قبل ساعة ونص خلصت المقابلة في الرياض .. اللجنة رقم 1
أبعطيكم كل اللي صار معي عشان الكل يستفيد .. خصوصاً اللي عنده بكرة في الرياض
أولاً موقع الفرع هو مثل ماقالوا الشباب في الملز ,, إنت جاي من خريص
أمسك طريق صلاح الدين الأيوبي .. وإتجه جنوب وسيده .. أول إشارة تعداها
وبعد ما تتعداها خل عيونك على يمينك .. تلقاها محشوره بين عمارتين وجنب بنك التسليف ..
وقبل لاتجي الإشارة الثانية
أول معضلة تواجهك هي المواقف .. نصيحة رح بليموزين أحسن لك .. ما تلقى موقف إلا خلف
المبنى .. وتطقها رجليه لفرع الوزارة
الشيء الثاني .. جب ملفك وأوراقك كلها كاملة معك .. وأربع صور 4 *3 لا تنساها
والموظف بيعطيك 3 نماذج .. الاول : للبريد سهلة جداً مافيها إلا 3 خيارات
إسمك .. المدينة .. صندوق بريد .. الرمز البريدي .. وتوقيعك وصلى الله وبارك
الثانية : إستعلام عن تاريخك الوظيفي .. وكل إجاباتها إما نعم أو لا .. سهلة جدا
مثل ..هل سبق وتوظفت وظيفة رسمية .. هل سبق وتوظفت وظيفة على بند الأجور .. وغيرها
يمكن 8 إلى 10 خيارات .. أسئلة دقيقة عن تاريخك الوظيفي .. حتى لو توظفت 3 شهور
في شركة لازم تكتب وتكون دقيق .. أما اللي بحياته ما توظف .. بيرتاح ويحط كلها لا 
النموذج الثالث : هو نموذج 101ب .. اللي الشباب نزلوهـ هنا .. لا تطبع ولاشيء
هم بيعطونك .. ولازم تعبيه كله .. طبعاً اللي مكتوب خاص للموظف .. لاتكتب فيه شيء
أما غيره لازم تعبيه .. حتى الـ 3 رغبات وأماكن التعيين لازم تكتب الثلاثة
وعند الوزارات لازم تكتب 3 وزارات .. وزارة العدل وتختار ثنتين من راسك
..أنا كتبت مكان التعيين الرياض والوزارة العدل فقط ..!
وقالي الموظف عبها كلها لا تخلي شيء فاضي ..
وحط وزارات غير العدل .. قالي مثلاً الصحة الزراعة .. فكتبت مثل ماقالي الموظف
المهم بعد ما تعبي هالنماذج الثلاث .. ترتب أوراقك وتجيب الأصول معك لأنهم هم يصدقونها بختم خاص لهم
وعلى فكرة الملف له مساكتين .. مو هم طالبين من كل نموذج وشهادة نسختين
تحط كل وحدة في جهة من الملف .. عندهم ماسك للملف .. ركبه في الجهة الثانية وتصير عندك
مساكتين .. حط في كل جهة نسخة .. وبنفس الترتيب
ولا تنسى في صور بطاقة الأحوال .. إنك تكتب البيانات تحت الصورة بخط يدك
والصور الأربعة تدبسها في نموذج 101ب في طرفي كل نسخة تدبس صورتين
عطها الموظف .. وبياخذ الأصول منك وبيصادق عليها .. وكل واحد يحفظ رقم لجنته
لأن الموظف يحط ملف كل لجنة في جهة .. وتوكل على الله ولازم تصلي المغرب في الفرع
وأنصح اللي يجون مع خريص يبكرون شوي .. لأنه عند الغروب طريق خريص يقفل 
إذا جيت المغرب .. تصلون جميعاً في المصلى .. ثم كل مجموعة تروح لاحد الأدوار على حسب اللجنة .. وتنتظرون .. وكل ما سلمت ملفك بدري .. يجي دورك بدري
وإذا سلمت ملفك متأخر .. يجي دورك متأخر أنا سلمت ملفي متأخر الصبح
وجاء دوري متأخر بعد صلاة العشاء
ينادون على أسمائكم ثم يعطونكم ملفاتكم .. على أساس تسلمها إذا دخلت اللجنة
أنا ما أدري ليش يعطونا الملفات ثم حنا نرجعها مرة ثانية للجنة .. ما أدري وش الحكمة
بس الظاهر اللجنة تبي تشوف إنت تسلم بيمينك أو بيسارك خخخخخخخخخ
لذلك إحتاط سلم بيمينك ..
أنا في لجنة رقم واحد 3 مشايخ .. والله حبيبين .. أول ما جيت سلمت .. ثم قالي إجلس
بعد ما جلست سألني واحد منهم معك شهادة كمبيوتر .. قلت لا .. قالي شاطر بالكمبيوتر
قلت إيه .. قالي الوورد تعرفه .. قلت إيه .. الإكسل .. قلت إيه .. الأكسس .. قلت إيه
عاد سأل وقال والفوتوشوب .. قلت لا .. لذلك خلك صريح ولا تسوي نفسك تعرف لكل شيء
جاء ثاني وقال إكتب إسمك نبي نشوف الإملاء والخط .. ثم عطاني آية قرآنية ..
وسألني في أي سورة .. أنا كملت الآية ومشيت .. وما عرفت بأي سورة
قالي واحد منهم إيه حلو هذا إنت ماشاء الله كملت الآية بأي سورة .. ماعرفت رغم إني كملت الصورة
ثم عطاني آية ثانية أكتبها وقال بأي سورة وجاوبت صح .. شاف خطي قال خطك حلو
بس الإملاء وسط .. لأني أخطأت بكلمة وحدة .. قال رح شفها بالقرآن .. ثم تداركت الخطأ شفوياً
قال واحد منهم بعد الثانوية وين رحت .. قلت درست كم سنة بالجامعة وما توفقت ..قالي
طيب تقضي وقتك بأيش .. وش تسوي اللحين يعني .. والله العظيم قلتها وبكل عفوية وبراءه
" والله أجيب العيال من المدرسة " خخخخخخخخخخ
وهذي الحقيقة يومياً أجيبهم وأوديهم للمدرسة
يوم جيت بطلع .. قالي واحد منهم " لو عيناك بقرية توافق " قلت " إن شاء الله "
وإنتهت المقابلة ومشيت ..
المهم يا شباب .. نصيحة نصيييييحة .. لحد يقصر ثوبه ولا يربي دقنه .. خلك على طبيعتك
والله الظعيم شفت ناس مربين دقنهم ومبين إنهم توهم يربونها .. لأن *****وكة واضحة
وشفت ناس مقصرة الثياب .. والله ضيق عليهم ضييييق وشكلهم فيه غلط .. واضح إن هالثوب
له يومنه صغير أو لأحد أخوانه .. المهم نصيحة خلك على طبيعتك
وخلكـ عفوي وسمح .. وتبتسم مع كل إجابة ..وخلك واثق من نفسك
إيه صح نسيت .. سألني عن الفرق بين المحكمة وكتابة العدل .. بربرت عليه شوي
ثم قالي وش الفرق بين كتابة العدل الأولى وكتابة العدل الثانية .. ما بغيت أتفلسف
فـ قلتله بصريح العباراة " ما أدري "
المهم كل واحد يكون على طبيعته وما يتكلف .. ولا تنكت إبتسم مع كل إجابة إيه
بس لا تنكت
والله يوفق الجميع ..