خوالها واعمامها من جده
وش جابها للشرق والمرباعه
لاهي بمختاره ولا محتده
حظي زرعها بالطريق زراعه
دايم كذا يلعب على المرتده
ومشرعن قلبي على مصراعه
لو ان حظي شخص كان اهده
وان اتصل بسكر السماعه
الله يادار الرخا والشده
لافيك لا برقع ولا دراعه
بناتها غير البنات برده
الطايشه مع طيشها طماعه
لاحبتك لازم تكون بشده
جاهز لها على مدار الساعه
واللي يسوي شئ ماهو بقده
كنه يشب القاز بالولاعه
والبنت هذي بالحشا من مده
من يومها ترضع من الرضاعه
لاصوبت مافيه جنب القده
تعرف خريطة خافقي واضلاعه
يكفي شعرها ماتطول تكده
كنه عباة الراس ع الشماعه
مديت قلبي وافسقت بالمده
خلت ربع واخذت ثلاث ارباعه
ماهو عشان المستهيم ووده
عشان اذا ملت تغسل اشراعه
احبها من كل عرق وغده
واذا سمعتوها ماهيب اشاعه
وان وقفوا كل الخلايق ضده
عناد فيهم زدت سمع وطاعه
قولوا وقع في حب ماهو بقده
من شافها حتى قيام الساعه