السلام عليكم

كيفكم يالعاطلين الباطلين ان شاء الله انكم بأتم الصحه والعافية

انا لي مدة اتابع منتداكم بس على الصامت ومن دون تسجيل

وكنت كل ماضاقت على الوسيعة ادخل هنا مادري ليه ؟؟ يمكن عشان الموت مع الجماعة رحمة

الله يرزقنا وياكم الوظيفه السنعه المحترمه

الله لايحيجنا الا لوجهه الكريم

المهم

انا لي خمس سنوات من تخرجت وقدمت على كل البنوك وعلى التعليم والى الحين لاحس ولا خبر

الوكاد اني قررت اشتغل بنفسي

مو معقول تنتهي حياتي معقده نفسي بأنتظار وهم 10 بالمية يحصل و 90 بالمية مايحصل

طبعا فكرت مين اسأل ومن مين استفسر قلت اصحاب الخبرة طبعا

وقمت قطيت وجهي على اصحاب وصاحبات المحلات ... بس للاسف الكل بهالزمن بقلبه حسد ماحد يبي لغيره الخير حتى لو كان ماهو بديرته ولا هو حوله هو وتجارته

مشروعي ياطويلين العمر ستوديو تصوير + محل طباعة ((تيشيرتات + كيك + اكواب + كابات + ميدليات + سيراميك + خشب)) وطبعا المشروع نسائي لانه البنات يفتقدون المشاريع اللي زي كذا كل مافكرنا نطبع شي نستصعب الامر لانه بأيدين رجال فنضطر نحط صورة الزوج او الابن

طبعا راح ابدا مشروعي بشكل مبسط وعلى قدي

لقيت محل بسوق نسائي ايجاره الشهري 750 ريال

يعني يابلاش

وشريت كاميرا احترافيه والحمدلله مضبطه اموري واعرف للطباعه وللكميرا وللشغل على الكمبيوتر

اللي عايقني الحين بعض الشغلات

1- لو ابي اطلع رخصة للمحل قالوا لي لازم من وزارة الاعلام ومن البلديه وممكن يطولون مدة سنة لين يجي الترخيص هل هالكلام صحيح ؟؟

2- لو ابي احط معقب يتابع اوراقي كم تكلفته ؟؟

3- لو ابي مكاين الطباعة ياليت اللي عنده خبره يقولي وش افضل ماركة ومن وين اجيبهم من برا ولا من هنا ؟؟ وكم توصل اسعارهم هذا اهم شي

4- اقدر اسمي المحل اسم اجنبي ؟؟

5- اقدر استأجر المحل قبل اطلع الرخصه ؟؟

وعندي استفسارات كثير بمخي لما ارتبهم راح احطهم هنا وخابره انكم ماتقصرون شكرا مقدما