السلام عليكم ورحمة الله وبركاته


تجرأت ان اكتب موضوع خاص بمشكلتي مع الصندوق ساعة ماقرات موضوعك اخي مشعل نجد
والهدف اني اخطف الاضواء قليلا لانجازات موضفي صندوق المئويه الذين يعتبرون الاخوان الذين لم تلدهم امهاتنا المقدرين لمعاناتنا وفقرنا وتعاستنا ورفض المجتمع منا ..

انا يأخوان ساكن في منطقه عسكريه مملوكه من الدوله واستأجرت محل تجاري في احد الاسواق باسم الوالد لاني لست منتسب في الغرفه التجاريه وكانت شهادت الانتساب شرط من شروط الوزاره المالكه للمواقع التجاريه لكي تستأجر منهم ,, وقدمت على الصندوق بعقد بيني وبين الوالد من احد المكاتب وجائتني الموافقه واستلمت تقريبا بعد انتضار طويل 37000 الف من اصل 99652 الف ريال اجمالي مبلغ القرض واشتغلت في الديكور والابواب وبعد ماخلصت ارسلت لصندوق المئويه التسعيرات المتبقيه بينها تسعيرة البضاعه ولم يسلموني هذه الدفعات الا برخصة المحل وهذا مافهمته منهم .. رحت عند الوزاره المالكة للموقع التجاري ومعي تقرير خطي بالتنازل لي بالمحل من الوالد لكي اخلص اجرات الرخصه ولكنهم رفضو طلبي بحجة ان عدد طلب المحلات كثر ولابد من تسليمها ليتم عرضها في مزاد ليتم المساواه بينهم ..حاولت معهم وفهمتهم ولكن للاسف قالو لي مانقدر نوافق على التنازل .. في هاذه الحاله حسيت اني وقعت في مصيبه لاني لو اسلم المحل للمزاد راح يزيد ثلاث اضعاف من سعر ايجاره الحالي وهو ( 15000 )الف ولايوجد ضمانه بان المحل راح يرجع لي .. وايضا لايوجد لدي منزل في احد المدن القريبه علشان انقل مشروعي وانقل انا معه يعني الوضع يبغاله سكن وايجار وعفش وراس مال ثاني .. والخ ( بمعنى ان الوضع متأزم )قعدت افكر شهر شهرين ( والمحل مسكر طبعا ) ولا اريد ان يعلم الصندوق بذلك ويجبروني على الانسحاب لان قسم بالله اني ماراح اجد غيرالصندوق بيقرضني ..فكرت شهر كمان الين جاني الحل .. وحل خطير اني اسوي الرخصه باسم الوالد من البلديه وبعدين يسوي لي الوالد تنازل ولكن موظفين البلديه عندهم تحذير مسيق عن ذلك ومانجحت الفكره رغم التلفيق والكذب من طرفي عليهم .. قعدت شهر بعده افكر واطلب المشوره الى ان جاني الحل ولايوجد غيره وهو اخبار الصندوق بذلك ... ورحت لصندوق المئويه في الرياض لمقابلة احد المسئولين عشان اشرح له الموضوع ويساعدني في المشكله ولكن للاسف نطلوني وطنشوني تطنيشه بنت ستة وستين كلب .. من الساعه 10 الى الساعه 3 تقريبا وانا احب راس السكرتي علشان احد يقابلني او يدخلني عليهم قعدت هناك الييييييين انكسر كبريائي وحسيت اني مثير للشفقه في اعينهم رميت التسعيرات فوق مكتب السكرتي ومشيت 400 كيلو راجع للشرقيه بدون اي فائده وحامل معي عزة نفسي التى لايوجد لي راس مال غيرها ,,,,,,,,,, وخلهم يدورون لي ..
والمصيبه الكبيره ان عندي ارقام موضفين في الصندوق ولاقدرت اشرح لهم الوضع لان معي تجارب سابقه معهم يوم تكلمهم او تطلب منهم شي كانك تطلب منهم سلف او دين .. وعندما يستمع لك يقول طيب باكلمك بعد شوي ...تنتظر تنتظر ماعاد يكلمك وبعد يومين تدق عليه ( عشان لاتحس نفسك ثقلت عليه وتدق عليه في نفس اليوم ) وعندما تدق عليه بعد يومين ينساك وينسى موضوعك ومتى دقيت اصلا ( فكيف اشرح لهم موضوع مثل هذا في التلفون يبغاله اذان صاغيه ومتفهمه ).. وللاسف كانك ياهذا ماتنعطى وجه ,,,ان كلمتهم حقروك وان تركتهم طنشوك ونسوك ولا يعلمون اننا نعاني حتى في جلب التسعيرات لهم ورفض الكثير المحلات التجاريه باعطائنا تسعيرات ضنن منهم باننا سندخل بالتسعيرات مناقصات حكوميه وتجاريه , واننا نخدعهم ناخذ التسعيرات الاعلى منهم ونسوى بمؤسستنا تسعيره انقص منهم ونكسب المناقصات . ومايدرون اننا مساكين هاربين من الفقر ندور مايرفعنا ويحد من معاناتنا وليت من طلبو منا ذلك يقدروووون ...

وانا الان في انتظارهم يتذكروني ويمكن قبلهم تتذكر الدولهاو الوزاره ( المحل التجاري المستأجر ) وبتسألني ليش مسكر وتسحبه مفاتيحه علي,, والصندوق بعد ماتذكرني,وكانك يابو زيد ماغزيت


لذا ارجو المساعده منكم انتم ياخوان ان وجد حل لهذه المعضله او خلوني اتجهز لابو زعبل وانتظر الاعفاء رغم انني اشك والله انه انفع لي يمكن احفظ القران و اطلع داعيه من بعد خروجي >> متجهز ماعد فيها




..والله يفرج عنا وعنكم وعن سائر المسلمين