تخطي علي واستسمحك وترجاك
ضعفي هـواك وفطنتـك ماتخونـك
المشكل اني كل ماجيـت ابنسـاك
فكرت نفسي كيف ترتـاح دونـك
ومـا ظـن لاهــذا ولاذا ولاذاك
واللي سمعت بذكـره يعوضـونـك
تدري اني اعشق فيك شامل سجاياك
زينك وشينك في قسـاك وليونـك
واني متيم في محـاسـن محـيـاك
وتعرف على وشلون سلطة عيونك
تامر على من موقها الموت هـذاك
واطاوع امره قبل ترمـش جفـونـك
رديت قلبي عنك لاشك هـو جـاك
وجيتك معه راضي بمقبـل طعـونـك
ارجع واقول اهواك واهواك واهواك
وبكفيك اتعـذب ولكـن بهونـك