أرشح أكاديمية الجزيرة العالمية ... درست عندهم 10 شهور متواصلة بدء من المستوى 2B حتى المستوى 7A ... التطور رائع جدا طريقة التعليم ممتازة استفدت شخصيا من عندهم ..كنت شخص مستواه منخفض و الان الحمدلله مستعدة بإذن الله للتوفل ... المدرسات 90% من مصر و المديرة فلبينية بس الاكسنت عندهم ممتاااااااز يعني انا اول ما سجلت بصراحة كنت متخوفة و مترددة بين الجزيرة و الفيصل بس لما اتصل بالفيصل ما حبيت اسلوبهم غير انه مش Flexible يعني مو على كيفي اختار الوقت صباحي او مسائي و مو على كيفي اختار المدرسة ..( هذا غير الاسلوب ) .. المهم رحت الجزيرة و قلت للسكرتيرة تبع التسجيل طب ليه كله عرب اللي يدرسون قالت اصلا ممنوع يكلمونك بالعربي حتى خارج الكلاس فتوكلت على الله و سجلت ... طبعا التيتشر انواع فيه الممتاز و فيه الوسط انا الحمدلله حظي كان مع الممتازيين و احيانا لما نبغى تيتشر معينة نقول قبل بداية المستوى و اذا في مجال حطوها لنا يعني 60 % يوافقوا ( ما يمنعهم الا لو فيه تعارض في المستويات عند نفس المعلمة) ... يمكن في واحدة او اثنين اللي مو قد كذا بس الحمدلله ما درسوني بس على ما سمعت من بعض البنات ..بس انا الحمدلله اللي درسوني ممتازين وبعدين جت واحدة اندنوسية ما تعرف عربي و هذا ساعدنا اكثر .. طبعا الكلام هذا قبل 3 سنين يمكن غيرووا المعلمات ما ادري ... لانه اختي لما درست عندهم كان بعدي بسنة قالت فيه مدرسة افريقية يمكن اميريكة او ما ادري من فين بس مو عربية ... هذي تجربتي اتمنى اكون افدتك
( بس فيه شئ جدا جدا جدا مهم و هو انه تعلم اللغة يعتمد اول شئ على رغبتك يعني 80% عليكي و 20 % على المعهد و طريقة التدريس و الاكسنت ... لانه انا كان عندي الرغبة الشديدة لتعلم اللغة بعد مواقف كثييير حسيت فيها انه لازم اتعلم ... يعني مثلا شوفي انا كيف استفدت كثيير من المعهد كان معي واحدة من اول ما بدينا سوا و لما كنا في نهاية المستوى الخامس كانت تقولي انا مو مستعدة للمستوى السادس قلتلها ليه ؟ قالت ما احس اني استفدت ولا احس انه تقدمت سالتها قلتلها انتي ما تراجعين في البيت المفردات الجديدة اللي ناخذها و كذا تقولي لا ..هذا غير انه الهومورك تعمله في المعهد قبل ما يبدأ الكلاس ..يعني اكيد ما راح تستفيد شئ لانه ما بذلت حتى 1% .... يعني المهم هو العمل الذاتي )
ايه نسيت شئ ..المعهد كان يعمل حاجة كثييييير كنت احبها و حاجة ماكنت احبها لوول ..الحاجة اللي كنت احبها هي الـ open conversation و هذي يعملوها مرة في الاسبوع يجمعوا 3 مستويات مختلفة و تكون مثل جلسة محادثة تتكلمي فيها عن اي موضوع ممكن يكون موضوع عام و كل شخص يقول شئ يعني كانها جلسة سوالف بس كثييييير كنت احبها لانه كنت استفيد منها و تعلمك الثقة بالنفس لما تحكي بالانجليزي ... اما الحاجة اللي كنت ما احبها هي الـ open day كنت احسه مضيعة وقت و ما استفيد منه شئ ( المشكلة كانت عليه 10 درجات لوول يعني غصب تجي ) ...طبعا هذا كله قبل 3 سنين ما ادري لو غيروا شئ ...و موفقة واسفة على الاطالة