مشكورة اختي شهودي على الموضوع الحلو واسمحيلي ابدا بوجهة نظري:
1- بالنسبة لي اتمنى اتزوج سعودي بس مو معناه اني ارفض الأجنبي بس السعودي افضل وماراح اتزوج اجنبي الا بعد تفكير عميق واذا اضطرتني الظروف لهذا الزواج وهذا الرأي مونظرة نقص في الأجنبي وربي يعلم انا نحترم الكناس الأجنبي قبل الوزير ونقدر تعبه وجهده بس هذا من ناحية الأخلاق والتعامل مولدرجة ربط حياتي معاه فلاتلومينا وتقولين تستحقرون الأجنبي هذا الشي موصحيح واحنا نؤمن بقوله عليه السلام (لافرق بين عربي واعجمي الا بالتقوى )وقوله (اذا جاءكم من ترضون دينه وخلقه فزوجوه) بس لاتنسي كمان ان الإسلام اشترط الكفاءة في الدين والأخلاق والنسب والحالة المادية كذلك.
2-انا ماني عايشة في المجتمع لوحدي بكرة اذاصار عندي اولاد كيف حتصير حالتهم
وانا اش يظمني ان حياتي حتستمر معاه وبعدين الله يعين الأولاد وبدل مايدعولي اني اتجوزت رجال متحرر وجبتهم لبلد متحرر ممكن يدعواعلي بسبب ضياعهم بين الدولتين الله لايقولها انتوا ماتشوفون السوريات الي اتجوزوا سعودية بعدين انفصلوا اش حصل لهم الله يعينهم والله انها ماتهنت يوم اتجوزت سعودي صاحب الفلوس زي ماتشفوا
3- انا اقدر فيك ياشهودي طموحك بس ابدا لاتقللي من وظيفة المراة في بيتها وهي بالعكس بعملها هذا وتربيتها الصالحة تخدم المجتمع أكبر خدمة والله انوا في نساء عاملات واثبتوا جدارتهم في عملهم والبيت و التربية الله يخلف عليها قوليلي هذي كيف فادت المجتمع لهذا التوازن مطلوب والرجال لوشاف الحرص من زوجته ابدا مايرفض بالعكس ممكن يشجع خاصة هذا الزمان مع الإنفتاح فلا تظلموا شباب بلدنا مولذي الدرجة عاد
4-الأخت الي اتكلمت على العادات والتقاليد اختي لاتلومي العادات والتقاليد بالعكس الدين شجع العرف والعادة واعتبرها في اصدار الأحكام بس لومي التشدد المبالغ فيه في تطبيق هذي العادات وفي هذا الأمر لاتعممي ممكن بكرة تتجوزي سوري وتلاقينه من اشد المتمسكين بالعادات والتقاليد ومايعطيك الحرية الي تدورينها انا في رأيي هذا راجع لفكر الإنسان وتعليمه وعقليته الراقية بغض النظر عن جنسيته وخاصة انو المثقفين والمتعلمين عندنا صاروا كثر ولله الحمد وما عليكم الا تنقوا
واعذروني على ثرثرتي الزايدة بس حبيت اوصل وجهة نظري كاملة وممكن تكون صح وممكن خطأ بس في النهاية تبقى وجهة نظر
وفي الأخير يبقى ولد بلدي هو الأصل من دون تعصب اواحتقارللآخرين