مناحي بن طنيف العصيمي
تغرب بين الولايات المتحدة وبريطانيا ردحا من الزمن ... فهزه الحنين الى الوطن !
له ابيات صدح بها من لندن وقد هاجه مسيل الماء ورعاد السحاب ووميض البرق.. اوردها لكم هنا ..
سيلٍ تحدّر شاق عيني .. مسيلك
الله لو من عالية نجد منشاك
خلّك تجي هاك الهضاب وتجيلك
عطشانةٍ .. ويعانق ترابها ماك
يانجد .. لوتدري بمن ينتميلك
اللّي حداه البعد .. والشوق فتّاك
يادار .. لو تنشال .. قلبي مشيلك
والدم يرخص لانثرته لعيناك
مهما نسوّي مالحقنا جميلك
الروح قبل المال والحال تفداك
رحنا .. وشفنا .. مالقينا مثيلك
وقلوبنا مالاعها مثل فرقاك
ياصاحبي .. من غربتك وش حصيلك
اسمع كلامي كان بلواي بلواك
ماينفعك لوقلت .. ياعزتيلك
لكن تذكر ويش خليته هناك
تذكّر الدلّة .. وبنّك .. وهيلك
والنار لاشبّيت .. والليل لمساك
والضيف والترحاب ويش ايعَنيلك
والجار وابن العم طربان لاجاك
والبر .. والمقناص .. مايستويلك
الاّ على الفكس آر .. والطير ويّاك
والرفقه اللّي ماتدّور بديلك
للمرجلة والطيب والعز ملاّك
والخلفة اللّي لا ضوت تنحنيلك
من بين كل الذود ترقب محيّاك
واخير من هذا .. وقلبك دليلك
خمسٍ ترى مارامها كود شرواك
الفجر .. والمسجد .. وخطوة رجيلك
والطيب .. والمسواك من شجْرة الرّاك
هذا الكلام .. وشد بالحيل حيلك
عبّرت لك والوضع ماهوب يخفاك