اقتباس:
المشاركة الأصلية كتبت بواسطة بنت السلطان
اختي لسعة شقاوة السلام عليكم
عندي استفسار وياريت تفيديني فيه شاكره لك تعاونك مع الجميع
انا خريجة كلية المجتمع التابعة لجامعة الملك سعود دبلوم علوم الحاسب
وشهادتي موثقة من جامعة الملك سعود وليست تابعة لمؤسستكم
هل هالشي مطلوب عندكم بالرغم اني قدمت وتم ترشيحي
ياريت تفيديني عشان ماأروح على الفاضي  |
وعليكم السلام ..
دبلومك معتمد ومطلوب .. روحي واختبري وتوكلي على الله
اقتباس:
المشاركة الأصلية كتبت بواسطة ’ارجوان’
اختي لسعة شقاوة احاول ارسلك على الخاص ماينفع لان فيه معلومات خاصة ابغى اسألك عنها
ايش الحل ؟؟
|
الخاص عندي مزحوم ومافضيت افضيه
ابشري يالغاليه افضي لك الخاص
اقتباس:
المشاركة الأصلية كتبت بواسطة طريق الأمل
لسعة شقااوه
مرحبا اختي لسعة كيفك ان شاء الله بخير وعافيه أتمنى ذلك 
أختي بالنسبه لموضوع المؤسسه والله العظيم انصدمت اني مالقيت اسمي وانصدمت اكثر نعرف كذا وحده تقديراتهم مقبول وقبلوهم على اي اساس علما بان لهم اقارب بالمؤسسه كزوج او اخ ولهم مكانه يعني الواسطه مشت من الاول وضمنو اماكنهم وحتى تخصصاتهم مور مرره والله قهر ناس تستاهل يجلسون بالبيت وناااس عشان زوجها ولا اخوها بالمؤسسه تتوظف ؟؟
انا قدمت على وظيف ومعي مؤهل مطلوب ودبلوم حاسب وشهاده الرخصه وغيير وغيير ولا لقيت اسمي مو شي يقهر والله اني على اعصاابي ومقهووره يعني الي اقل مني مقبولين عشان معها واسطه وانا لي الله ماعندي شي حتى اسمي مالقيته والله ان اعصابي تعبت حراام الي اشوفه بعيني والله حراام
اتفاجا بالي اقل مني وتخصص اقل مقبولين ايش العقل والمنطق الي يرضا بهذا الشي معليش يعني لو انهم يستحقوون ما قلت شي بس عشان زوجها ولا اخوها يمشيلها اوراقها وتجلس بمكان ناس يستحقونه اكثر منها لا والف لااااااااا وحرام وربي بيوقفهم بيوم القيامه ويسئلهم ما يخافون الله ..؟؟؟؟؟؟؟؟؟؟
الله يعين والله يعوضنا
|
اهلن
انا الحمدلله بخير .. واتمنى انك تكوني بخير
كلامك فيه كمية سلبيه واحباط للجميع .. واتمنى انه مايأثر على كل المتقدمات
وبالنسبه لأسامي بنات تخصصهم مقبول انا اقولك اكيد كذبو في بياناتهم علشان بس يقبلهم النظام وحطو التقدير جيد جدا بزعم ان امورهم بتمشي بعدين
بيدخلون الاختبار لان مافيه شي يمنعهم بعدها يبدأ التدقيق على الشهادات والتقدير .. وفي حال البنت ترشحت مصيرها مستبعده حتى لو ابوها محافظ المؤسسه بكبره
هذا رد لي السنه اللي راحت في موضوع المسابقة الوظيفيه على وحده من العضوات كانت تتكلم عن الواسطه اقريه حرف حرف
اقتباس:
القائمه اللي تعلن بعد الاختبار تكون فيها كل متقدمه ومجموع النقاط اللي حصلت عليها ( المؤهل - الخبرات - الدورات - درجة الاختبار) يعني كل وحده قدمت طلب توظيف وقبلها النظام يحق لها دخول الاختبار وبعد الاختبار تنشر قائمة الأسماء على حسب الأولوية بالترتيب من الأعلى نقاط إلى الأقل.. بعدها يتم الاتصال بالمرشحه الأولى والثانيه والثالثه .. ( يعني مو كل اللي في القائمه راح يدخلون المقابله الشخصية ) تجي المرشحه الأولى والثانيه وقبل مايدخلون المقابلة يطابقون الأوراق ويتأكدون من صحة البيانات المدخله في النظام .. اذا كل الأوراق سليمه ومطابقه دخلت المرشحه الأولى للمقابله الشخصيه اذا تجاوزتها يرفع ملفها للخدمه المدنيه اذا وافقو عليها الخدمه المدنيه نقول مبروك عليها الوظيفه  واذا كانت اوراقها مو متطابقه تستبعد وينادون اللي بعدها بالترتيب .. وللأسف اغلب المتقدمات يستبعدون في هالمرحله..
