السلام عليكم ورحمة الله وبركاته اليوم ياشباب حركت من الخرج إلى الرياض عشان أستفسر عن وظيفة مقدم لها ويوم وصلت لهم قالو لم ترشح للوظيفة ويرتفع الضغط عندي وكانت نفسيتي دمار في دمار كنت متأمل فيها خير كثير وموصي شخص عليها وقال لي أبشر إن شاء الله إن أمورك ميسره لكن ماكتب الله لي فيها نصيب ويمكن خيرة لي وأرجع للخرج وأنا طفشان قاعد أفكر وأهوجس بالطريق عمري فوق ال 30 لاوظيفة لازواج ولا يحزنون ويوم وصلت للبيت وألقى الوالده على أعصابها تقول هاهـ بشر قبلوك قلت لها مثل كل مرة المهم تغديت وبعدها جلست على الجهاز وأفتح صحيفة توظيف وأشوف خبر عن نتائج ديوان المظالم ثم تزود نبضات القلب وجتني ربكة وقلت الله يستر ظربتين بالرأس توجع وفي يوم واحد المهم قبل ما أدخل رقم البطاقة قمت أدعي ربي وأنا ماسك زر الماوس أضغط ولا أنتظر قلت خلني أتوكل على الله وأضغط والله إني كنت على أعصابي لكن قدر الله وماشاء فعل أبشركم إسمي طلع وهذي بياناتي الوظيفة المتقدم لها مساعد مبرمج - الرياض موعد الاختبار الاثنين 1432/1/7هـ الساعة :الثامنة والنصف صباحاً المكان :ديوان المظالم -الرياض اللهم لك الحمد والشكر تغيرت النفسية بعد ماشفت إسمي من ضمن المقبولين ومع ذلك أنا خايف كثير لأني دائما في اللحظات الأخيرة من الوظيفة مايكون لي في الوظيفة نصيب على العموم ألف مبروك للمرشحين وإن شاء الله يكتب لنا فيها نصيب ويعلم الله إني حزين على اللي ما أنقبلو لأني عارف معاناتهم وحاس فيها وبإذن الله ينزلون دفعات وترشيح ثاني ويمكن في الأمر خيره للجميع