ســلام عليـــكم ورحمـــة الله ،،
مبروك للاخـــوان فتح الموضوع ، ولا ننسى جميعاً ان نشكر الاخت اخر العنقود على وقفتها معنا في هالسالفة وفي تثبيت الموضوع من قبل ،
ثانياً ابشركم تم الانتهاء من فترة الحجز وعطونا اجازة 4 ايام والتحضير يوم الاحد الساعة 8 مساءً
وترى والله الوضع فلة والامور تساهيل
اهم شيء الواحد يكون بفترة الاستجداد محترم عشان هالفترة الاعين عليكم بزيادة والا بعدها تتسهل الامور وتتيسسر

وطبعاً ماننسى اخونا محبوب الحرس لانه بيتخرج الاسبوع هذا .. الف الف مبروك ويستاهل وهذي نتيجة الصبر ومن صبر ظفر ،
وعلى طاري الصبر ترى في مدريبن السنتهم طويلة ونظامهم تعقيد يعني الواحد يسمع كلامهم ويدخله من اذن ويطلعه من الثانية هذا نظام اي دورة عسكرية تأسيسية يبون يشوفون من اللي يتحمل ومن اللي مايعجبه الوضع ويهج وترى في عالم كثير هجت ماتحملت الوضع

وعلى فكرة ترى اول اسبوع للواحد هناك في فترة الاستجداد تقلب نفسيته ويكره نفسه من كثرة الاوامر والا ترى اذا تأقلمت مع الوضع خلاص يصير النظام معاك فلة وأيزي ،

واذا مثلا جاك مدرب ومسك عليك اي شيء وجازاك لا تعابط خلك معاه لاخر الطريق سوي اللي يبغاه قد ماتقدر وبعد الاستجداد خلاص تصيرون تطلعون خميس وجمعة تغيرون جو وترجعون وانتم منعنشين

وبالنسبة للشباب اللي هجو الحين اغلبهم متندمين يتمنون انهم ماراحو في واحد سحب من اول اسبوع والحين تندم يوم شافنا تخرجنا من فترة الاستجداد

انا ما اخفيكم ترى النفسية في اول اسبوع بتكون مقفلة لان الواحد يكون متعود على الرفاهيه والحياة المدنية والدلع والفلة ويوم يدخل اول اسبوع يرصون عليكم يبون يشوفون من اللي عنده جــَــلد وصبر ومن اللي مايتحمل ، يعني الواحد يشغل مخه ويفهم لا يصير متنــك خلاص اذا شفتهم شادين امش على كلامهم واذا لقيت لك عسكري مصغر عقله كبر عقلك انت ، مثلا قلك طبق الجزاء الفلاني قله ابشر ماطلبت شيء وطبق له الجزاء ويفكك بعدها

يعني من النهاية وخلاصة القول ان الواحد اذا دخل هناك مو بس يشغل جسمه مع التمارين والاوامر لازم يشغل عقله عشان تعدي الايام ويتخرج بسهولة اما اذا بيقعد يعابط بيدقون خشمه العساكر وبعدها يا انه يشرد والا يرجع و يرضخ للامر الواقع ويسمع كلامهم وفي الحالتين هو الخسران لانه ماحفظ ماء وجهه واحترم نفسه من البداية



في معلومة مهمة فترة الاستجداد لازم تجيبون معاكم بوت رياضي قوي وسميك من تحت لان هناك الصخور كثيرة وقروشة تتقروش رجولكم اول اسبوعين وتتألمون بس الي معاه بوت سميك من تحت ماراح يحس بتعب بالعكس تمر عليه الايام بسرعة هذي نقطة مهمة حاولو تحطونها ببالكم

النقطة الثانية ، بيجونكم اول اسبوع بعض الناس يقولون الطلوع الاسبوع الاول والا الاسبوع الثاني ، لاحد يصدقهم الطلوع يكون الاسبوع الثالث معروف واكيـــــــــــــــــد وبتلاقون العالم في سريتكم مصدقين ويتناقشون في الموضوع كل شوي وفرحانين وعايشين جو الطلعة وفي الاخير ينلطمـــون على وجيههم من الصدمة ، الطلوع الاكيد ومليونين في المية يكون الاسبوع الثالث ، هذي معلومة مؤكده حطوها ببالكم


واهم حاجة ترى بتحصلون هناك عالم كذابة كثير كثيييييييير كثر شعر روسكم يجيبون اشاعات ماتدرون من وين يجيبونها بس ماينلامون من الطفش هههههه ، حطو اذن طين والثانية عجين ، ونفذ الاوامر واصبر 3 اسابيع وخلاص الامور تصير سهالة ان شاء الله

وتحياتي للجميع