السلام عليكم ورحمة الله وبركاته
اليووم بكمل لكم الحلقه الثالثة
في يوم جاتني اختي وقالت هاتيلك خياطات فلبينيات روعه خياطهم كنه جاهز قلت ليش لا بحكم ان عندي قسم خياطه مهجور مافيه خياطات
وقالت الخياطه اللي اخيط عندها بسالها اذا تعرف
وسالتها واعطتها رقم المكتب اللي جابها
بعد تردد لاني حسيت حالي زي اللي يشتري سمك في المويه مافي اي ضمان لفلوسي
المهم كلمت المكتب وطلعت لي صاحبته مره قلت لها طلبي وانه اذا كان اختيارك تمام بستقدم عشره لمجرد بس انها تطمع وتكون ملتزمه معي وارسلت لها الفلوس باسم المكتب والوكاله
وارسلت لي وحده ماخذه دورة خياطه ثلاث شهور وانا انواع التحطيم
دقيت واتهاوشت معاها قلت مابي خلاص ابي فلوسي قالت ارسلك شغاله
وبذاك الوقت طلعت لي خالتي علي الخط قالت شوفيلي فلبينيه قلت جاهزه واخذت الفلوس لي وطلبتها
البديل شغاله باسم زوج خالتي وارسلتها ولما جت اوكيه اتصلت وقالت شوفتي انا التزمت وبامكاني بالعامي اجحدك قلت اوكي
قالت في عندي لك عرض خياطه شاطره ومشتغله سنين عندكم وتقدري تكلمينها وتسالينها عن اللي تبي كلمتها وقالت انا استقل في صالون اميره
....... انا فكيت خشتي قلت تم تم تعالي بس
جت وليتها ماجت في هالوقت سفرت خالتي شغالتها تقول مابيها لاخلاقها وكانت فعلا اسباب قويه تخليها تسفرها بدون تردد
دفعت لخالتي حق الاستقدام وحق التذكره لان الشغاله في فترة التجربه
علي امل تدفعلي فلوسي صاحبة المكتب
طبعا الخياطه اخذت معي كم يوم وقالت ابي مستوصف قلت يمكن تغير عليها الجو مع انها كبيره بالسن و من دخلت علي الدكتور طلبته دوا سكر وضغط وانا صرت مثل ذا
طبعا طلعت لها تقرير بحالتها واخذت الدوا قلت يابنت لاتفطس عليك
واقرب رحله طيرتها
واتصلت في الهانم صاحبة المكتب الا وحده تكلمني تقول سافرت وبجنبها وحده توشوشها مافهمت من لهجتهم الا كلمة دبي وقالت لي هي راحت دبي تشتغل وقفلت مكتبها
لاحظوا كم صدمه
المهم واتصل علي السفاره السعوديه واحكيلهم حكايتي
قالوا ارسلي مشكلتك بفاكس وحطي الاوراق اللي تثبت حطيت اوراق الحواله بعد ماخذت برنت من البنك وصورة الوكاله وصور التذكره وصور الجوازات وصورة التقرير الطبي خخخخ كل شي مابقي الاصورتي
واربع شهور وانا اتابع هالفاكس وش بتسوون لهم
اعطوهم انذارات عشان ينهو المشكله معي قالوا حلينها معاها
وانا مدري والسفاره مايدرون يحسبون حقي وصل لولا اتصالاتي وتبليغي انه ماجاني شي
وضغطوا عليهم اخر شي قالت انا خلاص حولت لها ولما اتصلت قالوا خلاص استلمتي قلت اسمي عندكم خل توريكم وصل التحويل واكتشفوا انها كذبه
وقالت لهم انها ارسلت لي ثلاثه ومالي حق اطالب بالتعويض ولما اتصلت فيهم قالوا انتي اخذتي ثلاث عاملات قلت اثنين باسم نفس الشخص والثالثه لا (زوج خالتي ) يعني يحق لي بوحده ثالثه بس انا مابي قالوا صحيح
ووقفوا جميع الفيز الصادره من مكتبهم وحطوهم في البلاك لست الين يحلوا مشكلتهم معي
طبعا هنا انا انبسطت قلت وربي لاطلع تعب اربع شهور وقيمة المكالمات كلها
تخيلوا اتصل فيا واحد سعودي من داخل السعوديه يقولي انتي لك مشكله مع مكتب.... قلت ايه انت مين؟ قال انا شريكها في المكتب
قلت بدري انت وش تبي قال اتصلي الان بالسفاره وقولي انوا المشكله خلاص انحلت
قلت وفلوسي قال هيا مسكينه ماعندها....و...و...
قلت انت ادفع قال وانا وش ذنبي قلت شريكها قال ماعندي قلت خلي شغلكم واقف
قال تقطعي رزقنا قلت لاعاد تدق وقفلت
وطلعت لي هي تدق من رقم من الفلبين يعني كذابه مو بدبي
قالت مدام انا مسكين قلت سكين لاتدقين لين اشوف الفلوس بحسابي
وجلسوا فتره يحاولون بالسفاره هناك بس محد رد عليهم رجع ارسل رساله قالي هاتي رقم حساب بالراجحي احولك ارسلت له رقم حساب زوج اختي (ماورد اسمه بالفيز)
قال يالله شوفيهم وشيكنا ولقيناهم قلت مابتصل علي السفاره الا بعد شهر زعل وكسر جوالي بالاتصالات قلت انا صبرت اربع شهور جربوا اربع اسابيع وسافرت ولما رجعت كلمت السفاره قالوا جابت لنا ورقه فيها ايداع لنفس المبلغ بس مو بنفس الاسم قلت الا هذا هو انا استلمتهم قال خلاص وفكوا المنع عنهم
اللي استفدته من اللي صار لي
ان ما اصيد سمك بالمويه
واذا صار وتعرضت لهالموقف لازم اكون على تواصل مع السفاره لين تنتهي المشكله مو اقدم شكوى وانــام
وسبب متابعتي للشكوى مو لاني ادري عن سالفة المتابعه لا
لاني كنت محتاجه المبلغ
ولا كان نمــت ولا سالت وضاع حقي
الحلقه الجايه بقولكم عن النقله النوعيه من صالون صغير الى صالون ثلاث ادوار
وكيف حصلت على خياطه شااااطره