وعليكم السلام ورحمة الله وبركاته
ابشر بالرد والتشجبع بعد
الله يقويك ويعينك
انا بعطيك تجربتي في محل خضار سابقا
طبعا الديكور له دور ولكن ماهو اساس بالمحل اهم شي الزبون يجي يحصل اللي يبي وتكون اسعارك مناسبه ولاتستعجل الربح الشي الثاني تحافظ على بروده المحل لان الخضار تتاثر بالحرارة وممكن تضيف للمحل اشياءغير الخضار تعتبر رافد لك مثل البيض والعسل والمكسرات مااحد يمنعك كل المحلات تبيع كذا خصوصا ان الاشياء هاذي ماتخرب بسرعة حاول توفر توصيل للمنازل وتستلم لك كم بيت توصل لهم بكذا تضمن دخل ثابت للمحل والتوصيل مهو لازم سياره ممكن دباب ب2000 ريال وممكن تضيف فريزر وتحط خضار مجمدة.
وفيه فكره انا ماسويتها بس اتوقع تفيدك تسوي سوق اسمه سوق الجمعة وتسوي له اعلان توزعه ع كل بيوت الحاره بحيث تسوي اسعار مخفضة يوم الجمعه من كل اسبوع من بعد الصلاة الى صلاة العصر طبعا الفايدة من هالحركة ان الزبون اللي يجيك يوم الجمعة لو احتاج شي يوم السبت راح يرجع لك وانت تبي تكسب زبون دائم باذن الله
ايه قبل لاانسى مهم جدا الانتظام بمواعيد فتح المحل وتقفيله مو يوم بدري ويوم متاخر
وسلامتك
لو تذكر لنا وين مكانك وخلني اشوف واحد من اعضاء المنتدى من جيرانك ولا يشتري منك