مراحب ،، شخباركم ؟؟،،، جبت لكم هالموضوع وأتمنى انه يعجبكم وهالموضوع يدل الشاب على شخصية البنت من نوع سيارتها ،، طبعا هذي من تحليلاتي الشخصية من خلال احتكاكي بالبنات اللي يسوقون ولاينطبق بالضرورة على كل البنوتات <<< روحي يالفيلسوفة -إذا كانت البنت تسوق سيّاره همر فهذي البنت مزاجيه درجه أولى ومامنها أمان ورغم انها قصيره وضئيلة الحجم الا انها وهي تمشي تحب تشوف الناس من فوق وتقولهم شوفوا ترى انا أعلى منكم ... -إذا كانت البنت تسوق سياره نيسان بترول هذي البنت قلبها قوي يعني عادي لو ناحستها تدعمك وتفتح الدريشه وترمي عليك كرت ابوها تقولك مابي اسمع منك ولاكلمه وهذا كرت ابوي راجعه اذا عندك أي كلام.. -إذا كانت البنت تسوق سياره كروزر هالبنت نعووووووووووووووومه مووووووووووووووت بس شاريه الكروزر عشان تخوّف الشباب ولا هي ان وقفتها من الخوف والنعومه ماتشوف الا دموعها أربع أربع على خدودها...ميزة هالبنت انها تتبع المثل القائل من خاف سلم.. -إذا كانت البنت تسوق سياره لكزس هالبنت مغروره لأبعد الحدود وتحسب ان الله ماخلق غيرها على الأرض...وخر عنها تراها إذا حطتك في بالها مابتخليك إلا وانت تصرخ وتقول ارحموا من في الأرض يرحمكم من في السماء... -إذا كانت البنت تسوق سياره ألتيما هالبنت وايد خجوله وثقيله ولاتحاول تتميلح وتطل عليها من الدريشه وتتبسم لأنها هي وأبو الهول واحد تمشي في الشارع ماتلتفت لا يمين ولا يسار .. ميزة هالبنت انها تخطط لحياتها بدقة رغم ان الخطط أحيان تخونها لكنها تتدارك الموقف بسرعه قبل فوات الأوان...تحكمها قناعات شخصية لايمكن تتخلى عنها..متعلقه وايد بأهلها وتؤمن بالمثل القائل اللي مافيه خير في أهله مافيه خير للناس.. -إذا كانت البنت تسوق سيارة كورولا فهذي البنت بخيييييييييله وإذا كانت عازمه صديقاتها على العشا مابتشتري لهم غير الكيما والجباتي من مطعم حمّود .. -إذا كانت البنت تسوق سياره باثفايندر فهذي البنت ملسوووووووونه وحقّانيه درجه أولى ولو قلت لها أحبج بتقولك صير رجّال لايجيك الكعب على راسك...عيب هالبنت انها مبذره تبذير مب طبيعي وإذا حاولت تتعرف عليها يمكن تقبل تتعرف عليك لو جبت لها ساعة ألماس قيمتها ماتقل عن 30.000 ريال.. -البنت اللي تسوق سياره برادو...هذي البنت عدوانيه وتحب تضرب ... ولاتحاول تكلمها لأنها بتوهمك انها وياك على الخط وأول ماتقرب صوبك ماتشوف الا طابوقه جايه على جامة سيارتك محولة إياها إلى بقايا جامة .. عاد لاتشتكي عليها لأن أكيد أكيد بيكون الحق عليك.. -البنت اللي تسوق سيارة هوندا هالبنت كشيخه درجة أولى ،،، ومع ذلك تحسب لمصاريفها ألف حساب وتخطط لحياتها صح ،، هالبنت تنحب بسرعه بس ماتحب ولا تحاول لمجرد المحاولة انها تخوض في تجربة غرامية غير متكافئة ولو قلت لها أحبج راح ترد عليك وتقولك تعرف وين بيتنا؟؟ -البنت اللي تسوق كامري هالبنت متواضعه وبيتوتية وماتحب السفر والمطاعم ولاتحب اللف والدوران .. صريحه .. مرحه .. بس إذا عصبت قول على الدنيا السلام... أتمنى ان موضوعي عجبكم ودمتم بخير