السلام عليكم ورحمة الله وبركاته
انقل لكم تجربتي في المشاوير وذلك يوم الأثنين 28/8/1431 هـ
من الساعه 4 النصف عصرا الى الساعه التاسعه مساء
في البدايه كنت جالس مع شباب في منزل احد الأصدقاء وكان يتكلمون بالمشاريع وما هو المشروع الناجح وسلبياته ودخل واحد منهم قال انا اعرف واحد من العيال شغال مشاوير من المطار بسيارته الخاصه وشغال ما شاءالله عليه يطلع في اليوم 800 ريال
يعني لو نحسبها بالشهر 800* 30 =24000 ريال 
رد عليه واحد من العيال قال كان تلاقى التجار يشتغلونها مو الغلابه وبعدين ما شفت واحد راعي مشاوير مريش
.
دار في راسي شي بما ان بيت اللي انا جالس فيه قريب من المطار ولا عندي شغل وسيارتي معي قلت يا عيال انا ابكلم واحد اعرفه راعي مشاوير يعلمنا كيف دخلها ومخاطرها بس الوعد بكره في نفس الوقت قالوا اتفقنا
طلعت بسيارتي الخاصه صليت العصر واتجهت للمطار رحت للبوابه القدوم الرحلات الداخليه لقيت رجل قلتله الرياض قال بكم قلت ما نختلف اركب قال النسيم قلت بسم الله
وصلته للنسيم وعطاني المقسوم رجعت للمطار وقفت عند بوابه القدوم الرحلات الدوليه واذا واحد ومعه اهله قلت الرياض قال لا تصير طماع مثلهم قلت لا ولا راح اقولك بكم اركب ركب الشنط واهله قال العليا قلت بسم الله يا كريم ووصلته وعطاني المقسوم بس هذا ما شاء الله عطاني بالدولار قال ما معي سعودي .
وارجع للمطار واوقف في المواقف واصلي المغرب ونزلت للصاله داخل ولقيت سوري متمشكل مع حقين المشاوير علىكم وكم بعد ما راحو من عنده قلت وين تبي قال الربوه قلت تفضل قال بكم قلت اللي تعطيني وديته هو وعياله للربوه وعطاني المقسوم .
رجعت للمطار وصليت العشاء ولقيت واحد وزوجته توهم راجعين من ماليزيا ( عرسان ) قلتله الرياض قال لا ابغى اقرب فندق قلت اركب قال بكم قلت ما نختلف ما راح انزلك في نص الطريق المهم ما امداه حمل شناطه الا حقين التاكسي اللي يهاوش واللي يتلفظ 
ما عطيتهم وجه جت دوريه وقعدو يكلمونه مشيت انا مسافه الا والدوريه وراي وقف يا راعي السياره قلت وش يبغى قلت للي معي وش اسمك عطاني اسمه وقلت هذا اسمي قال اوكيه نزلت ونزل معي الله يجزاه خير قالت انت تحمل ركاب
قلت لا هذا خويي قال وش اسمه عطيته الاسم اخذ جواز اللي معي وقرا الاسم طلع صحيح
قلتله بصراحه انا موصله مشوار بس جديد على هالشغله قال يا خي حرام عليك وش خليت للمساكين استعربت من كلامه قلت الشغل مو عيب قال سياره بقيمه 200 الف وتحمل فيها ركاب قلت الرازق في السماء والحاسد بالارض ومن هنا ومن هنا قال السياره بتحجز ومخالفه ويمكن ما تطلع خلال هالاسبوع طبعا اللي معي رجل لو واحد ثاني قال ما علي منه قاله يا رجال انا اللي مناديه احسن من اركب مع هالاجانب ويالله يالله فكنا
وديته للفندق وقلتله السالفه من اول ما كنا جالسين مع الشباب الين ركب معي
وحلفت له اني ما خذ ولا ريال . واحس انه ما صدق
طبعا انا جربت هالشغله عشان انقلها بصورتها للشباب وللمنتدنا الغالي .
ثانيا ما فيه شغله كويسه ومربحه الا وراها مخاطره مهما كانت سهله .
انا طلعت تقربيا في ثلاث ساعات 300 ريال .
لواني نازل بعد ما تكلمو علي ممكن اني انطقيت عشان 100 ريال .
اخواننا اصحاب التكاسي ما يبوون احد يدخل معهم بهالشغله . ( اصحاب السيارات الخاصه ) .
بصراحه شغله حلو للنظامي يعني اللي معه تاكسي مرخص من المطار .
ودمتم بخير