أخاف يسيرلك مثلي !!!
كانت عندي فرصة ومبلغ مقارب للي عندك وهو بصراحة موا لي لكن من الوالد وعدني إني لو أبغى أبدأ راح يعطيني هذا المبلغ والوالد مثلك ولد العقار لكن غلطتي إللي ظيعت على الفرصة إني خليت التفكير عائم لدرجة إن المشاريع تشعبت على وما عرفة أبدأ بأي شيء حتى إن الوالد جاته فرصة في العقار وحط المبلغ فيه وراحت على الفرصة .
التجارة واسعة جداً ومتشعبة يمديك تاخذ الأفكار من الشارع تشوف إش الأنشطة الموجودة وتسوي بنفس النشاط إذا تبغي تكرر . لكن في فرص غامضة ما نقدر نوصلها بسهوله بعطيك مثال لواحد من الشباب شارك في دورة للمشاريع الصغيرة وجوا لنقطة فكرة المشروع كان له صديق عنده ورشه في الصناعية وكان يقعد عنده في بعض الأحيان وشاف الناس يطلوبوا الجلد إللي تنحط على الشبابيك والأبواب الألمنيوم بكثرة ، فكر فيها وبحث وجد أنه لا يوجد أي مصنع سعودي يصنع هذه الجلد وقرر دخوله في هذا المشروع الصناعي وما شاء الله عليه الآن بياخذ 6000 متر في المدينة الصناعية في جدة الله يوفقة وبالعكس كان هناك ترحيب من المدينة الصناعية بحكم إنوا المشروع راح يوطن صناعة جديدة وإن كانت بصيطة .
خلاصة كلامي :
1 - لازم البحث والبحث والبحث في السوق عن الشيء الناقص في السوق وترى الشيء هذا موا سهل لكن كله بتوفقي الله خصوصاً إذا ما تبغى تكرر أشياء موجودة في السوق ... أعانك الله .
2 - العلاقات مع التجار تعطيك فكرة عن بعض السلع والخدمات إللي يحتاجها السوق .
3 - أهم شيء في نظري لما تحدد مجموعة من الأفكار وبعد ماتقتنع بأن هذي المجموعة فعلاً أفكار جيد ضع معايير لكي تفاضل بينها ونصيحة نصيحة نصيحة الشيء إللي تختارة قاتل عشانه لا تبطل فيه بسبب أول عائق وترجع بعدين لمجموعة الأفكار اللي كتبتها في السابق وتقعد تجرب في مشروع ثاني وهكذا وتضيع عليك الأيام لالالا مو الأيام السنين على الفاضي أنا الآن لي 3 سنوات أفكر في مشاريع لكن للأسف كل شهرين مع مشروع وأبدأ أدرس المشروع وأحصل عقبه أنتقل للي بعده حتى إني الآن إستسلمت وجاني من الإحباط أشكال وألوان .

راجع هذا الرابط فيه حقائب تدريبية عن المشاريع مفيدة جداً وأعتقد إنه فيه شيء عن تحديد الأفكار
http://www.monafasah.com/index.php?action=open_page&page_id=4


آخر شيء أقوله لك أرجوا أن لا تكون الفكرة عائق لك مثل ما كانت عائق لي .