السلام عليكم ورحمة الله وبركاته في احد ايام الصيف البارد ...........ههههههههههه امزح معاكم بس متأثر بخوينا مسلف بيل جسيت قبل فترة ميب بالقصيرة حصل لي موقف غريب مع الصدقة... كنت اعاني من ضائقة مالية....وكان عندي قطعة ارض ابي ابيعها ...وفي نفس الوقت كنت اتمنى ان يجيني قرض الزواج من بنك التسليف مع بيعة الارض عشان الازمة تنفك على الاخير... المهم .. مرة ثانية...في احدى ايام الربيع الدافيء...طلعت انا وزوجتي وفجر...كنت مشتهي عصير رمان انا سمعت انه يشيل الصرقعه والطفاقة اللي في الشخص.... المهم رحت لعالم العصاير اللي في شارع حراء.....ويوم وقفت الموتر نزلت وشوي اشوف واحد يدق بوري ويناديني...ماشاء الله موتره شي لاند كروزر قلت الظاهر ان الرجال عنده قروش زايده خل على الاقل يسدد فاتورة جوال بس لا يعقد يمتحني يبيني اطلع معاه... قربت منه قالي انت من هذي الارض الطيبة....قلت اهاااااااااا السالفة فيا ان واخواتها وعيال عمها...قلت ايه....قال انا ياخوي اخذت عمره وانسرقت قروشي....والله العظيم ماعندي حق البنزين...قلت ايييييييييييه ....وانا مو من هالديرة انا من المدينة....الصراحة حسيت انه صادق يوم شفت عياله وحريمه....ماعرفت وش اسوي...قلت له طيب ابشر بسعدك وانا اخوك....اعبي لك بنزين يوصلك لاهلك في المدينة...قال الله يجزاك خير... قلت هيا امش وراي...وطلعت السيارة قالت لي ام فجر وش فيك؟ قلت لها دعيني وشأني ؟ هالرجال اللي وراي يبيني اعبي له بنزين يوصله لاهله.....ههههه على نياتها قالت مسكين شكله مضيع فلوسه.... في نص الطريق قاعد اشاور نفسي اضيعه في الطريق وافتك منه واسحب علاه...والا اعبي له... قررت اني اعبي له بضغوط من ام فجر.....دخلته المحطة قلت الرجال شكله بيعبي بنزين اخضر 91 ......اهييييب علاه عبى احمر ابو 95 ........ب51 ريال ........وضاعت فلوسك ياصابر وراح الرمان وماعاد فيه الا سنتوب ابو نص والا سنتوب ابو ريال ومعاه مصاصين... بعد ماخلص ويبي يطلع من المحطة دق بوري قال الله يستر عليك ويحفظك...وانا اقول بيني وبين نفسي الله يهبلك قنبلة ...قنبلة ماتكفي...الله يهبلك درزن قنابل خربت علينا الجو وطيرت علينا عصير الرمان....قلت له وانا اخوك ترى دعوة المسافر مستجابة ادعي لي ان الله يفرج همي.... وطلع من المحطة.... وفي نص الطريق تذكرت شي مهم..............متى بيرجع الفلوس....واروح ادور له في شارع الامير سلطان .....قنصته من بعيد وقاعد ااشر له بالنور ابغى اقل شي اعطيه رقم حسابي يحول لي الفلوس....لكنه دعس وراح الكلام هذا يوم الربوع....يوم السبت بعد المغرب اتصل علي مكتب وبعت الارض....وبعدها بربع ساعة اتصل علي خويي من بنك التسليف يقولي تعال خذ فلوسك بكرة..... وسددت ديني وفرجت والحمدلله على الاخر وازهرت الازهار واخضرت الورود وطارت العصافير وبنيت السدود والجسور والانهار والمدارس وعبدت الطرقات <<<<انحشر ماعرف ينهي السالفة........... تحسبون السالفة انتهت هنا....... صرت كل يوم ربوع الفلف عند المحطات اشوف أي واحد مضيع فلوسه عشان اعبي له بنزين ويدعي لي هذي هي تجربتي مع الصدقة كتبه ابو فجر...باحث واكاديمي سعودي ونصاب سابق والسلام عليكم ورحمة الله وبركاته