هلابك عندك بالرحيل

ادري ان الكثير يعرفون الذهب ومغيب عليهم اسرار البيع والشرى فيه وهذا الي يفتح المجال لرفع الاسعار بشكل غير مبرر لان البائع يواجه انسان يشتري الذهب على انه ذهب ويكون الفرق عنده عيار 21 او عيار 18

وبيني وبينك مليت من الشرح لان من الصعب توجز دوره خاصه وخبرة عمل وطريقة تفاوض في مجرد موضوع فاخر واحد استلمت مكانه عملية التفاوض على الشرى نزلت له من اعلى من 13 الف الى 9800 وكسور ناسي كم الريالات ووضحت له ان مكسب محل الذهب منه تراجع الى حدود 425 ريال من اصل المبلغ الي دفعه بدل ما يدفع مبلغ اضافي بقرابة 4 الاف ريال

كيف تعرف سعر القطعه الي تبي تشتريها فاول شي لازم تعرف سعر الجرام لعيار الذهب الي تشتريه + سعر المصنعيه + السعر المحدد للمكسب في اسواق الذهب

فسعر جرام الذهب بالريال تقدر تجيبه عن طريق معادله بسيطه
سعر الاونصه بالدولار × 3.75 /31.1 × العيار / 24

فهذي تطلع منها سعر الجرام بالتعرف على سعر الاونصه

فسعر الاونصه اليوم تقريبا 1256 دولار وتبي تطلع سعر الجرام لعيار 21

1256×3.75/31.1 ×21/24 = 132.5 ريال

وسعر الجرام لعيار 18 بدل تعيد نفس المعادله تاخذ سعر عيار 21 وتضربه في 18/21

132.5×18/21 = 113.5 ريال

راح تلاقي في محلات الذهب سعر الشرا اقل من سعر اليوم بحدود الريال للريال ونص فوش السعر الصواب

لما تبيع الذهب يخصم عليك في عيار 21 ربع ريال من كل جرام عن سعر الذهب لنفس العيار

اما عيار 18 فيخصم عليك نصف ريال من كل جرام عن سعر الذهب لنفس العيار

حبيت اضيف طريقه حسابيه بسيطه تكون معاك على طول والي ما يعرف يحسب هذا موقع يعطيه العمليه الحسابيه والمعدل اليومي جاهز من هنا

http://saudi-arabia.gold-price-today.com/

نجي للمصنعيه وهي اجرة المصنع اثناء تصنيع الذهب والمجوهرات وكلكم تعرفون مصنعية غسان وطيبه ولازوردي والرميزان وكويتي وبحريني وسنغافوري وايطالي وهلم جر وكل منطقه او مدينه او طبقه لها ذوقها في الاختيار فالي يبي ذهب اصفر والي يبي ذهب ملون والي يبي ذهب ابيض او يبي بفصوص او بدون فصوص وتتراوح مصنعيات الجرام من 3 ريال الى فوق 35 ريال واقل المصنعيات عاده هي مصنعية الذهب الاصفر الخالي من الفصوص والي عياره اعلى وكلما قل العيار كلما زاد السعر بسبب الصلابه لدخول معادن مع الذهب تزيده صلابه وتزيد معاه صعوبة صياغته من المصنع فيرفع السعر لمصنعية الجرام وكلما تم اضافة لون وزركون او فصوص زاد السعر في المصنعيه مع ملاحظة ان اذا كان وزن الذهب اقل من الجرام فراح يكون شبه ثابت

فإنت تاخذ سعر الجرام وتضيف عليه سعر المصنعيه الي شراها المحل من المصنع

مثلا عندك ذهب اصفر ساده حق العجايز خالي من الفصوص وماعليه اي لون والعيار 21 فمصنعيته 3 ريال في العاده

تجي وتاخذ سعر الجرام 21 لليوم وتضيف عليه 3 ريال

132.5 + 3 = 135.5 ريال فهذا السعر الي هو سعر العيار لليوم وسعر المصنعيه الي تضاف بشكل ثابت سواء ارتفع سعر العيار لليوم او نزل

