اخوي انا غسلت سيارتي بالخار لأني كنت ابي افتح مغسلة بالخار اول مادخلت المكائن هذي المملكة لكني حقيقة لم امل لها وشفتها ما تستحق

ما فيها فرق عن تمسيح السيارة من بواب العمارة اللي اسكن بها

يعني ما شفتها تستحق الخسارة ولا اشوف عليها اقبال من الناس

اللي انصحك به حقيقة بحسب ما بحثت في الموضوع هذا

يبي لك مغسلة بستم وفيها وحدة لتلميع السيارات مثل التلميع الساطع سابقا لكن حاول يكون التلميع فئات وفي مقدور مالك السيارة يكرره شهري

وان قدرت ويكون افضل على وحدة للنجيد وزينة السيارات وتركيب المسجلات والتلفزيونات يكون افضل

ومعهم يبي لك بنشر وترصيص كفرات ووزن اذرعة ومقصات وتغيير زيوت واصلاح كسور الزجاج

اهتمامك بالسيارة يكون شامل وتعطي العميل تقرير عن السيارة مكتوب باحتياجات السيارة لو فيها مشاكل ميكانيكة او كهربائية والمطلوب فيها وطبعا الأصلاح مو عندك فقط اعلام الزبون

اللي تهتم له بانك تجعل المحل له عضويات بزيارات شهرية اواسبوعية وفئات للخدمات اللي تقدمها

لكن لابد يكون عندك خدمة تقدمها لكل العملاء وهي غسيل السيارة من الداخل والخارج بسعر واحد بالبستم ومعها تلميع السيارة من الداخل والخارج خدمة اضافية بمبلغ اضافي التلميع من الداخل والخارج يكون به معالجة الخدوش وتربيط الطبلون او الأدراج لو فيها خلخله ومحاولة اصلاح العيون الظاهرة للعيان في داخل السيارة بدون تكلفة عاليه عليك مثلا مسمار سقط من موقعه تبدله بمسمار آخر

ناتي للفقرة ألأخيرة وهي خدمة العميل

لابد يكون عندك بالموقع غرفة مجهزة لأستقبال العملاء وفيها استراحة مكيفة وبها جلسات وخدمة انترنت تقدم للعميل مجانية وركن قهوة وعصيرات طازجة وفيها طاولة بالصحف اليومية والمجلات

وفيها قنوات ترفيهية علمية واخبارية فقط

حقيقة انا كدت اسوي المشروع هذا لكني توقفت عنه لأني انشغلت بأمر أخر أهم لدي منه

ولكن لازالت الفكرة براسي وان شاء الله اسويها الفترة القادمة