اللي بالهـوى هوجرونـي
هجر ٍ بها الحيلات عيّـت تسـرا
لا مبعـد ٍ عنهـم ولا قربـونـي
ولاعايف ٍ منهـم ولانـي بمـورا
واكثر عذاب القلب يوم سنحونـي
بيّح ابصبري لـو بغيـت اتـدرا
لاضاق صدري قمت اباري ضعوني
كني غريـب ٍ بالدلوهـة مضـرا
وقلبي عليه اشفق وتبكي عيونـي
والحـال مـن ود الحبيّـب تبـرا
ياعزتا لي من تفـرق اشطونـي
ياعزالي ارمـي بالسلـب واتعـرا
ان مت في خـد ٍ بعيـد انقلونـي
على هـدي الزمـل مشيـه تـدرا
ان مت في دافي حشـاه ادفنونـي
في مستكن الـروح ماهـو ببـرا
ياليتهـم بالحـب مـا ولعونـي
كان ابعدوا عنـي بخيـر ٍ وشـرا
ولا انهـم يـوم انهـم قربونـي
خلوني اقضـي حاجتـي واتـدرا
وياليتهم في الدرب ما واجهونـي
وياليتهـم مـازادوا الحـر حـرا
وياليتهم عن حاجتـي سايلونـي
يوم ٍ اني اقعـد عندهـم واتحـرا
الخد برق ٍ فـي علـو المزونـي
تقول براق ٍ مـن الصيـف سـرا
وقفت عنـده شابحـات ٍ عيونـي
كنـي غريـر ٍ باللهاوي مضـرا