انا معك بكل مكان فيه واسطه .. وحتى التدريب التقني تكون فيه واسطه بس وين بوظايف خدمة المجتمع بوظايف المستخدمين وحراس وحارسات الأمن باختصار الواسطه تكون في وظايف مايتم فيها التعيين عن طريق المسابقه .. و انا حددت كلامي قبل وقلت مافيه واسطه بالمسابقات الوظيفيه ..
لما قلت مافيه واسطه انا ماتكلمت من فراغ .. توظفت بنفس الطريقه المعلن عنها وبعد ماتوظفت شفت آلية التوظيف عندهم من التقديم على الوظيفه إلى صدور قرار التعيين ..
المسابقه قبل يعلن عنها تاخذ شهور من جهد وتعب الموظفات اللي يشتغلون عليها .. وبعد مايعلن عنها يبدا التعب وفيه ناس يداومون من 7ونص الى 8 بالليل تاركين بيوتهم وعيالهم علشان هالمسابقه تتم بشكل نظامي..
اول ماقدمت عليهم الكل كان يقولي تراها شكليات والوظايف محجوزه لناس معروفين.. بس كان عندي أمل وكنت متأمله فيهم خير .. بس الحمد لله ماسمعت كلام احد وهذاني موظفه عندهم وانا بنت عاديه ولاعندي واسطه ولاشي وكل اللي معاي توظفو بنفس الطريقه وبدون واسطات والموظفات بأنفسهم كانو يقولون احنا كنا متأكدين ان التوظيف بالواسطه بس بعد ماتوظفنا غيرنا كلامنا..ليه نخلي الواسطه تعمي عيونا وعقولنا .. ليه اذا انا ماتوظفت بهالوظيفه معناها الموضوع فيه واسطه!!
ياليت ماتربطون موقف صارلكم بالواسطه وتأثرون على اللي حاب يقدم .. وألاحظ اللي جايين يذكرون مواقفهم كان الشي المشترك بينهم مؤهلهم بكالورويس + دبلوم حاسب !!..
لكل اللي حاب يقدم.. لاتسمعون كلام سلبي من احد توكلو على الله وخلو املكم بالله كبير ..
وان شاء الله تكون كل هالوظايف المطروحه من نصيب بنات البطاله..
|
مافيه شي اسمه فلان يشتغل بالمؤسسه ووظف قريبته ..
كل الموظفات اللي عندنا تقدير مؤهلها مايقل عن جيد جدا .. والكل توظف عن طريق المسابقه ومرت عليه نفس الاجراءات الحاليه ..
ماعدا الوظائف المسانده ( المراسلات وحراس الامن ومرافقات سائق )) << هذي الوظائف التوظيف فيها مايتم عن طريق مسابقه .. تقدم طلب توظيف وحظها ونصيبها يا يمشي يا يوقف وهنا اقدر اقولك ممكن احد الموظفين يقدر يمشيها بس تذكري هالوظائف ماتسوى ولاهي على مراتب وكلها على بند
بقولك بس امثله لحالات تجينا كثير
فلانه جايبه خطاب من رئيس مجلس الوزراء (( الملك عبدلله )) يتوسط لها دخول المسابقه << نعتذر ونرفضها على طول ونطلب منها تقدم مثلها مثل غيرها
فلانه جايبه معروض هذا طوله من امير منطقه معروووف << نفسها نفس اللي قبلها
فلانه نسبتها 79.50 وتقديرها جيد يعني بس باقي لها نص ويصير جيد جدا مايبقى امير ما جابت منه واسطه علشان تقبل وعلى الاقل تقدر تدخل الاختبار << ترفض لان شروطنا واضحه التقدير مايقل عن جيد جدا
مثل ماقلت قبل نظامنا واضح ويمشي على الجميع والمسابقه مافيها واسطه ابد حتى النص والربع ندقق فيه علشان مانظلم فيه احد والمسابقه تضم كذا لجنه وكل لجنه تمسك المرشحة وتدقق في اوراقها وبياناتها
انا اكثر شي يضايقني الكلام السلبي يعني اداره كامله في حالة استنفار من بداية السنه وشغل وتعب على المسابقه وتبدا المسابقه ويبدا معها الكرف والتدقيق والحوسه وبالنهايه نقول وااااسطه
ياليت واسطه كان أنا وغيري حاطين رجل على رجل وتجينا الاسامي ويصدر قرار التعيين ونفتك من هالتعب اللي يجينا ..
وبالنسبه لأسمك مو موجود من ضمن الاسماء .. اكيد عندك مشكله
اذا حابه راسليني على الخاص بإسمك اذا حابه وعلى اي وظيفه قدمتي واشوف وش مشكلتك
واتمنى نظرتك السلبيه تتغير
والله يوفقك ويرزقك من حيث لاتحتسبين