إذا عرفت الشي هذا فوقته تطبق على باقي المصنعيات باضافة اللون والزركون تزيد المصنعيه والعيار كلما قل كلما ارتفعت المصنعيه وبدل ما نخش في تفاصيل كل المصنعيات و يطول الشرح فضيف ما بين 4 الى 5 ريال الى كل اضافه للعيار فمثلا اضيف لون على الذهب الاصفر ضيف ما بين 4 الى 5 ريال وزيه لو اضيف الزركون فقط ولو اضيف مع اللون زركون ضيف من اربع الى خمس ريال تقريبا على المصنعيه وبرضوا العيار ضيف من اربعه لخمس ريال تقريبا

بمعنى اربع الى خمس للون + اربعه لخمسه زركون + اربعه لخمسه عيار اقل ثم ضيف عليه سعر الذهب للعيار

ومن محلات الذهب تقدر تسأل عن المصنعيه وسعر المصنعيه للجرام حتى تعرف اسعار المصنعيه الموجوده عندك

نجي للمكسب المحدد وهو ما بين 6 ريال الى 12 ريال ويكون المسؤول عن ضبط الاسعار شيخ الذهب في السوق

فهذا المجال الي تتفاوض فيه وعادة يتجاوزه البائعين بلا مبالاه

وعادة ما يرتفع سعر الكسب في الجرام اعلى كلما قلت عدد الجرامات وعادة ينزل سعر الكسب في الجرام كلما زادت الجرامات

خلنا نقول مثلا عيار ذهب 18 سعره اليوم 113.5 ذهب ابيض وعليه زركون مصنعيته مابين 15 الى 18 وناخذ وحده منها وكان الوزن 28.4 جرام

فتاخذ الاله وتحسب ( 113.5 + 15 ) × 28.4 = 3649 ريال وهذا السعر بالمصنعيه

الحد الاعلى للمكسب فيها 12 × 28.4 = 340 ريال والحد الادنى نصفها وهذا الي يجري عليه التفاوض بلا ضرر ولا ضرار وما زاد فهو ضرر عليك وما نقص فهو ضرر على صاحب المحل


الا في حالة ان يبيعك ذهب مستعمل تم تنضيفه وعرضه للبيع من جديد


بالنسبه لسؤالك عن كيف اشتري ذهب في موسم الرخص فعندك جنيهات الذهب تشتريها واذا ارتفع السعر تبيعها وإذا ما توفرت تشتري كسر الذهب خالي من الفصوص والزركون إذا توفر لك ولقيت محل يحتاج سيوله لانها تنزل عنك المصنعيه وتتابع عن طريق الموقع او التلفون اسعار الذهب او عن طريق السوق نفسه

بالنسبه للبيع فوقت البيع يطيح وزن الفصوص الكبار وعادة يطيح سعر الزركون مع مصنعيتها والمكسب وعندك طريقتين لحساب الزركون ان ما قدرت تبيعه اياه بسعر اعلى اذا كان جديد ونضيف وقابل للتنضيف والعرض فإذا كان قديم او ناقص فخلنا ناخذ حساب الزركون لانه متعارف عليه وشبه ثابت كم يكون وزنه فكل 30 فص زركون وزنه جرام فطالع لعدد الزركونات وتقسمها على 30 لجل تعرف وزنها وكم راح ينخصم من وزن الذهب بعد الكسر وتستثني الفصوص الكبار لانها تحتاج لوزن على حسب حجمها ثم تخصم من الذهب

هذا الي ابيك تستفيد منه في معرفة السعر الحقيقي للذهب الي تشتريه فما تشتريه باسعار غاليه غير مبرره وما تنزل بسعر غير مبرر وتكون مضر لصاحب المحل الا في حالة ان تكون الاوزان كبيره فعندك امكانية التفاوض والتقبل من البائعين للتنزيل دون 6 ريال ومو خسران شي ولا المحل خسران دام بالمبلغ بيشتري في نفس اليوم او اليوم التالي ذهب جديد