السلام عليكم طاب صباحكم

اولا اعتذر لكم عن غيابي بسبب حادث وبعدين عملية...قررت اغير جو قلت ابطلع لأبها ويوم وصلت مرضت جاتني نوبة الحساسية والان مضطر اني اروح لجدة....ماجلست اكثر من 12 ساعة

ماعلينا....قدر الله علي وسويت حادث بس الحمدلله مو بسيارتي بسيارة اجار وكنت لوحدي...والسيارة راحت تشليح والحمدلله عاد يقول كفيل السوداني اللي صدمني ان الحادث قضاء وقدر...انا ما بلعتها قلت له شوف الكروكي الزول عاكس الشارع....يعني يدفع قيمة اصلاح السيارة وهو مايشوف الدرب لانه ماعكس الشارع الا بقضاء الله وقدره ....ولو اني سلمت من الحادث كان فقعت وجهك انت واللحجي اللي معك عشان تعرف وشهو القضاء والقدر


المهم جاني خلع في الكتف....سويت عملية تثبيت كتف ...والله حسيت اني عمارة ايلة للسقوط....وتنومت لمدة 5 ايام ...قسم بالله طفشت....بس اشين شي عندهم الاكل ماعندهم تونة وكبدة ...اكلهم كله بيض وجبنة وزبدة.....البيض اخر مرة اكلته يوم كنت في خامس ابتدائي كانوا يضحكون علينا في كتاب العلوم يقولون انه مليان بروتين ...والحين اكتشفت انه مصنوع من الرز


المهم دقيت على اخوي قلت له جيب لي أي شي ترى قسم بالله طفشت ....قالي وش تبي قلت جيب أي شي اتسلى به....وانتبه تجيب لي العاب ذكاء تراني نطحت القزاز براسي وتكسر ....يعني مابوه ولا حبة ذكاء....ولا تجيب لي كتبتك اللي زي وجهك الحب في زمن الكوليرا ...والثورة البلشيفية وسقوط جدار برلين....يرحم والديك شوف غيرها...

المهم ذيبان جاب لي بلاك بيري ....صراحة اول مرة اسمع بهالاسم انا احسبه نوع من انواع الشاورما....والا رفرف جمس....طلع جوال فيه نت

وماقصر شحنه لي ...خشيت على النت ....قسم بالله معاناة الازرار صغيرة واصبعي كبير...اضغط حرف الالف يطلع نون ادق الهاء يطلع لي سين ماعرفت وشلون اتعامل معه.....

شوي دخل علي الدكتور قالي تبي تطلع...قلت ايه اشحن لي واطلع معاك....قصدي ابي خروج الحين قبل مايجي خويك اللي يقيس الضغط قسم بالله جنني يصحيني الساعة 2 الفجر يشوف الضغط....تقول بياع بليلة

المهم طلعت والحمدلله وانا الان اكتب هذه السطور الاليمة من منفاي في ابها....عند سوق الغنيم في المدينة العسكرية ثاني لفة على اليمين فيه اوبيروس فضية واقفة ثانية عمارة بعدها

فمان الله ...ابو فجر اللي كسر القزاز براسه

وترقبوا قصتي مع لينكون بن علي واعضاء البطالة