شوف ياكويس ..
اول حاجه سوق الفوركس سوق عملات ... تبيع دولار مقابل ين او اي عمله براسك ..
لكن عشان تقدر تدخل هذا السوق ( تحتاج لشركة وساطه )

طبعا شركات الوساطه كثر شعر راسك او أكثر ( ومن هذي الشركات الشركه الي اتصل عليك مندوبها )

طبعا مانقول كلهم نصابين ولا نقول كلهم ملائكه ..!

بالأول والأخير قرار الإستثمار راجع لك .. هم بس يساعدونك في عملية التداول ( والتوصيات ميزه اضافيه )

طبعا هالسوق يعتبره الكثيرين أكبر مخاطره من سوق الأسهم نفسه .. لأنك تعتمد على شي اسمه اسمه الرافعه الماليه ..!

يعني هوا قالك اقل شي تدخل بـ1000 دولار, هذا معناه انك تقدر تشتري الى 5000دولار وأكثر بكثير بالألف فقط .!

( يعني كأنك تتسلف من شركة الوساطه فلوس وتشتري عمله معينه , وبعد ماتربح ياخذو عمولتهم .. لكن بس تخسر راح تخسر راس مالك كامل)

وهالسوق فيه شي غبي جلست فتره لين فهمته .. انت ممكن تكسب على الهبوط ( يعني والسعر احمر تشتري ) يعني تضارب على الهبوط .!

وتقدر كمان تضارب على الصعود ( والمؤشر أخضر )

طبعا هالسوق خطير بكل ماتعنيه الكلمه واذا ماكنت تعرف للتحليل الفني ومتقنه ومتابع للأخبار أول بأول راح تخسر أكيد ..

والمتابعه صعبه علينا كأفراد , يعني السوق مفتوح 24 ساعه بيع وشراء والناس شغاله .. كيف بتلحق كل هالمعلومات الي تصب بالسوق ..

أنا دخلت وتحمست وفتحت حساب تجريبي في شركه اسمها ( اي تورو ) << تصلح للمبتدئين ولغه عربيه

لكن يوم شفت الوضع مايطمن سحبت نفسي

وكنت داخل عشان اتعلم مو عشان اتاجر

لذلك انصحك كمان تدخل اليو تيوب وتبحث عن الفوركس فيه .. لان فيه ناس مبسطين الموضوع وشارحينه لك بطريقه حلوه