القانون لا يحمي المفهين!
لما يجمعون لهم ميتين مليون يقولون لك ماعليش يالأخ راع المساهمة صار عنده شغل ويقول لكم إذا شفت نفسي فاضي يمكن أسوي المساهمة أو يمكن أرجع لكم جزء من فلوسكم.. والله يا مسلمين.. إن حكاية مخطط السحاب ما يصدقها عقل.. نصابين ماخذين تصريح من وزارة التجارة إنهم يملكون الأرض اللي راح يسوون عليها المشروع وطلعوا لا يملكونها ولا شي.. وراع الأرض الأصلي لما شاف الدعوة فيها نصب سحب أرضه وأعلن إن ما له دخل بالمساهمة.. ومن زود المسخرة وقلة الحياء.. لما اجتمع الضعوف المخدوعين يبون فلوسهم جاهم محامي وطلب إنه يتوكل لهم وقدر أنه يستقطب كم واحد.. بالأخير طلع هالمحامي هو محامي النصابين اللي خدعوا الناس بهالمساهمة.. ولا تدري تروح لمين.. أو تشكي لمين.. ترفع قضية على مين؟ تسمع هالضعوف وهم يقولون يا ناس تكفون لا ترفعون قضية على وزارة التجارة عشانها عطت النصابين تصريح ناقص.. لأنكم لو رفعتوا عليها راحت تطلع عليكم سنة السبلة وأنتم ما خذتم حقكم.. ارفعوا قضية على النصاب راع المساهمة.. يمكن القضية تنحل بعد ألف عام.. صح.. ألف عام ويجيك حقك.. أحسن بكثير من إن حقك يطير كلش.. بعدين اللي ساهموا ما حد أجبرهم يساهمون.. بعدين القانون ما يحمي المفهين.. بعدين «سقها»!!