السلام عليكم ورحمه الله وبركاته

اسئل الله العظيم بمنه وكرمه بان يوفق كل اخواني الاعزاء اللذين سبق لهم بان قدموا على الوظائف المعلن عنها يارب العالمين وان يوفقني وياهم .... اما بخصوص الاخوان اللي يسئلوا هل مازال التقديم مستمر او لا .. والله ماعندي فكره بس شايف الاخوان يقولوا انه لازال مستمر وياريت احد يطرح الرقم عشان يتئكدوا الاخوان .

وبعدين بخصوص اللي يسئل عن طريقة التقديم كان اخونا نواف الميمني منزل موضوع وطارح فيه كل البيانات والله دورت عليه ماني شايفه لانو كان فيه رقم ترسل عليه رساله نصيه تحوي اسمك ومؤهللك ورقم تليفونك ثاني يوم يدقوا عليك زي ماصار معاي وفيه واحد من الاصحاب اعطيته الخبر فلعصريه قام ارسلهم البيانات الساعه عشره فليل داقين عليه وحددوا معاه موعد المقابله .. على ما اظن الاخ هاني فنفس الموضوع هاذا له رد حاطط فيه الرقم

ولو ارسلت الرقم وماحد رد عليك خلاص اتجه عليهم مباشره

مكانهم فمخطط الحمرا ... بلنسبه للي جايين من جده بس توصل اشاره الدوارق اللي هيا بداية الخط السريع من مكه تدور مع الاشاره كانك راجع جده ثاني بتمشي شويه بعد سوق الحجاز بتجيك يد على اليمين باتخذها تمشي على طوول لمن تجيك الاشاره بتدور مع الاشاره وترجع بنفس الخطاول محطه اسمها محطة الفتح سيبها ثاني محطه بعدها اسمها المعطاني على يمينك هدي وخش من عندها راح تشوف قاعة ريماس على يسارك وراح تشوف سيارات المتقدمين اصلا


طريقتهم فلاختبار بسيطه صراحه اول مابتخش راح تسحب رقم من اللجنه وتجلس تنتظر دورك
بعد كذا يزهموا بلرقم راح تتقدم هو يطلب منك صورة الشهاده وصوره شخصيه والسيره الذاتيه وصوره للبطاقه ... السيره الذاتيه ورقه موجوده عندهم انت تقوم بتعبئتها

ويمكن يسئللك بعض الاسئله انت شغال او قد اشتغلت اسئله مررره عاديه وبعد كذا يقوللك خلاص اتفضل استريح مكانك لمن ينادوك الاخوان
شويه الا ويزهم عليك باسمك لاجراء المقابله الشخصيه
عاد زي ماقالو الاخوان بتجلس وبيسئللك فلغتك الانقليزيه ولو قلتله اني تمام او يعني لغتي جديه يقوللك طيب عبرلي عن نفسك بلانقليزي .. زي ماصار معاي ههههههههههه
وبعدين يوريك نموذج داخله عدة صور حوالي خمس صور كل صوره الوان متناسقه مداخله على بعضها يطلب منك ترتيبها عدديا من الواحد الى الخمسه فنموذج اخر مصور تقوم انت بترقيمها

عااد ايوه اذا كنت زيي ماتحيك الانقليزي خلااص يقوللك بلنسبه للك عندنا للك وظيفة حامل حقائب او جرسوون او مساعد طباخ او مكوجي وكذا وظيفه معاها اختار منها
عاد انت تخار بعد كذا يقوللك خلاص الله يوفقك خوذ هاذي الاوراق وتجه على القرصان او جيم نت فلنزهه ..... والله محل القرصان ماني عارفه وين لا كن انا اختبرت فجيم نت فلنزهه خلف مطعم اسكندر كباب مقابل لمطعم جنوب شرق اسيا

اختبار الحاسب سهل عندك مشرف اي شي صعب عليك ازهم عليه وستفسر منه وهم اصلا متساهلين راح يساعدوك فبعض الاشياء لمن يبدا الاختبار

بعد كذا انتا تختبر بنفسك والاسئله مرره سهله اختيارات كل سؤال له فتره زمنيه محدده حوالي 30 ثانيه عشان تجاوب عليه لو ماجاوبت فلفتره الزمنيه المحدده على طوول يروح لسؤال اللي بعده

الاسئله زي ماقلت مرره سهله زي مثلا هل تحب العمل فمكان متسخ يحطوللك ثلاث خيارت انت تختار الاجابه اللي تشوفها صح

مثلا هل تحب مساعده الاخرين ويحطوللك خيارات ونت تختار يعني حجاجت بس يبالها ترويق وماعليك متى ماخلصت خلصت لانها بصراحه مرره كثيره حوالي 150 سؤال

هاذ اللي حبيت اشارك فيه وربنا يوفقنا اجمعين يارب العالمين

قسما بمن انزل القران ماودي سعودي واحد اشوفه عاطل وياليت الامر بايدي

لاكن مانقول غير الحمد لله والله يحسن الامور وحسبنا الله ونعم الوكيل على من كان السبب

سؤالي يا اخوان انا سويت الاختبار يوم الاربعاء بس للحين مادقوا علي فيه احد اختبر يوم الاربعاء ودقوا عليه او فيه احد من الاخوان اللي قدموا بعد اختبار الحاسب دقوا عليه

دمتم بكل ود